ဒဳမအ်ဇြော-ဂျာန္နဝါရဳ(၄)
ကြဴနူ ဒပ်ပၞာန်သီအဝဵုတုဲ ပ္ဍဲတွဵုရးကရေၚ်ဍာဲဂှ် ဟိုတ်နူပရေၚ်ကံၚ်ဇြဳပၞာန် ဗတိုက်ကၠုၚ်ဒၟံၚ် ကဵုက္ၜၚ်ကျာ၊ ပန်ဖျေံနၚ်လွဟ်ဇၞော် ကေုာံ ပရေၚ်ရပ်ဒက်ပြိုက်ဂစိုတ်ဒၟံၚ်တုဲ ညးဍုၚ်ကွာန်ဂမၠိုၚ် (၄၁၉) တၠ ဒးချိုတ်လဝ်ရဂှ် ဂကောံဇြဟတ်တဴတက်ညးဍုၚ်ကွာန်ကရေၚ်ဍာဲ PKPF လလောၚ်တြးပ္တိတ်လဝ်ရ။
ပ္ဍဲမွဲကာလသီအဝဵုဏံ နူလပါ်ကံၚ်ဇြဳပၞာန် ကၠောန်သ္ပကၠုၚ်ပရေၚ်ပန်ဗတိုက် နကဵုက္ၜၚ်ကျာ ပ္ဍဲကဵုတွဵုရးကရေၚ်ဍာဲ ဟွံအောန်နူကဵု (၁၈၄) ဝါတုဲ စဵုစိုပ်တ္ၚဲဏံ ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲရ။
ဒပ်ကံၚ်ဇြဳပၞာန် ဒးဒုၚ်ဂိလဝ် ပ္ဍဲပေါဲဗတိုက်ဇီုဓဗတ်တအ်ဂှ် အခိၚ်လၟုဟ်ဏံလေဝ် သၠဲပ္တိတ်ဒၟံၚ် ဇြဟတ်ဒပ်ပၞာန် ပ္ဍဲတွဵုရးကရေၚ်ဍာဲတုဲ သုၚ်စောဲကာခြပ်ပသဲ ပလေဝ်ပလေတ်ဒၟံၚ် သွက်ဂွံထ္ပက် ကရောၚ်ပၞာန်ရ။
သ္အာၚ်နူဏံပၠန် ဒပ်ကံၚ်ဇြဳပၞာန်ဂှ် ပါဲနူပ္တဝ်လဝ်ကဵု ညးဍုၚ်ကွာန်တုဲ ကၠောန်သ္ပကၠုၚ် ပရေၚ်ပန်ပှော်ဂှ် ဟိုတ်ဟွံမွဲ ဂၠာဲဟိုတ်တုဲ ကၠောန်ဒၟံၚ် ပရေၚ်ရပ်ဒက် ပျဲပျာံ မၞိဟ် (၂၈၀) တၠရဂှ် ဂွံတီကေတ်ရ။
လၟိဟ်မၞိဟ်မၞုံ ပ္ဍဲတွဵုရးကရေၚ်ဍာဲ ၜိုတ်(၃)ကိုတ်ဓဝ်ဂှ် ဟိုတ်နူကံၚ်ဇြဳပၞာန်တုဲ ညးဒေသ (၂)ကိုတ်ပြၚ်ဂှ် ဒးပါဲဓလေတ်ဒၟံၚ် ဘဲပၞာန်တုဲ သွက်ညးတအ်ဂှ် နွံပၟိက်ဒၟံၚ်ကဵု အရီုဗၚ်ပရေၚ်ရံၚ်စံၚ်ထ္ၜလဘာ်ပရေၚ်မၞိဟ်ရဂှ် ညးကဵုဒၟံၚ်ရီုဗၚ် ညးပါဲဓလေတ်ဘဲပၞာန်ဂမၠိုၚ် ဟီုကဵု ဌာန်ပရိုၚ် သြၚ်လောန်တိုၚ်(မ်)ရ။
ပ္ဍဲသ္ကုတ်လကြဴ နူဒပ်ပၞာန်သီအဝဵုတုဲ ပ္ဍဲတွဵုရးကရေၚ်ဍာဲဂှ် အပံၚ်လၟိဟ်ပေါဲဗတိုက် (၅၄၄) ဝါ က္တဵုဒှ်လဝ်တုဲ ပ္ဍဲကဵုပေါဲဗတိုက်တအ်ဂှ် နူလပါ်ကံၚ်ဇြဳပၞာန် ဒးချိုတ်အာလဝ် (၁၆၉၂)တၠတုဲ၊ လပါ်ဂကောံရပ်လွဟ်ကောန်ဍုၚ်အရၚ် ကေုာံဂကောံ ပံၚ်တောဲ ပရေၚ်စဵုဒၞာဒေသ မဖျေံလဝ်သ္ဇိုၚ် ပ္ဍဲတွဵုရးကရေၚ်ဍာဲဂမၠိုၚ်ဂှ် ဒးပြဟ်လလုဲလဝ် (၂၁၁)တၠရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