လ္ဂုၚ်၊ ဂျာန္နဝါရဳ (၄)
ပ္ဍဲကဵုအစဳဇန် သၞာံ ၂၀၂၃ အလဵုအသဳညဳသၟဟ်ဂကူ NUG ဂှ် ကဆံၚ်ဒုတိယ သွက်သ္ဂောံဗ္တိုက်သၠေက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ် ပ္ဍဲဂိတုဂျာန္နဝါရဳဏံ စအာရဏောၚ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် NUG ဥူဏေဖုၚ်လာတ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲသၞာံ ၂၀၂၃ ဏံဂှ် ဒှ်ကာလဒးချဳဒရာၚ် ပေါဲဗ္တိုက်အုပ်ကၠေံနိဂီု နူကဵုဂကောံရပ်လွဟ်ကောန်ဍုၚ်အရၚ် မဟာမိတ်ဂမၠိုၚ် ကေုာံ ဂကောံဇြဟတ်ပၠန်ဂတး သီုကဵုပါလုပ် NUG တံ မဗ္တိုက်သၠေက်ထပိုတ်ရိုဟ်ကၞက် ကုသၞောတ်တၠအဝဵုပၞာန်ဂှ်ရောၚ် ဟီုဂးလဝ်ရ။
နကဵုညးဍုၚ်ကွာန်မှာဇန် နူဌာန်ဒေသဇဳ၊ ဂကူပံၚ်ဇဳ ပ္ဍဲကဵုပၠန်ဂတးလုပ်ဝၚ် မကဵုသ္ဂုတ်သွာတ် ကုကံကုသိုလ်အနာဂတ်ကၟိန်ဍုၚ်ဂှ် မိက်သ္ဂောံကဵု ဆက်ပံၚ်တောဲပါလုပ်ချဳဒရာၚ် ၜိုတ်သၟဟ်အစောံ နကဵုသတ္တိ၊ ဇဲ၊ လွဳ၊ ဝဳရိယ၊ ဆန္ဒ၊ ညာဏ်ပညာ မထတ်သန်သ္ကာတ်မြဟ်တံဂှ်ရောၚ် ဂကောံဇြဟတ်ပၠန်ဂတး (၂၀) ပြၚ် သီုကဵုပါလုပ် NUG တံ ပ္ဍဲတ္ၚဲကၠောံသၞာံဂှ် လလောၚ်ပ္တိတ်လဝ် လိက်စံၚ်လလောၚ်တြးပံၚ်တောဲရ။
ညးမၞုံအခေါၚ်ဟီုဂး ရုၚ်ဝန်ဇၞော် NUG ဥူဏေဖုၚ်လာတ်ဂှ် အခိၚ်ခြာဟွံလအ်ဏံ ပ္ဍဲပရေၚ်ဍုၚ်ကွာန် ကေုာံ ပရေၚ်ဘဏ္ဍာ သီုကဵုပါလုပ်ပရေၚ်ပၞာန်တံဂှ် အရာမတောတက်ပြံၚ်လှာဲ တၟေၚ်ၚ်တၟဟ်ဟ်တံ ဂွံညာတ်အာ ကၠးကၠးဖ္ဍးဖ္ဍးရောၚ်ဂှ် သ္ဂးရ။
