မတ်မလီု၊ ဂျာန္နဝါရဳ (၇)
ပ္ဍဲပရေၚ်ပၠန်ဂတးက္ညၚ် မမံက်ဂတဝ်ကၠုၚ် ဟိုတ်ပရေၚ်သီအဝဵု ဟွံဗဗွဲဓဝ် သ္ပပဓာန်ကဵုလွဟ်လက်နက်တံဂှ် ပ္ဍဲဍုၚ်မတ်မလီု ဍုၚ်ဇၞော် တွဵုရးဍုၚ်မန်ဂှ် စဳကၠုၚ်ဒၟံၚ် နကဵုဗာတံ၊ ကလာပ်တံရ။
ကၠာဒပ်ပၞာန်ဟွံဂွံသီအဝဵုဏီ ပ္ဍဲမတ်မလီု ဗာတံ၊ ကလာပ်တံ ဟွံမွဲလဝ်ဂှ် ကြဴနူဒပ်ပၞာန်သီအဝဵုတုဲဂှ် ဗာတံ၊ ကလာပ်တံ မံက်ကၠုၚ်ဒၟံၚ် မွဲတုဲမွဲရ။
ကံၚ်ဇြဳပၞာန်ဝွံ ကြဴနူသီအဝဵုတုဲဂှ် ဖျေံကဵုဒၟံၚ် အခေါၚ်ကၠောန်ကမၠောန် ပံက်ဗာ၊ ပံက်ကလာပ် ကုညးမၞုံပၟိက် မိက်ဂွံဓလိုက်တမ်ရိုဟ်တံ ကေုာံ ကုတၠကမၠောန် မစုက်လုက်ကဵုဍေံတံဂှ် ဟွံပိုတ်သ္ကုတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ကံက်ဂွံလဝ်ဂှ်မ္ဂး ကြဴနူဒပ်ပၞာန်သီအဝဵုတုဲဂှ် ပ္ဍဲဍုၚ်မတ်မလီု ပံက်ကၠုၚ်လဝ် ဗာတံ၊ ကလာပ်တံ ဟွံအောန်နူကဵု (၁၀) မတုဲ လၟေၚ်တ္ၚဲ လဟိၚ်ဒၟံၚ် နကဵုသၟတ်သၟာဒဳဂျေတံနွံတုဲ သၟာဒယှ်ေဒွက်ဒယှ်လ္ၚဵုတံလေဝ် ကၠုၚ်စိုပ်လဟိၚ်ဒၟံၚ် မွဲဏှမွဲဏှရ။
သၟတ်မန်မွဲတၠဂှ် ကံၚ်ဇြဳပၞာန် ကဵုအခေါၚ်ပံက်ဗာတံ ကလာပ်တံဂှ်ဝွံ ဖန်ဗဒှ်ဒၟံၚ်ဗီုပြၚ် ပ္ဍဲတွဵုရးဍုၚ်မန် မုမှဟွံဒှ်ဂှ်ကီု၊ ပရေၚ်ဍုၚ်ကွာန်လၟုဟ်ဝွံ ဟိုတ်နူနွံဒၟံၚ် ကဆံၚ်ပရေၚ်ပၠန်ဂတးညိကီုဂှ်ရ အာဟွံထေက်ပုဟ်ဂှ် ဟီုရ။
