လဂုၚ်- ဂျာန္နဝါရဳ(၄)
ရးဒေသဇၞော်လဂုၚ်၊ ပွိုၚ်ဍုၚ်ဒဂုၚ် ဍုၚ်တၟိ၊ ပ္ဍဲသၞေဟ်ကွဳပၟတ် တိုဝ်ဂျောၚ်ကလေဂှ် ရိုဟေန်ဂျာ (၉)တၠကဵု မၞိဟ်ဂွံစအကြာ(ပွဲစား)တအ် ဒးဒုၚ်ရပ်လဝ်ရဂှ် ရိုဝ်နေသာန်လွေန် ညးကဵုဒၟံၚ်ရီုဗၚ် ပရေၚ်ရိုဝ်ဟေန်ဂျာဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲပရေၚ်ပရောဂှ် ဂိတုဂျာန္နဝါရဳ တုဲကၠုၚ် စၟတ်တ္ၚဲ(၂) အခိၚ်နူဂယးဂှ် ရိုဝ်ဟေန်ဂျာ(၉) တၠ မပါလုပ်သီု ညးဗြဴၜါတၠတအ် ဃောမၚ်ဍိုက်ဒၟံၚ်ကွဳပၟတ် စှ်ေ လဂုၚ်-မတ်မလီုဂှ် ဒးဒုၚ်ရပ်လဝ်ရ။
ရိုဝ်ဟေန်ဂျာ ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ်တအ်ဂှ် ကံၚ်ဇြဳပၞာန်ပၠုပ်စုတ်လဝ် ပ္ဍဲခရိုၚ်စာတ်တုဲ ကၠောန်သ္ပဒၟံၚ် ဗီုပြၚ်ပရေၚ်ဍဵုဍိုက်ပျဲပျာံကီု ယဝ်ရဂြိပ်တိတ်အာမ္ၚးမ္ဂး အကာဲအရာပရေံနူဏံဏီဂးတုဲ ဒှ်ဒၟံၚ်ဗီုပြၚ် ဘပဠဒၟံၚ်ရဂှ် ညးချဳဒရာၚ်ကတိုၚ်ကၟဟ် ပရေၚ်ရိုဝ်ဟေန်ဂျာဂှ် ဟီုသ္ဂးလဝ်ရ။
“ပ္ဍဲအကြာမၞိဟ်သာမည အာကၠုၚ်ဒၟံၚ် ပ္ဍဲသၞေဟ်ကွဳပၟတ်ဏံ ဂွံရုဲရပ်ကေတ် မၞိဟ် (၉) တၠဏံဓဝ်ဂှ် မၞိဟ်တီအကာဲအရာ/မၞိဟ်လ္ၚတ်ဂၠိုက်ဂၠာဲဒၟံၚ်တအ် တေၚ်စိုပ်လဝ်တွဵုရ ဂွံဒးဒုၚ်ရပ်လဝ်။ အကာဲအရာလၟုဟ်ဏံတှ်ေ ဟီုတိုန်ရိုဝ်ဟေန်ဂျာဗက် ရပ်တုဲဖျေံထောံထံၚ် ဟဂှ်ရ။ ထံၚ်ပၠန်လေဝ် ဒဵုကဵု (၅) သၞာံ ဖျေံဒၟံၚ်ရ။ ဒဵုကဵုဂစိုတ်ဂယိုၚ်ကၠုၚ် ဂအုမ်ဂအုမ် ဒှ်ကၠုၚ်ရ” ဂှ် ရိုဝ်နေသာန်လွေန် ဟီုသ္ဂးလဝ်ရ။
သ္အာၚ်နူဏံပၠန် ကံၚ်ဇြဳပၞာန် ပ္တဝ်လဝ်က္ဍိုပ်ကဵု ရိုဝ်ဟေန်ဂျာတအ် လောန်နူအခိၚ်ကၠာတေံတုဲ ကၠောန်သ္ပကၠုၚ် ပရေၚ်ရပ်စပ်ကီု ဒးဒုၚ်ဒၟံၚ်ဒဒိုက် ပ္ဍဲတွဵုရးရခေၚ်တုဲ ဂြိပ်ဒဴလေဝ် ဒးဆဵုဂဗဒၟံၚ်ကဵု အကာဲအရာဒးဒုၚ်ရပ်ဖျေံထံၚ်ရဂှ် ညးဟီုသ္ဂးလဝ်ဏီရ။
ပ္ဍဲဂိတုဒဳဇြေမ်ဗာမံက် တုဲကၠုၚ်လဝ်ဏံဂှ်လေဝ် ပ္ဍဲဂၠံၚ်တပေန်ယှိုဲထဳ ကွာန်ဗာဠာ ပွိုၚ်ဍုၚ်လှေဝ်ကူဂှ်လေဝ် ဂွံဆဵုကေတ်လဝ် ဇွရိုဝ်ဟေန်ဂျာ မၞိဟ်တြုံ ဒးဒုၚ်ပျဲပျာံတုဲ ဒးဒုၚ်ဂစိုတ်လဝ် (၁၃)တၠနွံရ။
“အခေါၚ်တိတ်ဗၠးနူဒုဟ်ဒဏ်ဂှ် ဂွံကၠုၚ်ဒၟံၚ် လုကဴ ဗွဝ်ကဵုစှ်ောသၞာံ ဂၠိုၚ်ဂၠေၚ်တုဲ လၟုဟ်ဏံလေဝ် သွက်ဂွံဒးဒုၚ်ဒုဟ်ဒဏ်ဟွံမွဲပုဟ်ဂှ် ပတှ်ေကေတ်လဝ်တုဲ သာတုဲ ဂံၚ်ကၠောန်ဂံၚ်သ္ပကၠုၚ်ဒၟံၚ်ရ။ ညံၚ်ဂွံကဵုဒုဟ်ဒဏ်ကဵု ဒပ်ပၞာန်ဏံမာန် နကဵုပိုဲတအ် ကၠောန်မှ ဂွံရုန်ဗၠးတိတ် နူကဵုဘဝဒးဒုၚ်ဍဵုဍိုက်ဏံမာန်ဏောၚ်” ဂှ် ရိုဝ်နေသာန်လွေန် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ပ္ဍဲဍုၚ်လဂုၚ်ဂှ် ကောန်ဂကူရိုဝ်ဟေန်ဂျာတအ် ဒးဒုၚ်ရပ်ဒၟံၚ် ခြာဟွံလအ်ဟွံလအ်တုဲ ကံၚ်ဇြဳပၞာန်ကၠောန်သ္ပဒၟံၚ် ပရေၚ်ရပ်စုတ်ထံၚ် နကဵုၝောံပိုဒ် ဟွံဗဗွဲကဵုဓဝ် အဆက်ကဵုအဆက်ရ။
ပရိုၚ်-သြၚ်လောန်တိုၚ်(မ်)