“ အတိုၚ် NUG ကညာၚ်ကမြဴလဝ် ရုန်ကၠေံမွဲဂလး သၟဟ်ရမျာၚ်မွဲ ၂၀၂၃ ဂှ်တှ်ေ သွက်ဂွံအာ အတိုၚ်အကာဲအရာဏံဂှ် လၟုဟ် ဂကောံဇြဟတ်မဟာတ်မိတ် ကောန်ဍုၚ်အရၚ်တံကဵု ညးဍုၚ်ကွာန်တံ ၜိုတ်လဵုဒှ်မံၚ် မွဲရမျာၚ်ယျ၊ သွက်ဂွံရုန်တိတ်မွဲအခိၚ်ဓဝ်ဂှ် ၜိုတ်လဵုညဳသၟဟ် ကောံကလောံဒၟံၚ်ယျဟီုဂှ် ဂွံညာတ်အာဏောၚ်၊ ပ္ဍဲကဵုအစဳဇန် NUG ပွိုၚ်မွဲသၞာံ (One Year Plans) ဂှ်မ္ဂး ၂၀၂၃ ဝွံ ဒှ်ကဆံၚ်ဒုတိယ မသၠုၚ်ပ္တိုန် ပရေၚ်ပၠန်ဂတး အဆံၚ်ၚ်ရောၚ်၊ နကဵု Phase 2 ဂှ် နူဂိတုဂျာန္နဝါရဳဏံ စအာရဏောၚ်၊ ဟိုတ်ဂှ်ရ လၟုဟ်မ္ဂး ပ္ဍဲကဏ္ဍပရေၚ်ဍုၚ်သ္အာၚ်ဂှ် အရာမတောတက်ပြံၚ်လှာဲတံ ဂွံညာတ်ကေတ်တၟာဂလိုၚ်တုဲ ခြာဟွံလအ်ဏံ ပ္ဍဲပရေၚ်ပၞာန်ကီု၊ ပရေၚ်ဘဏ္ဍာကီု၊ ပရေၚ်ဍုၚ်ကွာန်ကီု အရာမပြံၚ်လှာဲတောတက် တၟေၚ်ၚ်တၟဟ်ဟ်တံ ဂွံဆဵုညာတ်အာ ကၠးကၠးဖ္ဍးဖ္ဍးရဏောၚ်” ဂှ် ညးဟီုရ။
ဆ္ဂး စပ်ကဵုပွမသၠုၚ်ပ္တိုန် ကဆံၚ်ဒုတိယ သွက်ပရေၚ်ပၠန်ဂတးတံဂှ်တုဲ အစဳဇန်တံ နဲဗျူဟာတံ သာ်လဵုဒှ်ရောဟီုဂှ် လလောၚ်ပ္တိတ်ဟီုဂးကၠုၚ် ဗွဲလစှ်ေဂှ် ဟွံမွဲရ။
ကံၚ်ဇြဳပၞာန်ဂှ် သၞာံ ၂၀၂၃ အပ္ဍဲဂိတုအဝ်ဂါတ်ဏံဂှ် ဒ္ဂေတ်စကာ သၞောတ်သ္ပစၞးခလပ်ဆ (PR) တုဲ နဒဒှ်ပၞော်တိတ်ပရေၚ်ဍုၚ်ကွာန် သွက်သ္ဂောံဂွံပွမသ္ပစၟတ်သမ္တီ ဗွဲမလုပ်သၞောဝ်တုဲ သွက်ဂွံကၠောန်ဗဒှ် ပေါဲရုဲမာဲ ဗၠးၜးဗဗွဲဓဝ်ဂှ် ဂ္စါန်ဒၟံၚ်ရောၚ်။
ဆ္ဂး ကြဴနူသီအဝဵုတုဲဂှ် ဌာန်ဂကောံဗၠးၜးကချေၚ် (KIO) ၊ ဒပ်ပၠတရဴ ကောန်ဂကူချေၚ် (CNF) ၊ ဗော်တောတက်ကောန်ဂကူကရေၚ်ဍာဲ (KNPP) ကေုာံ ဒပ်မဟာ (၅) ကေုာံ ဒပ်မဟာ (၂) ဗော်သွးကောန်ဂကူကရေၚ် KNU မဒှ်ဒၟံၚ်ပဋိပက္ခရပ်လွဟ် ကုဒပ်ကံၚ်ဇြဳပၞာန်တံဂှ် ဟွံဒုၚ်တဲ ပေါဲရုဲမာဲ ကံၚ်ဇြဳပၞာန်တံ မကၠောန်ဂှ်ရောၚ် ပ္ဍဲတ္ၚဲကၠောံသၞာံဂှ် က္ဍိုပ်သ္ကိုပ်ကဆံၚ်လ္တူဂမၠိုၚ် ထ္မံက်ပ္တိတ်ဟီုဂးလဝ်ရ။
