တၞၚ်သဳ၊ ဖေဖဝ်ဝါရဳ(၈)
ပ္ဍဲရးဒေသဇၞော်တၞၚ်သဳ နူကဵုသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီကေတ်လဝ်အဝဵုတုဲ စဵုကဵုဂိတုဂျာန္နဝါရဳ သၞာံဏံအိုတ်ဂှ် ပရေၚ်ညးဍုၚ်ကွာန်တအ် ဒးချိုတ်လဝ်စဵုကဵု ၃၆၀ ပြၚ် နွံကၠုၚ်ဒၟံၚ်ယျဂှ် Southern Monitor မဒှ်ဂကောံသုတေသန လလောၚ်တြးလဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၇) ဂှ်ရ။
ကောန်အရာပ်ညးဍုၚ်ကွာန်တအ်ဂှ် ဇီုကပိုက်ဒးလွဟ်ဇၞော်တုဲ ပ္ဍဲပေါဲဗတိုက်ၜါလပါ် ဒးချိုတ်အာကီု၊ ဒပ်ကံၚ်ဇြဳပၞာန် ကေုာံဂကောံပျူသဝ်ထဳ သၟဝ်တဲကံၚ်ဇြဳပၞာန်တအ် ရပ်ဒက်တုဲ ပြိုက်ဂစိုတ်လဝ်ကီု၊ နကဵုတၚ်ထ္ၜးဟိုတ်ပရေၚ်ဂီုကၠီုတုဲ ပရေၚ်ပန်ပှ်ော သီုဟိုတ်ဟၟဲမွဲသာ်ကီု။ ဟိုတ်နူဂကောံဇြဟတ်ပရေၚ်ပၠန်ဂတးတအ် ပသောၚ်သ္အးဒလာန်တုဲ ဒးချိုတ်ဒၟံၚ်ကီုရ။
ပ္ဍဲကဵုဂှ်မ္ဂး ဂိတုဂျာန္နဝါရဳ တုဲကၠုၚ်ပွိုၚ်မွဲဂိတုဂှ် ကောန်အရာပ် (၂၅)တၠ ဒးချိုတ်လဝ်တုဲ (၈)တၠ ဂွံလဝ်ဘဲဝပ်ကီု ဗ္ၜတ်ကောန်အရာပ်ညးဍုၚ်ကွာန် ဒးဇီုကပိုက်ဒၟံၚ်ဂှ် ဆက်သၠုၚ် ဂၠိုၚ်တိုန်ဒၟံၚ်ဖိုဟ်ဏီရဂှ် Southern Monitorဟီုသ္ဂးလဝ်ရ။
ပ္ဍဲမွဲပွိုၚ်သီအဝဵုဏံ ပ္ဍဲရးဒေသဇၞော်တၞၚ်သဳ ဟိုတ်နူဒပ်ကံၚ်ဇြဳပၞာန် ကေုာံဂကောံသၟဝ်တဲကံၚ်ဇြဳပၞာန်တအ် စံၚ်ပလီုလဝ်တုဲ သ္ၚိဒၟံၚ်ဗ္ဒာဲ (၂၃၀)မ ဒးဒုၚ်စံၚ်ပလီုလဝ်နွံတုဲ ပ္ဍဲဂိတုဂျာန္နဝါရဳဂှ် သ္ၚိဒၟံၚ် (၃၃)မ ဒးဒုၚ်စံၚ်ပလီုကၠုၚ်လဝ်ရ။
ပ္ဍဲကဵုဂိတုဂျာန္နဝါရဳဂှ်မ္ဂး ပ္ဍဲရးဒေသဇၞော်တၞၚ်သဳ ပေါဲဗတိုက်ၜါလပါ် အပံၚ်လၟိဟ် (၃၃) ဝါ က္တဵုဒှ်လဝ်တုဲ ဟိုတ်နူပေါဲဗတိုက်ဂှ် ညးဍုၚ်ကွာန်ကောန်ညးဒေသတအ် (၇၀၀၀)တၠပြၚ် ဒးသၠးထောံသ္ၚိဌာန် ဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံ Southern Monitor ရ။
ပ္ဍဲကဵုညးဍုၚ်ကွာန် ဒးပါဲဒဴဒၟံၚ်ဘဲပၞာန်တအ်ဂှ် နွံပၟိက်ဒၟံၚ်ကဵု အရီုဗၚ် ဇွောံမသကှ်၊ ကၟဳဗ္ဒၚ် ကေုာံပလောံၜိုဟ်တအ်ဖိုဟ်ဏီတုဲ ဟိုတ်နူပရေၚ်ဒပ်ကံၚ်ဇြဳပၞာန် ပိုၚ်ခြာကၟာတ်လဒဵုလဝ်တုဲ သွက်ဂွံက္လိဂွံအရီုဗၚ်ထ္ၜလဘာ်ပရေၚ်မၞိဟ်မာန် သ္ၚောဲခြာဒၟံၚ်ဏီရဂှ် ဂကောံ Southern Monitor လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)