မတ်မလီု၊ ဂျာန္နဝါရဳ (၄)
ပ္ဍဲဂိတုဂျာန္နဝါရဳ (၈) ဏံ ကလေၚ်ပံက် သၞေဟ်ကၚ်ကူသာန်သွံရာန်ဗၞိက်ပယျဵု ကြုက်−ဗၟာ မကၟာတ်လဝ် လလအ်ပွိုၚ် (၃) သၞာံ ဟိုတ်နူယဲကပ်ကိုဝ်ဝေဒ်ဂှ်ရောၚ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဍုၚ်ကြုက်ဝွံ စနူယဲကပ်ကဝ်ဝေဒ် က္တဵုဒှ်တုဲဂှ် ကၟာတ်လဝ်သၞေဟ်ကၚ်ကူသာန်သွံရာန်ပယျဵု ကြုက်−ဗၟာတံဂှ်တုဲ သၞေဟ်ကၚ်ကျေန်သာန်ကျအ်မွဲဟေၚ် ကဵုလဝ်အခေါၚ်ပံက် နကဵုစေဝ်ပၞောန်မတေၚ်ဂြတ်တံရ။
အခါလၟုဟ်ဂှ် အလဵုအသဳကြုက်ဝွံ ကလေၚ်ပံက်အာ သၞေဟ်ကၚ်ကူသာန်သွံရာန်ဗၞိက်ပယျဵု ပါန်သာၚ်၊ သၞေဟ်ကၚ်ဇြေန်ဖျူ၊ သၞေဟ်ကၚ်နာန်ဒဝ်၊ သၞေဟ်ကၚ်မာတ်ဝုက်တံရဏောၚ်ဂှ် လလောၚ်တြးကၠုၚ် ဗွဲမလုပ်သၞောဝ်ရ။
စပ်ကဵုအကာဲအရာ သၞေဟ်ကၚ်ပရေၚ်ကူသာန်သွံရာန်ဗၞိက်ပယျဵု ကြုက်−ဗၟာ ၜါဍုၚ် ကလေၚ်ပံက်ဏံဂှ်တုဲ သၟာဗၞိက်ပယျဵုမွဲတၠ ဟီုလဝ် ဗီုလၟုဟ်ရ။
“လောန်ကၠုၚ် ဗ္ဒါဲ (၃) သၞာံတေံရ သၞေဟ်ကၚ် မၞုံအပ္ဍဲပွိုၚ်ဍုၚ်မူဇြေဝ်တံသီုဖအိုတ်ဂှ် ကၟာလဝ်ရ၊ ပ္ဍဲကဵုဂှ် ဂွံပံက်လဝ် သၞေဟ်ကၚ်ကျေန်သာကျအ်မွဲဟေၚ်ရ၊ သၞေဟ်သှ်ေ (၄) ဂှ် ကၟာတ်လဝ်ရ၊ ဆ္ဂး စနူဂိတုဂျာန္နဝါရဳ (၈) ဏံတုဲမ္ဂး သၞေဟ်ကၚ်မၞုံအပ္ဍဲပွိုၚ်ဍုၚ်မူဇြေဝ်ပိုယ်တံ သၞေဟ်ကၚ်မူဇြေဝ် ဂျာဂံၚ်လေဝ်ကော်၊ လ္ပာ်မူဇြေဝ်ဂှ်တှ်ေ ခြာမံၚ်ဒပ်သၟးရ၊ သၞေဟ်ကၚ်မာတ်ဝုက်ပံက်ဏောၚ်၊ သၞေဟ်ကၚ်နာန်ဒဝ် ပံက်ဏောၚ်၊ ဇြေန်ဖျူပံၚ်ဏောၚ်၊ မဒှ်သၞေဟ်ကၚ်မစုက်အိုတ်တံရ၊ လၟုဟ်ဂှ်တှ်ေ နူကဵုသၞေဟ်တံဏံ မၞိဟ်လုပ်တိတ်ဂွံဏောၚ်၊ ကွဳစက်ဖ္ဍိုက်ဗၞိက်တံ လုပ်တိတ်ဂွံဏောၚ်၊ ကွဳစက်သ္ၚိတံ လုပ်တိတ်ဂွံဏောၚ်၊ ကွဳလိုန်ဓာတ်တံ လုပ်တိတ်ဂွံဏောၚ်၊ ဓဝ်လာဂျဳတံ လုပ်တိတ်ဂွံဏောၚ်၊ အရာတံဏံဂှ် ကဵုအခေါၚ်လုပ်တိတ်လၟေၚ်တ္ၚဲရောၚ် နူကဵုအလဵုအသဳဍုၚ်ကြုက် လိက်ဗွဲမလုပ်သၞောဝ် တိတ်လဝ်ရ” သာ်ဝွံ သ္ဂးရ။
ပ္ဍဲကဵုသၞေဟ်ကၚ်ပရေၚ်ကူသာန်သွံရာန်ဗၞိက်ပယျဵု လ္ပာ်ကြုက် ကလေၚ်ပံက်ကဵုအာဂှ် လၟေၚ်တ္ၚဲ အခိၚ်ဗ္ၜတ်ဍုၚ်ကြုက် နူ (၈) နာဍဳဂယး စဵုကဵု (၁၁) နာဍဳကဝိုက်မ္ဂး တတ်ကၠောံအာကၠုၚ် ဗွဲမလုပ်သၞောဝ်မာန်တုဲ နကဵုစေဝ်ပၞောန် မထ္ၜုတ်လဝ်တံဂှ် ပလံၚ်ပ္တိုန် ကပေါတ်ဗၞိက်တံမာန်ရောၚ်ဂှ်လေဝ် ဂွံတီကေတ်ရ။
ယဝ်ရကလေၚ်ပံက် သၞေဟ်ကၚ်ပရေၚ်ကူသာန်သွံရာန်ဗၞိက် ပယျဵုကြုက်−ဗၟာတံဂှ်မ္ဂး အာကၠုၚ်လောဲသွာတုဲ ၚုဟ်မးဒးအိုတ်တံလေဝ် သက်သာကၠုၚ်မာန်ရောၚ်တုဲ ၚုဟ်ကပေါတ်ဗၞိက်တံ စှ်ေကၠုၚ်မာန်ရောၚ် သၟာဗၞိက်ပယျဵုမွဲတၠ သ္ၚဳဂၠိပ်လဝ်ရ။
“ပံက်မ္ဂးတှ်ေ ပရေၚ်အာကၠုၚ်၊ လုပ်တိတ်တံ ခိုဟ်ဂၠိုၚ်ဏောၚ်၊ ၚုဟ်အိုတ်တံ သက်သာအာဏောၚ်၊ ခရိတ်အိုတ်ဟီုဂှ် မၞိဟ်တံဏံ လုပ်တိတ်ဂွံတုဲ ဥပမာ−ယှာန်တုၚ်အကြာတံ မုတံ ကလှ်တိတ်အာအိုတ်ဏောၚ်၊ ၚုဟ်ယိုက်ဏာနၚ်တံ သက်သာအာတၟာဂလိုၚ်ဏောၚ်၊ သာတုဲတှ်ေ မြက်ဇက်ကၠုၚ်ဏောၚ်၊ ၚုဟ်အိုတ်တံဂှ်ဟီုမ္ဂးတှ်ေ ၚုဟ်ဗၞိက်တံ စှ်ေကၠုၚ်ဏောၚ် သာ်ဏံရ၊ ဥပမာကၠာတေံ ၚုဟ်ယိုက်သ္ၚု မွဲရိုက်ဂှ်တှ်ေ ၜိုတ် (၅၀၀) ဒးဏောၚ်၊ ဒးယိုက်လောဲလောဲသွာသွာမ္ဂးတှ်ေ ၚုဟ်ဂှ် ၜိုတ် (၂၀၀) ရ ဒးဏောၚ်၊ လအာသာ်ဏံရ” သာ်ဝွံ သ္ဂးရ။