ကမ္မတဳက္ဍိုက်ပ်ဗဟဵု ဒပ်ကွးဘာ (ABSDF) ကောန်သ္ဂံၚ်သလာၚ်ယဝ်အံၚ်ဂှ်လေဝ် သၞာံ ၂၀၂၃ ဝွံ သွက်ပၠန်ဂတးက္ညၚ်ဂှ် ဒှ်သၞာံပၟိက်ဇၞော်မွဲသၞာံတုဲ လ္ပာ်ကံၚ်ဇြဳပၞာန် ကၠောန်ပေါဲရုဲမာဲ မာန်၊ ဟွံမာန်ဂှ် ဒးမၚ်ကျောဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“၂၀၂၃ ဂှ်တှ်ေ သွက်ပိုယ်တံဂှ် ဒှ်သၞာံပၟိက်ဇၞော်ရောၚ် ညာတ်ရ၊ နကဵုဂကောံဇြဟတ်ပိုယ်တံ သွက်သၞောတ်တၠအဝဵုလၟုဟ် ဂွံသုန်ဂြာံအာဂှ် ဂ္စါန်ဒၟံၚ်ဖိုဟ်ရ၊ ဒပ်ပၞာန်ဂှ်တှ်ေ သွက်ဂွံသောၚ်ကလး အကြေပ်ဂြတ် ပရေၚ်ဍုၚ်ကွာန်ဍေံတံ နကဵုပေါဲရုဲမာဲ ၂၀၂၃ ဂှ် ဂ္စါန်ဒၟံၚ်ရ၊ ညအ်လေဝ် ၂၀၂၃ ဂှ် ပေါဲရုဲမာဲဒှ်ဟာ၊ ဟွံဒှ်ပုဟ်ဟာဟီုဂှ် ပိုယ်တံ ဒးမၚ်ကျောဝ်ဏောၚ်” သာ်ဝွံ ညးသ္ဂးရ။
အလုံမွဲကၟိန်ဍုၚ်ဂှ် တိဍာ်ထိၚ်ဒဝ် ဂကောံဇြဟတ်ပၠန်ဂတးတံ၊ မဟာမိတ်ကောန်ဍုၚ်အရၚ်တံ သီုကဵုပါလုပ် NUG တံဂှ်ဝွံ ပါဲနူဟွံဂွံလလောၚ်တြး ဗွဲမလုပ်သၞောဝ်မွဲဂှ်တုဲ နွံမံၚ်ဍာံဍာံဂှ်ရ နကဵုကံၚ်ဇြဳပၞာန် ပေါဲရုဲမာဲ မဂ္စါန်ကၠောန်ဗဒှ်ဒၟံၚ်ဂှ်ဝွံ ကၠောန်ဟွံမာန်ပုဟ်ဂှ် ဥူဏေဖုၚ်လာတ် ထံက်ထ္ၜးလဝ်ရ။
အတိုၚ်လိက်ဒုၚ်စဳရေၚ် ဂကောံကံၚ်ဇြဳကဵုကသပ် စပ်ကဵုဍုၚ်ဗၟာ (SAC-Myanmar) ဂှ်မ္ဂး ကံၚ်ဇြဳပၞာန်ဝွံ အလုံမွဲကၟိန်ဍုၚ် ပၞောဝ်ကဵုပွိုၚ်ဍုၚ်အပံၚ် (၃၃၀) မၞုံဂှ် (၇၂) ပွိုၚ်ဍုၚ်ဟေၚ် ထိၚ်ဒက်လဝ် ဍိုက်က်ပေၚ်ၚ်မာန်ဂှ် လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ သတ္တာဟဒုတိယ သၞာံတုဲကၠုၚ်တေံရ။
ညးလ္ၚတ်သ္ၚဳဂၠိပ်ပရေၚ်ပၞာန်၊ ပရေၚ်ဍုၚ်ကွာန်တံဂှ် သၞာံ ၂၀၂၃ ဝွံ ဒှ်ကာလပေါဲဗ္တိုက်သ္ကာတ်မြဟ် သွက်ဖေဝ်ဒရာဒဳမဝ်ကရေဇြဳ မပလီုကၠေံ သၞောတ်တၠအဝဵုပၞာန်တံ က္တဵုဒှ်ကၠုၚ်ရောၚ်ဂှ် သ္ၚဳဂၠိလဝ်ရ။
ပရိုၚ်−သြၚ်လောန်တိုၚ်(မ်)