သာန်တောၚ်၊ ဖေဖဝ်ဝါရဳ(၈)
တွဵုရးကရေၚ်၊ ပ္ဍဲဍုၚ်သာန်တောၚ် ၁၃ မာၚ်ဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန်တုဲ လုပ်စိုပ်ချဳဒရာၚ်ဒၟံၚ်ပရေၚ်ပၞာန်ရဂှ် ဂွံတီကေတ် အတိုၚ်ညးဒေသတအ် ဟီုသ္ဂးလဝ်ရ။
ပ္ဍဲဍုၚ်သာန်တောၚ် (၁၃) မာၚ် မဒှ်တိဍာ်ဗော်သွးကောန်ဂကူကရေၚ် KNU ဒပ်မဟာ (၂)ဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၂၇) ဂှ် နူလပါ်ဂကောံဇြဟတ်ပရေၚ်ပၠန်ဂတးတအ် ကၠုၚ်စိုပ်ပန်ပှော်လဝ် ဒပ်ကံၚ်ဇြဳပၞာန် နကဵုသနိုက်ဗာတုဲဂှ် ပေါဲဗတိုက်ၜါလပါ် က္တဵုဒှ်လဝ်တုဲ ဒပ်ကံၚ်ဇြဳပၞာန် ပန်ဖျေံဏာလွဟ်ဇၞော်ဍောတ် ပ္ဍဲကဵုဍုၚ်သာန်တောၚ်ရ။
ဟိုတ်နူဒပ်ပၞာန် ပန်ဖျေံဏာလွဟ်ဇၞော်ဍောတ်ဂှ်ရ ကောန်ဒေသ ညးဍုၚ်ကွာန် မၞုံပ္ဍဲဍုၚ်သာန်တောၚ် ဗ္ဒာဲ(၈၀၀၀) တၠတအ် ဒးဂြိပ်ပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ ဟိုတ်နူလွဟ်ဇၞော်ဂှ် သ္ၚိဌာန်ညးဒေသတအ်ကီု သီုကဵုဘာကျာ်တအ် ဇီုကပိုက်ဒးလီုလာ်လဝ်ကီု သ္ၚိဒၟံၚ်လ္ၚဵုတအ်ဂှ်လေဝ် ဒပ်ကံၚ်ဇြဳပၞာန် ပလီုပလာ်ဏာလဝ်ရ။
ဍုၚ်သာန်တောၚ် အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်ဂှ်ကီု သီုကဵုပွဳပွူဒေသဂှ် ပ္ဍဲအကြာမွဲၜါတ္ၚဲဏံ ဟိုတ်နူဒပ်ကံၚ်ဇြဳပၞာန် ထပ်ဂလိုၚ်ပတိုန်လဝ် ဇြဟတ်ဒပ်တုဲ ကၠောန်ကၠုၚ်ပရေၚ်ချဳဒရာၚ်ပၞာန်ဂှ်ရ ပရေၚ်ပၞာန်သာတုဲ ကြံၚ်မ္ၚိုဟ်သ္ကာတ်မြဟ်ကၠုၚ်ဒၟံၚ်ရဂှ် ဂွံတီကေတ် နူဂကောံဇြဟတ်ပရေၚ်ပၠန်ဂတးတအ်ရ။
ဟိုတ်နူလပါ်ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ အကာဲအရာဟွံညိၚ်ဝတ်ဏီဂှ်ရ ညးဍုၚ်ကွာန် ဒးဂြိပ်ဒဴဒၟံၚ်တအ်ဂှ် ဟွံဂံၚ်ကလေၚ်စဴကၠုၚ် ဌာန်ဒၟံၚ်ဏီကီု ပ္ဍဲလတူဍုၚ်လေဝ် မၞိဟ်အောန်လောန်ဒၟံၚ်ကီုရဂှ် ညးဒေသပါဲဓလေတ်ပၞာန်မွဲတၠ ဟီုသ္ဂးလဝ်ရ။
ပ္ဍဲမွဲၜါတ္ၚဲတုဲကၠုၚ်တေံဂှ်လေဝ် ပ္ဍဲဂၠံၚ်ကွဳစက် တံၚ်ၚူ-သာန်တောၚ် (၁၃) မိုၚ်ဂှ် ဟိုတ်နူရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်တံၚ်ခတိုဟ်လဝ်မာၚ်တုဲ ဒပ်ကံၚ်ဇြဳပၞာန် စံၚ်ပလီုလဝ် သ္ၚိဌာန်ညးတာလျိုၚ် KNU မၞုံပ္ဍဲဍုၚ်သာန်တောၚ်တုဲဂှ် နူဂှ်မွဲကဆံၚ် သ္ၚိဒၟံၚ်ဟွံအောန်နူ (၈)မ ဒးလီုလာ်တူလေၚ်အာလဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)