ဂျာကာတာ – ဂျာန္နဝါရဳ(၇)
သမ္မတအေန်ဒေါနဳယှာ ဂျိုဝ်ကိုဝ်ဝဳဒိုဝ်ဒိုဝ်ဂှ် ကိုပ်ကၠာဟွံဂွံကၠောန်ဗဒှ် ပေါဲရုဲမာဲ ပ္ဍဲသၞာံ ၂၀၂၄ ကၠုၚ်စိုပ်ဏံ သွက်ဂွံပြုပြေၚ်ပြံၚ်သၠာဲ ဂကောံအလဵုအသဳ အလန်လကြဴအိုတ်ဂှ် မံၚ်ရံၚ်ကျောဝ်ဒၟံၚ်တုဲ ပ္ဍဲအကြာမွဲၜါတ္ၚဲကၠုၚ်စိုပ်ဏံ ဒှ်ကၠုၚ် ပရေၚ်ပြံၚ်သၠာဲမာန်မံၚ်ရောၚ်ဂှ် တမ်ရိုဟ်ပရိုၚ်ပရေၚ်ဍုၚ်ကွာန်လ္ၚဵုဂမၠိုၚ် ဟီုသ္ဂးလဝ်ရ။
ဗော်နေတ်သဒါန် မဒှ်ဗော် ပ္ဍဲကဵုဗော်ပံၚ်ကောံဂွံလဝ်အဝဵု (၇)ဗော် မွဲဗော်ဂှ် ပ္ဍဲပေါဲရုဲသမ္မတ ၂၀၂၄ ကၠုၚ်စိုပ်ဂတဏံ ကြဴနူအခိၚ်လလောၚ်တြးလဝ် ကလေၚ်ပအပ်ကဵု သ္ကိုပ်အုပ်ဓုပ်ဂျာကတာတြေံ အာန်နဳဗေတ်သ်ဝဳဒါန် ပၠန်ရောၚ်တုဲဂှ် စပ်ကဵုပရေၚ်ပြံၚ်သၠာဲတုဲ ပရေၚ်ချိၚ်ခယျဂမၠိုၚ် ဂၠိုၚ်တိုန်ကၠုၚ်ရ။
ဂကောံ နူကဵုဗော်အေန်ဒေါနဳယှာ ဒဳမဝ်ကရေတ်တေတ် (PDIP) သမ္မတတအ်ဂှ် သွက်ဂွံပါဲပ္တိတ်ကၠေံ ဂကောံနေတ်သ်ဒါန် နူကဵုဂကောံအလဵုအသဳ အာတ်မိက်လဝ်ရဂှ် ဂွံတီကေတ်ရ။
စပ်ကဵုပရေၚ်ပြံၚ်သၠာဲ ပ္ဍဲဂကောံအလဵုအသဳတုဲ ပ္ဍဲအကြာမွဲၜါတ္ၚဲ ကၠုၚ်စိုပ်ဏံမ္ဂး ဒှ်ကၠုၚ်မာန်ရောၚ်ဂှ် သမ္မတဂျိုဝ်ကိုဝ်ဝဳဒိုဝ်ဒိုဝ် ဟွံသောၚ်ထ္ၜးကဵုလဝ် တၚ်သောဲသောဲဗြောဲဗြောဲတုဲ ဟီုလဝ်ကဵု သၟာပရိုၚ်ဂမၠိုၚ်ရ။
အတိုၚ်ဂကောံပံၚ်ကောံ သမ္မတကဵု တမ်ရိုဟ်ပရိုၚ်တၚ်ဂၞၚ်အလဵုအသဳ ဟီုဂးလဝ်မ္ဂး ဂျိုဝ်ကိုဝ်ဝဳဂှ် သွက်ဂွံကၠောန်ပတုဲ ပရိုဝ်ဂရာမ်ကေုာံ ပရောဂျေတ် သှ်ေၜက်ဒၟံၚ် သွက်ဂွံကၠောန်ရေၚ်တၠုၚ် ပ္ဍဲအာယုက်ညးအိုတ် ၂၀၂၄ လကြဴအိုတ်ဂှ် ကၠောန်သ္ပဒၟံၚ် သွက်ဂွံကော်ကောံဓရီု