“တွဵုရးဍုၚ်မန် ညံၚ်ရဴမုဟွံဒှ်ဒၟံၚ်ဂှ် ဍေံတံ ကၠောန်ဒၟံၚ်ရ၊ အခိၚ်ဏံဂှ် သွက်ဂွံပံက် Bar ဂှ် မၞိဟ်အဆက်နွံကဵုဍေံတံမှ ဒှ်ဒၟံၚ်ဗီုပြၚ် ပံက်မာန်ဏောၚ်၊ ဟိုတ်ဂှ်ရ ပယောဂဍေံတံလေဝ် ဟွံဗၠးပုဟ်ဂှ် ညာတ်ရ၊ မွဲပၠန်ဂှ် သၟတ်ဗွဲမဂၠိုၚ်ဂှ်လေဝ် ဒှ်ဒၟံၚ်ကောန်ၚာ်တံ ဂၠိုၚ်ဒၟံၚ်ဏောၚ်၊ အဓိကတက္ကသိုလ်ပံက်ဒၟံၚ်ဟီုတှ်ေ ဗွဲမဂၠိုၚ်ဟီုဂှ် ကောန်ၚာ်ရ၊ တုဲတှ်ေ အခိၚ်ဏံ ပ္ဍဲမတ်မလီု အကာဲအရာဗီုပြၚ်မုဟွံဒှ်ဒၟံၚ်တံ နွံဒၟံၚ်ဟီုတှ်ေ သွက်ဍေံတံ ဒှ်အခေါၚ်ခိုဟ်ရ၊ အဓိက ဂကူမန်ပိုယ်တံဟီုမ္ဂး သၟတ်မန်တံလေဝ် သွက်ဂွံတီတာလျိုၚ် ပရေၚ်ဂကူဇကုဂှ်ကီု၊ မွဲပၠန်ဂှ် သၟတ်မန်ပိုယ်တံ ဗွဲမဂၠိုၚ်ဂှ် ဍုက်အာကဵု ပရေၚ်ပၠန်ဂတးတံအိုတ်ယျ၊ ဟိုတ်ဂှ်ရ လ္ၚဵုညာတ်ဒၟံၚ် ပကောံမၞိဟ်တုဲ အာ Bar တံဏောၚ်၊ ပ္ဍဲကဵုဏံ ညးဗြဴတံလေဝ် ပါဂၠိုၚ်ဒၟံၚ်ဂှ် ဂွံဆဵုကေတ်ရ၊ လၟုဟ်ဂှ် ပရေၚ်ဍုၚ်ကွာန်ဂှ် နွံမံၚ် ပ္ဍဲကဆံၚ်ပရေၚ်ပၠန်ဂတးညိကီုဂှ်ရ ဒှ်အကာဲအရာ အာဟွံထေက်ပုဟ်ဂှ် ညာတ်ကေတ်ရ” သာ်ဝွံ သ္ဂးရ။
ဗာ၊ ကလာပ် ဍုၚ်မတ်မလီုတံဝွံ စဵုကဵုဒးပံက် ပါ်အခိၚ် ဗ္တံ၊ တ္ၚဲဂှ် မၞိဟ်ကၠုၚ်စိုပ်တံ ဂၠိုၚ်ဒၟံၚ်တုဲ ပ္ဍဲတ္ၚဲသ္ၚိသဝ် ကဵု အဒိုတ်တံဟီုမ္ဂး မၞိဟ်စဳ စဵုကဵုပေၚ်အာ ဗာ၊ ကလာပ်တံရ။
သၟတ်မန်မွဲတၠဂှ်လေဝ် ကံၚ်ဇြဳပၞာန်ဂှ် ကၠောန်သ္ပဒၟံၚ် ဍုၚ်မတ်မလီု ညံၚ်ရဴၜိုဟ်လလမ်ဒၟံၚ်တုဲ ညးသၟတ်ဒေသ ဗွဲမဂၠိုၚ်ဂှ်ဝွံ ဗၠိုက်လုပ်ဒၟံၚ် ပ္ဍဲဓနက်ကံၚ်ဇြဳပၞာန် မပြံၚ်အာရီုတံဂှ်တုဲ ထေက်ကဵုဒးညှာစိုတ် ကုတွဵုရး ကေုာံ ရးဒေသတၞဟ်ဟ်တံရောၚ်ဂှ် သ္ပလဝ်တၚ်စၟတ် ဟီုဂးလဝ်ရ။
