မတ်မလီု၊ ဖေဖဝ်ဝါရဳ (၈)
ပ္ဍဲမတ်မလီု၊ တွဵုရးဍုၚ်မန်ဂှ် ဟိုတ်နူတၚ်လလောၚ်ပ္တိတ် ကမၠောန်တြးဇြဟတ်ဓာတ်ပၟတ် ကံၚ်ဇြဳပၞာန်တံ မွဲဝါမ္ဂး ပါ်ပရအ်ကဵုပၟတ် နကဵုသၞောတ်ဒးအလန် ပွိုၚ် (၂) နာဍဳဓဝ်ရမာန်ဂှ်တုဲ သာတုဲ ဒးဂဗကၠုၚ်အခက်အခုဲမာန်ရောၚ်ဂှ် ရဲဒေသလ္တူဍုၚ်တံကဵု တၠကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်တြးဇြဟတ်ဓာတ်ပၟတ် ပွိုၚ်ဍုၚ်မတ်မလီု ကံၚ်ဇြဳပၞာန်ဂှ် ပ္ဍဲအရာပါ်ပရအ်တြးကဵုပၟတ်တံဂှ် လ္တူဍုၚ်မတ်မလီုကဵု ပ္ဍဲအရာပ် ပ္ဍဲကွာန်တံဂှ် ပါ်ပိဂကောံတုဲ မွဲဝါမ္ဂး (၂) နာဍဳ၊ မွဲတ္ၚဲ (၄) ဝါ တြးအာကဵုပၟတ်ဓာတ်လလဳတံရောၚ် ပ္ဍဲဂိတုဖေဖဝ်ဝါရဳ (၇) တေံ လလောၚ်ပ္တိတ်လဝ်ရ။
အတိုၚ်ဒဒှ်မတြးပါ်ပရအ်ကဵု ပၟတ်ဓာတ်လလဳတံဂှ်မ္ဂး ညးဍုၚ်ကွာန်ဒေသမတ်မလီုတံဝွံ မွဲတ္ၚဲမ္ဂး ဂွံပၟတ် ၜိုတ်အခိၚ် (၈) နာဍဳဓဝ်ရ မဒှ်တုဲ တန်တဴကဵု လ္တူမကလိဂွံဇြဟတ်ဓာတ်တံဂှ်တုဲ အခိၚ်ကဵုဇြဟတ်ဓာတ်လလဳတံ အပြံၚ်အလှာဲနွံမာန်ရောၚ်ဂှ် ကမၠောန်တြးဇြဟတ်ဓာတ်လလဳတံ သ္ဂးလဝ်ရ။
ညးဒေသမတ်မလီုမွဲတၠဂှ် မွဲတ္ၚဲ ခြာၜါနာဍဳတုဲမှဟေၚ် ဟိုတ်နူဂွံကၠုၚ်ပၟတ်ဂှ်ရ မ္ၚးနူဍုန်တိုပ်ဂှ် ကမၠောန်တၞဟ်ဟ်တံလေဝ် သ္ကဵုလဇုဲလဇကၠေံတုဲ ဂတနူဏံ ဂွံဒၟံၚ်ပၟတ်ဓာတ်လလဳဏီဟာဂးတုဲ ဒှ်ဒၟံၚ်သ္ဇက်ဒးပ္တိတ်သၟာန်ရောၚ်ဂှ် သ္ဂးရ။
“မွဲတ္ၚဲ ကၠုၚ် (၂) နာဍဳဟီုမ္ဂးလေဝ် မၞိဟ်ဒးဍုန်ပုၚ်တံ ကမၠောန်မ္ဒးကၠောန်ကဵုပၟတ်တံဏံ လၟေၚ်ၚ်တ္ၚဲတံသီုဖအိုတ် လဇုဲလဇအာအိုတ်ဏောၚ်။ ဇိၚ်စက်ပၠန်ဂှ်လေဝ် မွဲတ္ၚဲ လၟေၚ်ၚ် ဒၞါဲဇိၚ်မံၚ် (၁၀) ဂတှ်ေဂှ် ၜိုတ် (၅) ဂတှ်ေရ ဂွံဇိၚ်ရဏောၚ်။ ပိုယ်တံဂှ် ကၠိုဟ်တ္ၚဲဍောၚ်ၜိုတ်တုဲ စိုပ်ဗ္တံမှ ဂွံတိက်ၜိုဟ်ဟ်သြိုဟ်ဟ်လေဝ်။ ခြာၜါနာဍဳတုဲ ကၠုၚ်မ္ဂး ဂွံတိက်အခိၚ်ဗ္တံဂှ်လေဝ် ခက်ခုဲညိညဏောၚ်။ ပ္ဍဲလက်ထက်အလဵုအသဳဏံဂှ်တှ်ေ အတိုၚ်ဏံရ ဂွံပရေံနူဏံရ နွံ။ ဂွံခိုဟ်နူဏံဂှ် ဟွံမွဲပုဟ်။ ကၠောန်ဒၟံၚ် ဗီုဏံရဏောၚ်လေဝ်။ လက္ကရဴတှ်ေ ပၟတ်ဂွံကၠုၚ်ဂှ် နွံမံၚ်ညိဏီဟာ။ လၟုဟ်ရဂှ် ဒှ်မံၚ် (၂) နာဍဳ (၂) နာဍဳဟီုတှ်ေ။ ဍာံဍာံဂှ် ဇြဟတ်ပၟတ်ဓာတ်လလဳဂှ် ပ္ဍဲကဵုဗ္ၜတ်အလုံဍုၚ်မွဲဂှ် ဇြဟတ်ကဵုလဝ် ပွိုၚ်ဍုၚ်တံဂှ် တုပ်ပ်ရဏောၚ်၊ ဘာသာဍေံတံ ကၠတ်လဝ်ၚုဟ်ပၟတ်တံဂှ်ဟာ၊ ပ္ဍဲတဲဍေံတံဂှ် မုမှကၠောန်ဟွံဂွံပုဟ်” သာ်ဝွံ သ္ဂးရ။
အခိၚ်လၟုဟ်ဂှ် ညးဍုၚ်ကွာန်တံဝွံ အခိၚ်ပၟတ်ဓာတ်လလဳပၠိုတ် သာလအ်ကၠုၚ်ဂှ်ရ ပ္ဍဲအရာဍုန်တိုပ်တံဂှ် မ္ၚးနူကဵုအှော်၊ ချး ကေုာံ သၟုဟ်ဓာတ်တံဂှ် အခိၚ်ဗ္တံတံဂှ်လေဝ် ဒးသုၚ်စောဲကၠုၚ် သီုကဵုမပၟတ်ဒးပၠောပ်ဇြဟတ်တံကဵု ပၟတ်ပၞာၚ်တံဂှ်တုဲ ကမၠောန်သ္ၚိညိညတံဂှ်လေဝ် ဒးရာန်သုၚ်စောဲဒၟံၚ် ပၟတ်စက်တံ အဓိကရ။
တၠကမၠောန် SME မွဲတၠဂှ်လေဝ် ဟိုတ်နူပၟတ်ဓာတ်လလဳဟွံမှာန်တုဲ ၜိုတ်ထေၚ်လဝ်ဂှ် ကလောန်ဟွံတုဲတုဲ ကမၠောန်ဗွဲမဂၠိုၚ် ဒးဖအောန်ဖျေံ ကၠောန်ၜိုတ်ဒၟံၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကမၠောန်တံဂှ်တှ်ေ စိုပ်ကၠုၚ်ရာသဳဗြဲကျာတၟးဇးတံယျဟီုမ္ဂး ကမၠောန်တံ ဂၠိုၚ်ကၠုၚ်ကီုလေဝ် ပၟတ်ဂှ် ပၠိုတ်ဒၟံၚ်အဆက်က်တုဲ ၜိုတ်ထေၚ်လဝ်ဂှ် ကလောန်ဟွံတုဲပုဟ်။ လုကဴကၠောန်သ္ပကဵု ပၟတ်ဏံ ညံၚ်ဂွံမှာန် လ္တူနူကဵုဓမ္မတာ ဟွံမာန်မ္ဂး SME တံဂှ်တှ်ေ ဒှ်အခက်အခုဲကွေံကွေံဏောၚ်။ အဓိကဂှ် SME တံသီုဖအိုတ်ဂှ်လေဝ် ပတှ်ေပၟတ်တုဲ ကၠောန်ဒၟံၚ်အိုတ်ဟီုမ္ဂး ဒှ်ဒၟံၚ်ဗီုဏံရ။ ပၟတ်ဟွံကၠုၚ်တုဲ ဒဳဇြေဝ်တံဂှ်လေဝ် ၜိုတ်ထေၚ်လဝ်ဂှ် ဟွံစှ်ေကၠုၚ်ပုဟ်။ ဒဵုကဵုအခိၚ်လၟုဟ်ဂှ် ဗီုလဵုမှဟွံပြေပြံၚ်ပုဟ်လေဝ်။ ၚုဟ်ကၠေၚ်တံလေဝ် စှ်ေဏောၚ်၊ ပၟတ်လေဝ် လ္တူနူကဵုဓမ္မတာဂှ် သာမှာန်ကၠုၚ်ဏောၚ်ဟီုမ္ဂး SME တံဂှ် ဗြေဝ်တိုန်တၟာဂလိုၚ်ဏောၚ်။ ၜိုတ်ဗၞိက်ပ္တိတ်ပၟိက်ဇၞော်တံသၟးရ ကဵုက္ဍိုပ်ပ္တိတ်ဒၟံၚ်တုဲ မဓမ္မတာတံဂှ်တှ်ေ ယှအ်တုဲဒးကၠောန်ဒၟံၚ်ရ။ ယဝ်ရကၠောန်ကဵုပၟတ်မှာန်န်တံမာန်မ္ဂး မွဲတ္ၚဲ ဂွံဒၟံၚ် ၜိုတ် (၅၀) မ္ဂး လၟုဟ်တှ်ေ ၜိုတ် (၂၀) ရ ပ္တိတ်မာန်ရဏောၚ်။ ဒှ်အာဗီုဏံရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာကၠောန်ၜိုတ်ကမၠောန်တံဂှ်လေဝ် ဂွံပၟတ်ဓာတ်လလဳ မွဲအဆက်ဓဝ်ဟွံသေၚ်တုဲ ခြာကဵုသ္ကုတ်အခိၚ်တုဲ ဟိုတ်နူဂွံမံၚ်ဂှ်ရ သွက်ကမၠောန်ဂွံဂြိပ်ဂှ် အခက်အခုဲနွံမံၚ်တုဲ သုၚ်စောဲပၟတ်စက်တုဲ ဒးဂေတ်ဂြိပ်ဒၟံၚ်ဂှ်ရ ခရိတ်အိုတ် သာသၠုၚ်တိုန်ကၠုၚ်မာန်ရောၚ်ဂှ် သ္ဂးရ။
အခိၚ်လၟုဟ်ဂှ် ဟိုတ်နူအခက်အခုဲ ကလိဂွံပၟတ်ဓာတ်လလဳတံဂှ်ရ ကမၠောန်အဇာဍောတ်၊ အဇာဇၞော်ဗွဲမဂၠိုၚ်ဝွံ ဒးဖအောန်ဖျေံကၠုၚ် ကမၠောန်တံနွံတုဲ ကမၠောန်လ္ၚဵုတံဂှ် ဟိုတ်နူအကာဲအရာပၟတ်ဓာတ်လလဳတုဲ ကမၠောန်ဂေတ်ဂြိပ်အတိုၚ်သၞောတ်တြေံဟွံမာန်ဂှ်ရ ဒးဒေါအ်ဇူထောံတံ နွံဒၟံၚ်ရောၚ်ဂှ် တၠကမၠောန် SME တံ သ္ဂးအိုတ်ရ။
ပၟတ်ဓာတ်လလဳတံဝွံ ကြဴနူဒပ်ပၞာန်သီအဝဵုတုဲဂှ် ဟွံဂွံမှာန်န် ဗီုကၠာတေံရတုဲ မွဲဏှမွဲဏှ ပိုတ်ပၠိုတ်တံ က္တဵုဒှ်ဒၟံၚ်တုဲ ပါ်ပရအ်တြးကဵုနကဵုအလန် ကဵုသ္ကုတ်အခိၚ်ရောၚ် လလောၚ်တြးလဝ်ကီုလေဝ် ဟိုတ်နူအခိၚ်မှာန် ဟွံမွဲဂှ်ရ ဒးဂဗဒၟံၚ်အခက်အခုဲတံရ။
အတိုၚ်လိက်ဒုၚ်စဳရေၚ် တိုက်သြန်ဂၠးတိ မလလောၚ်တြးလဝ် ပ္ဍဲဂိတုဂျာန္နဝါရဳ (၃၀) တုဲကၠုၚ်တေံဂှ်မ္ဂး ဟိုတ်နူပဋိပက္ခ မက္တဵုဒှ်ဒၟံၚ် ပ္ဍဲဍုၚ်ဗၟာတံ၊ ပၟတ်ဓာတ်လလဳ ပိုတ်ပၠိုတ်ပရေံပရေံတံ ကေုာံ ဟိုတ်နူမူဝါဒအပြံၚ်အလှာဲတံဂှ်တုဲ အရာမဇီုကပိုက် လ္တူပရေၚ်ပိုန်ဒြပ်ကၟိန်ဍုၚ်ဗၟာတံ ဆက်နွံဒၟံၚ်တုဲ ဂျဳဒဳပဳ မၞိဟ်မွဲမွဲဂှ် စိုပ်ဒၟံၚ် သၟဝ် (၁၃) တၟံကၠံ ကၠာကာလကဝ်ဝေဒ်ဂွိုအ်ဒှ်တေံရောၚ်ဂှ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)