နေဗျဳဒဝ်၊ ဂျာန္နဝါရဳ (၇)
ပ္ဍဲအရာဒက်ပ္တန်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵု သၞောတ်ဖေဝ်ဒရာ ကေုာံ ဒဳမဝ်ကရေဇြဳဂှ် ၝောံပိုဒ်မဒှ်အဓိကအိုတ် ပ္ဍဲကဵုသၞောဝ်သ္ဇိုၚ်ဒက်ပ္တန်ဂှ် သွက်ဂွံပလေဝ်မာန်ဂးတုဲ ကမ္မတဳပ္ညဳပ္ညပ်ပရေၚ်ၜိုဟ်လလမ်ကံၚ်ဇြဳပၞာန် (NSPNC) ကေုာံ ဂကောံဟွံဂွံထ္ပက်လဝ်စၟတ်တဲဒေါအ်ပန်ပှော် (EAOs) (၃) ဂကောံတံ သဳကၠဳလဝ်ညးသ္ကအ်ဂှ် ပ္ဍဲဂိတုဂျာန္နဝါရဳ (၅) တေံ ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပပ္တံနူဂိတုဂျာန္နဝါရဳ (၅) ဂှ်တုဲ ညးစၞး နူကဵုဂကောံဟွံဂွံထ္ပက်လဝ်စၟတ်တဲဒေါအ်ပန်ပှော်ဂမၠိုၚ် မဒှ်ဗော်ပရေၚ်ညဳသၟဟ်ရး “ဝ” (UWSP) ၊ ဂကောံမဟာမိတ်ဒဳမဝ်ကရေတ်တေတ် ကောန်ဂကူမာၚ်လာ (NDAA) ကေုာံ ဗော်တောတက်ရးသေံ (SSPP) တံ သဳကၠဳဒၟံၚ်ပရေၚ်ၜိုဟ်လလမ် ကုကမ္မတဳပ္ညဳပ္ညပ်ပရေၚ်ၜိုဟ်လလမ်ကံၚ်ဇြဳပၞာန် ပ္ဍဲနေဗျဳဒဝ်ရ။
ပ္ဍဲကဵုပေါဲသဳကၠဳဂှ် ၜါလ္ပာ်ပ္ညဳပ္ညပ် ကုပရူပရာ၊ အစဳဇန်တံဂှ်တုဲ လ္ဂောံကဵုတၚ်တုပ်စိုတ် ပေါဲသဳကၠဳဆဵုဂဗ အလန်ဒုတိယတေံဂှ်တုဲ ပ္ဍဲအလန်တတိယဏံ မွဲလ္ပာ်ကုမွဲလ္ပာ် သဳကၠဳပ္ညဳပ္ညပ်လဝ် တၚ်နွံပၟိက်ပရေၚ်ဍုၚ်ကွာန် ဂကောံတၞဟ်ဟ်တံကဵု ကိစ္စပရူပရာမသၟေဟ်ဒၟံၚ် သွက်ဂွံဆက်သဳကၠဳတံရောၚ်ဂှ် ကံၚ်ဇြဳပၞာန် သ္ဂးလဝ်ရ။
ညးမၞုံအခေါၚ်ဟီုဂး ဗော်တောတက်ရးသေံ (SSPP) ဒုသ္ကိုပ်ဗိုလ်ဇၞော်သာၚ်သုဂှ် ပေါဲသဳကၠဳပရေၚ်ၜိုဟ်လလမ် တ္ၚဲလက္ကရဴအိုတ် သှ်ေဒၟံၚ်ဏီဂှ်ရ သဳကၠဳလှာဲဂတးလဝ် မူအပြောံတံသၟးတုဲ တၚ်သ္ဂုတ်သွာတ်တံ ဟွံစှ်ေဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သဳကၠဳဟီုဂှ် ပိုယ်တံဂှ် မိက်ဂွံဟီု နကဵုဖေဝ်ဒရာဒဳမဝ်ကရေဇြဳတွဵုရ၊ လ္ပာ်ဒပ်ပၞာန်ဂှ်တှ်ေ ဒဳမဝ်ကရေဇြဳဖေတ်ဒရာ၊ ပိုယ်တံဂှ်တှ်ေ ထ္မံက်ဖေဝ်ဒရာကၠာတုဲ အာကဵုဒဳမဝ်ကရေဇြဳဏောၚ်၊ ဒပ်ပၞာန်ဂှ်တှ်ေ ထ္မံက်ဒဳမဝ်ကရေဇြဳတုဲမှ အာဖေဝ်ဒရာဏောၚ်၊ ညအ်ဂှ် တၞဟ်ခြာဒၟံၚ်ညိညရ၊ ဌာနလလောၚ်ပရိုၚ်ဂှ်တှ်ေ လလောၚ်ပ္တိတ်လဝ် အတိုၚ်ဍေံတံရ၊ ဆ္ဂး တၚ်သ္ဂုတ်သွာတ်ကောံဓရီုတံဂှ် ဟွံစှ်ေဏီပုဟ်” သာ်ဝွံ ညးသ္ဂးရ။
