မတ်မလီု-ဂျာန္နဝါရဳ(၇)
ညးလုပ်စိုပ်ပြိုၚ် ပ္ဍဲပေါဲရုဲမာဲကံၚ်ဇြဳပၞာန်သီအဝဵုတအ်ဂှ် စိုပ်မွဲတ္ၚဲမ္ဂး ဒးဒုၚ်ဒဏ် ညးဍုၚ်ကွာန်တအ် ကဵုကၠုၚ်ဗွဲစၟတ်ရဂှ် ဂကောံဇြဟတ် ပရေၚ်ပံၚ်ကောံပ္ညဳပ္ညပ် ဗကပ်ဗဗေၚ်နာနာ (GSCB) ဂှ် လလောၚ်တြး ပ္တိတ်လဝ်ပရိုၚ်ရ။
ပေါဲရုဲမာဲကံၚ်ဇြဳပၞာန် ဟွံလုပ်သၞောတ်ဂှ် ဒှ်သွဟ် သွက်ပရေၚ်ပၠန်ဂတးက္ညၚ် ဟွံသေၚ်တုဲ ပရေၚ်ဍဵုဍိုက်ဖ္အောဝ်စကာ ဗွဲအဓမ္မ သွက်ပေါဲရုဲမာဲ နွံကၠုၚ်မာန်ဂှ်ရ နွံပၟိက်ဒၟံၚ် သွက်ညးဍုၚ်ကွာန်တအ်ဂွံဒစဵုဒစးရဂှ် ဟီုသ္ဂးလဝ်ရ။
ပေါဲရုဲမာဲအယောၚ်အလာ ဟွံလုပ်သၞောဝ်ဂှ် ညံၚ်ဟွံဂွံစၟတ်သမ္တီ ညံၚ်ရဴဍာံဇေတ်ဂှ် နွံဒၟံၚ်ပၟိက်တုဲ ပြဝဂကောံပၞာန်ဂှ် ဒှ်ဂွန်ပလေတ်ဍာ်ပါၚ် ပ္ဍဲကတောဝ်ဂကောံဇြဟတ် ကၟိန်ဍုၚ်နာနာတအ်ကီု ဒၟာနူဒှ်ကၠုၚ်သွဟ် သွက်ကၟိန်ဍုၚ်ဗၟာ ဟွံမာန်ကီုဂှ်ရ နကဵုကၟိန်ဍုၚ်နာနာဂမၠိုၚ် သွက်ဂွံဒတူလာၚ်အာ ကရောံညးဍုၚ်ကွာန်တအ်မွဲစွံဂှ် ဗတိုက်ဖ္အောဝ်လဝ်ရ။
ပရေၚ်ပ္ကီုပရာပ်၊ ပရေၚ်ရာဇဝတ်ပၞာန် ကေုာံပရေၚ်ပြိုက်ဂစိုတ်ကမၠက်ဂကူ ကံၚ်ဇြဳပၞာန်တအ်ဂှ် ပတိုန်လဝ်စၟတ်သမ္တီ အဆက်ဟွံပိုတ်သ္ကုတ်တုဲ ကမၠောန်ပြဝကံၚ်ဇြဳပၞာန် သာ်လဵုဟွံဟီု ဒစဵုဒစးအာဒၟံၚ်ပိုတ်တ်သ္ကုတ်တ်တုဲ လုကဴဟွံက္လိဂွံ တိုၚ်ပ္ကဴရန်တၟံညးဍုၚ်ကွာန်ဏီမ္ဂး လုပ်အာပေါဲဗတိုက်လၟိုန်ရောၚ်ဂှ် (GSCB) လလောၚ်တြးလဝ်ရ။
သ္အာၚ်နူဂှ်ပၠန် နကဵုကၟိန်ဍုၚ်ကြုက်၊ အိန္ဒိယ မဒှ်ကၟိန်ဍုၚ်ဝုတ်ဒိုဟ်ကေုာံ ကၟိန်ဍုၚ်ဇြဟတ်ဇၞော်တအ်ဂှ် ညံၚ်ဟွံဂွံဒုၚ်ဂိုၚ်ကေတ် ပေါဲရုဲမာဲ ကံၚ်ဇြဳပၞာန်ကၠောန်ဗဒှ်ဏံ နဒဒှ်ဍာံဇေတ်ဂှ် နွံဒၟံၚ်ပၟိက်ရောၚ်ဂှ် ဟီုသ္ဂးလဝ်ရ။
ကြဴနူ ဒပ်ပၞာန်သီအဝဵုကၟိန်ဍုၚ်ဗၟာတုဲဂှ် ပံၚ်ပကောံဂကောံဇြဟတ်ဗကပ်ဗဗေၚ် အလုံမွဲကၟိန်ဍုၚ် ဒက်ပ္တန်လဝ် GSCB တုဲဂှ် ဒှ်ဂကောံဒစဵုဒစးဒၟံၚ်ကဵုကံၚ်ဇြဳပၞာန် ဇၟာပ်ဒဒှ်တ္ၚဲလေဝ် ဒှ်ရ။
ပရိုၚ်-သြၚ်လောန်တိုၚ်(မ်)