ကာတ်ဗိနေတ်အဓိကမၞုံဒၟံၚ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ဝန်ဇၞော်ဍာ်ဒကေဝ်ဍိုန်လျတအ်ဂှ် သွက်ဂွံပါဲပ္တိတ် နကဵုအသံပၟိၚ်သမ္မတတိုက်ရိုက် နွံဒၟံၚ်ရဂှ် တမ်ရိုဟ်တၚ်ဂၞၚ်ပရိုၚ် ဟွံမိက်ဓမံက်ယၟုမွဲတၠ ဟီုကဵု ဌာန်ပရိုၚ်ရိုက်တာရ။
ဝန်ဇၞော်ပရေၚ်ကောပ်ကာဲ ဆေၚ်ရာကဵုပရေၚ်ဓလိုက်တမ်ရိုဟ် ကေုာံဇြဟတ်၊ ဝန်ဇၞော်ပရေၚ်ပိုန်ဒြပ်ကၟိန်ဍုၚ်ပိုၚ် ကေုာံဝန်ဇၞော်ပရေၚ်ဘဏ္ဍာတအ်ဂှ် ဆက်နွံအာ ပ္ဍဲဂကောံအလဵုအသဳမာန်ဏီရဂှ် တမ်ရိုဟ်ပရိုၚ်တၚ်ဂၞၚ်ဂမၠိုၚ် ဟီုသ္ဂးလဝ်ရ။
စပ်ကဵုကိစ္စဏံတုဲ ၜိုန်ရအာတ်မိက်လဝ်ရုၚ်သမ္မတ သွက်ဂွံကဵုတၚ်သမ္တီကီုလေဝ် ကလေၚ်ဟီုသွဟ်ကဵုလဝ်ဂှ် ဟွံမွဲကၠုၚ်ရ။
ပ္ဍဲဂကောံအလဵုအသဳအခိၚ်လၟုဟ်ဏံဂှ် ညးလုပ်ဗော်နေတ်သ်ဒါန် ပိတၠဂှ် က္ဍိုက်ဒၟံၚ်က္ဍိုပ် ဌာနဝန်ဇၞော်ပရေၚ်တဵုလွဳ၊ ပရေၚ်ဆက်စၠောံ ကေုာံပရေၚ်ထိၚ်ဒဝ်ဆေၚ်ရာကဵုပွဳပွူတအ်ရ။
သာမ်မေတ်သတိုဝ်ဗာ မဒှ်ဇၞော်သ္ကိုပ်သ္က ဗော်နေတ်သဒါန်ဂှ် ၜိုန်ရဗော်ညး သှ်ေၜက်ဒၟံၚ် နဒဒှ်ဂကောံပံၚ်ကောံ ဂွံလဝ်အဝဵုကီုလေဝ် အခေါၚ်ထံက်ဂလာန် သ္ကိုပ်ပရေၚ်အုပ်ဓုပ်ဂျာကာတာတြေံ ဗေတ်သ်ဝဳဒါန် နွံဒၟံၚ်ဏီရဂှ် ဟီုသ္ဂးလဝ်ဏီရ။
“ပ္ဍဲမွဲလပါ်ဂှ်လေဝ် ပိုဲဂှ် ထံက်မံၚ်ဂလာန်ကဵု ပရေၚ်အုပ်ဓုပ်ညး ဍိုက်က်ပေၚ်ၚ်ဖိုဟ်ရ” ဂှ် ညးဟီုသ္ဂးလဝ်ကဵု ရိုက်တာရ။
အခိၚ်လၟုဟ်ဏံ သမ္မတဂှ် ၜိုန်ရဟွံဂွံလလောၚ်တြးလဝ် ညးဆက်ဒုၚ်ကေတ်ဒၞာဲညး ကၠးကၠးတၟးတၟးဏီကီုလေဝ် အတိုၚ်အကံၚ်တၚ်ဂၞၚ်မ္ဂး သ္ကိုပ်ပရေၚ်အုပ်ဓုပ် Central Java ကေုာံ ဝန်ဇၞော်ပရေၚ်စဵုဒၞာ မလုပ်ဂကောံ PDIPတအ်ဂှ် ဒှ်ညးစၞး မၞိဟ်ဒးစိုတ်ဂၠိုၚ်အိုတ်ရဂှ် ဓမံက်ထ္ၜးလဝ်ရ။
Ref,CNA