ကျာ်ထဝ်၊ ဂျာန္နဝါရဳ (၈)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဒၟာနူကံၚ်ဇြဳပၞာန် ပန်ဖျေံဏာလဝ် လွဟ်ဇၞော် ပ္ဍဲကွာန်လှေဝ်လာန်ကူ ပ္ဍဲဂိတုဂျာန္နဝါရဳ စၟတ်တ္ၚဲ (၆) အခိၚ်ဗ္တံဂှ်တုဲ ကောန်ကွာန် ၂ တၠဇီုကပိုက်ဒးတုဲ က္လိဂွံလဝ်ဘဲဝပ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ် (မ်) ရ။
ပ္ဍဲတ္ၚဲဂှ် အခိၚ်ဗ္တံ ၜိုတ် (၈) နာဍဳဂှ် နူကဵုတံဒပ်ပၞာန်တိုက် ခမရ (၂၀၇) ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဍုၚ်တုၚ်ဇြယာတ်ဂှ် ပန်ဖျေံဏာလွဟ်ဇၞော် ပ္ဍဲကွာန်လှေဝ်လာန်ကူကြာန်န် ဟွံအောန်နူ (၁၀) ဝါရ။
ပ္ဍဲကဵုလွဟ်ဇၞော် ကံၚ်ဇြဳပၞာန် ပန်ဖျေံဏာလဝ်ဂှ် မကမ်လွဟ်ဇၞော်( ၂ )မ ဒတုံစှ်ေလဝ် ပ္ဍဲကွာန်လှေဝ်လာန်ကူတုဲ ပါ်ခတိုဟ်အာရ။
မကမ်လွဟ်ဇၞော် ကံၚ်ဇြဳပၞာန်ဂှ် ဟိုတ်နူဒတုံပြဟ်စှ်ေလဝ် ပ္ဍဲလတူသ္ၚိဥူကျဝ်မျေအ် ဒၟံၚ်ကွာန်လှေဝ်လာန်ကူတုဲ ဥူကျဝ်မျေအ် ဂွံအာယုက် ၆၀ သၞာံ ကေုာံသၟတ်ဗြဴ အာယုက် ၁၇ သၞာံမွဲတၠ က္လိဂွံလဝ် ဘဲဝပ်ရ။
ညးဒေသ ကောန်ကွာန် ဒးလဝ်လွဟ်ဇၞော် ဂွံလဝ်ဘဲဝပ်တအ်ဂှ် ပလံၚ်ဗစိုပ်ဏာလဝ် ရုၚ်ဂဥုဲကျာ်ထဝ်ရဂှ် ဂွံတီကေတ်ရ။
ပ္ဍဲဂိတုဒဳဇြေမ်ဗာ တုဲကၠုၚ်တေံဂှ် ဟိုတ်နူကံၚ်ဇြဳပၞာန် ပန်ဖျေံဏာ လွဟ်ဇၞော် ပ္ဍဲကွာန်မၞုံပ္ဍဲပွိုၚ်ဍုၚ်ကျာ်ထဝ်တုဲ သ္ၚိဒၟံၚ်ညးဒေသ (၁၄) မ ဒးလီုလာ်ကၠုၚ်လဝ်ရဂှ် ဗော်သွးကောန်ဂကူကရေၚ် KNU လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)