သ္အာၚ်နူဂှ်ပၠန် ပ္ဍဲကဵုပရေၚ်သဳကၠဳပွိုၚ်ၜါတ္ၚဲဏံဂှ် စပ်ကဵုကိစ္စထ္မံက်ရုပ်ရဴမာန် ကုပရေၚ်ပညာ၊ ပရေၚ်ထတ်ယုက်၊ ပရေၚ်ဖောအ်ဗြေဝ်ဒေသ မွဲဂကောံတုဲမွဲဂကောံ မသဳကၠဳလဝ် နူကဵုပရေၚ်သဳကၠဳအလန်ဒုတိယတေံဂှ်တုဲ ၜါလ္ပာ်သၠာဲဂတးလဝ် လညာတ်တံလေဝ် နွံဂှ် ဒုသ္ကိုပ်ဗိုလ်ဇၞော် သာၚ်သု ဆက်ဟီုရ။
ဗော်ညဳသၟဟ်ရး “ဝ” (UWSP) ဝွံ ပ္ဍဲဂိတုမေလ္ပာ်အိုတ် သၞာံတုဲကၠုၚ်တေံဂှ် တိုန်စိုပ်လဝ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက်လဝ် အလန်ပထမရ။
လအာတုပ်သာ်ဂှ်ကီု ဂကောံမဟာမိတ် ဒဳမဝ်ကရေတ်တေတ်ကောန်ဂကူမာၚ်လာ (NDAA) မသှ်ေဒၟံၚ်ဂှ်လေဝ် တိုန်စိုပ်သဳကၠဳလဝ် ပ္ဍဲဂိတုဂျောန် သတ္တာဟပထမတုဲ ဗော်တောတက်ရးသေံ (SSPP) ဂှ် တိုန်စိုပ်သဳကၠဳလဝ် ပ္ဍဲဂိတုအဝ်ဂါတ် သတ္တာဟပထမတေံရ။
ညးစၞး နူကဵုဂကောံပိဂကောံ ဟွံဂွံထ္ပက်လဝ်စၟတ်တဲတံဏံဝွံ ပ္ဍဲဂိတုသေပ်တေမ်ဗာ (၂၆) သၞာံတုဲကၠုၚ်တေံ ပံၚ်ကောံဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် အလန်ဒုတိယတုဲ ဗော်တောတက်ရးသေံ (SSPP) ဂှ် ပ္တိုန်ထ္ၜးလဝ် ပရေၚ်ဒက်ပ္တန်တွဵုရးဗမာ သီုကဵုပါလုပ် ပရေၚ်ပလေဝ်သၞောဝ်သ္ဇိုၚ်ဒက်ပ္တန်ကၟိန်ဍုၚ်ဂှ်ကီု၊ သွက်ပရေၚ်ချူခၞံ သၞောဝ်သ္ဇိုၚ်ဒက်ပ္တန်တွဵုရးသေံဂှ်ကဵု သွက်ဂွံဒက်ပ္တန် ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳတံ မဒှ်ရ။
ဆ္ဂး က္ဍိုပ်သ္ကိုပ်ပၞာန် ဒဒှ်ရတးပါဲထောံ လ္တူတၚ်ပ္တိုန်ထ္ၜး သွက်ဂွံဒက်ပ္တန်တွဵုရးဗမာဂှ် ညးမၞုံအခေါၚ်ဟီုဂး SSPP ဒုသ္ကိုပ်ဗိုလ်ဇၞော် သာၚ်သု ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မစကော်ဘိက်လဝ် နူဂိတုဨပရဴလ္ပာ်အိုတ် သၞာံတုဲကၠုၚ်တေံဂှ် ဂကောံ EAOs ထ္ပက်လဝ်စၟတ်တဲ (၇) ဂကောံ ကဵု ဂကောံ EAOs ဟွံဂွံထ္ပက်လဝ်စၟတ်တဲ (၃) ဂကောံတံ တိုန်စိုပ်သဳကၠဳလဝ် စဵုကဵုဂိတုသေပ်တေမ်ဗာလ္ပာ်အိုတ် ၜါဝါကိတ်တ်တုဲ ပ္ဍဲကဵုဂိတုဒဳဇြေမ်ဗာကြပ်အိုတ်ဂှ် ဂကောံထ္ပက်လဝ်စၟတ်တဲ ဒေါအ်ပန်ပှော် (EAO) (၅) ဂကောံတံ ထပ်သဳကၠဳလဝ် အလန်တတိယရ။
ပရိုၚ်−သြၚ်လောန်တိုၚ်(မ်)