“ပ္ဍဲဍုၚ်မတ်မလီုဂှ်တှ်ေ ကလေၚ်ဒှ်ဒၟံၚ် သၞောတ်တြေံဂှ် တၟာလအ်ရ၊ ယဝ်ရ ဒးၜတ်ကၞာတ်ကဵု တွဵုရးတၞဟ်ဟ် မသှ်ေတံဂှ်မ္ဂး ဍုၚ်မတ်မလီု တွဵုရးဍုၚ်မန်ဂှ် ပၞာန်လေဝ် ဟွံဒှ်ပုဟ်၊ မုမှဟွံဒှ်ပုဟ်၊ ပလဝ်ပၞ ညံၚ်ကဵုၜိုဟ်သြိုဟ်ဒၟံၚ်ကွေံကွေံ ဒပ်ပၞာန်ဂှ်လေဝ် မိက်ဂွံဂွံ မဏံရ၊ ဟီုမ္ဂး ဒပ်ပၞာန်ဂှ်လေဝ် သွက်သ္ဂောံကလိဂွံဗီုဏံဂှ် ကၠောန်ဒၟံၚ်ပေါဲသ္ဘၚ်တံ မွဲတုဲမွဲရ၊ ပ္ဍဲကဵုဂှ် ညးသၟတ်တံလေဝ် အာကီုရ၊ ဇြဟတ်အလုံသၟတ်မွဲဂှ် ဟွံပါကၠုၚ်ရပုဟ်၊ ပ္ဍဲကဵုပရေၚ်ပၠန်ဂတး မဒှ်ဒၟံၚ်လၟုဟ်တံဂှ် နကဵုညးသၟတ်တံ ဗၠိုက်လုပ်အာဒၟံၚ် ပ္ဍဲဓနက် ကံၚ်ဇြဳပၞာန် မပြံၚ်အာရီုတံ သိုက်က်ဂှ် ဟီုဂွံရ၊ လအ်ကၠုၚ်တှ်ေ မၞိဟ်ကၠောန်ဒၟံၚ်ပရေၚ်ပၠန်ဂတးဂှ်ရ ဒှ်ကၠုၚ်ညံၚ်ကဵုဒှ်ဒၟံၚ်ဒုဟ်၊ နကဵုသၟတ်တံ ရံၚ်ကဵုတွဵုရး ရးဒေသတၞဟ်ဟ်တံတုဲ ဒးညှာစိုတ်ထေက်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုဒၞါဲဌာန်ဒေသ အပ္ဍဲကၟိန်ဍုၚ်ဗွဲမဂၠိုၚ်ဂှ် သၟတ်ဗွဲမဂၠိုၚ် ဟိုတ်နူလုပ်ဒၟံၚ်ပေါဲဗ္တိုက် သွက်သၞောတ်တၠအဝဵု ဂွံသရိုဟ်စှ်ေဂှ်ရ နကဵုညးသၟတ်ဒေသတံ ဖအောန်ကၠေံ ပရေၚ်မိပ်တံတုဲ မိက်သ္ဂောံကဵုသ္ပအာရီု ပ္ဍဲပရေၚ်ပၠန်ဂတးဂှ် ညးသ္ဂးရ။
ဗာ၊ ကလာပ် နူအပ္ဍဲဍုၚ်မတ်မလီုတံဂှ် ဂကောံဇြဟတ်ပၠန်ဂတးတံလေဝ် ကဵုဒၟံၚ်သတိ ဗ္တိုဟ်မံၚ်မာၚ်တံ ကၠောန်ၜိုတ်ဒၟံၚ် မွဲဏှမွဲဏှကီုလေဝ် မၞိဟ်မကၠုၚ်စိုပ် ပ္ဍဲဗာ၊ ကလာပ်တံဂှ် စဳဒၟံၚ် ဟွံပိုတ်သ္ကုတ်ရ။
ပရိုၚ်−သြၚ်လောန်တိုၚ်(မ်)