ပရေၚ်ကူသာန်သွံရာန်ဗၞိက်ပယျဵု ကြုက်−ဗၟာဂှ်ဝွံ ဟိုတ်နူယဲကပ်ကဝ်ဝေဒ်တုဲ လ္ပာ်ကြုက်ကၟာတ်ထောံလဝ်ဂှ်ရ ပရေၚ်ကူသာန်သွံရာန်ၜါဍုၚ် စှ်ေအာလဝ် ဗ္ဒါဲ (၆၅) တၟံကၠံတုဲ ပ္ဍဲဂိတုလ္ၚဵုတံဂှ်မ္ဂး ဒးဆေၚ်လဝ်မုက် ကဵုအကာဲအရာ ပရေၚ်ကူသာန်သွံရာန် ဒးဒေါအ်ဒေၚ်အာ ပေၚ်ၚ်တံရ။
အခိၚ်လၟုဟ် ပ္ဍဲဍုၚ်မူဇြေဝ် မဒှ်ပယျဵု ကြုက်−ဗၟာဂှ် ဒၟါနူပံက်လဝ်သၞေဟ်ကၚ်ကျေန်သာန်ကျအ်မွဲဟေၚ်ဂှ်ရ လၟေၚ်တ္ၚဲ ကွဳစက်ၜိုတ်ပွဳပွူ (၁၃၀) ဖ္ဍိုက်ဓဝ် ကၠောန်သ္ပကူသာန်သွံရာန်ဗၞိက်မာန်တုဲ ယဝ်ရသၞေဟ်ကၚ်သီုဖအိုတ်ပံက်ကၠေံမ္ဂး လၟိဟ်ဖ္ဍိုက်ကွဳစက် ဂၠိုၚ်ကဵုလ္ၚီ ကူသာန်သွံရာန်မာန်ရောၚ် သၟာဗၞိက်ပယျဵုတံ သ္ဂးအိုတ်ရ။
ကၟိန်ဍုၚ်ဗၟာဝွံ နူကဵုသၞေဟ်ကူသာန်သွံရာန်ပယျဵုဂှ်မွဲဆံၚ် ပလံၚ်ပ္တိုန်ဒၟံၚ် အပ္ဍဲဍုၚ်ကြုက်အဓိကတံဂှ် မပ္တံကဵု သ္ၚု၊ ကၞောန်သ္ၚု၊ သတ်ဂန်၊ ၜဲသ္ၚေက် (ပဲတီးစိမ်း) ၊ လ္ၚဴ၊ သတ်ကၠေၚ်တိတ်၊ ၜဲနာနာ၊ ခအဳ၊ မညောန်၊ ရဝ်ဗာ၊ ကပေါတ်အရပ်စပ်ပ္ဍဲဖဴတံ သီုကဵုပါလုပ် ဗၞိက်တိတ်နူဍာ်တံရ။
ဍုၚ်ကြုက် ပၠောပ်ပ္တိုန်ဒၟံၚ် အပ္ဍဲဍုၚ်ဗၟာဂှ်တှ်ေ မ္ၚးနူကပေါတ်အရပ်စပ်ပရေၚ်သိုၚ်ခၞံ၊ ကပေါတ်ဓာတ်လလဳ၊ ကပေါတ်ကွတ်စက်၊ ဝါဲဓာတ်၊ ဂဥုဲဇဗ၊ ဗၞိက်အရပ်စပ်မၞိဟ်၊ ဗၞိက်စၞစသုၚ်ဂှ် သီုကဵုကပေါတ်ဗၞိက် အရပ်စပ်ကာနာနာ တၞဟ်သ္အာၚ်တံလေဝ် ပါလုပ်ရ။
ပရိုၚ်−သြၚ်လောန်တိုၚ်(မ်)