ၜၚ်ကံက်၊ ဖေဖဝ်ဝါရဳ (၉)
ညးယိုက်ဝန် နူလာၚ်ပရိုၚ်သေံမွဲတၠဝွံ အခိၚ်မကၠောန်ဒၟံၚ်ကလောန်ဂှ် ဟိုတ်နူချိုတ်အာ လ္တူခုၚ် ပ္ဍဲကမၠောန်ဂှ်ရ နူကဵုလ္ပာ်ကမ္ပဏဳ ကဵုအာသြန်လေဲ ကုဂြောဝ်ဂတာညးရောၚ်ဂှ် သ္ဂးရ။
ပ္ဍဲကဵုမဳဒဳယျာ အပ္ဍဲဒေသတံ ထ္မံက်ထ္ၜးလဝ်ဂှ် ညးမလောတ်စှ်ေ နူကဵုခုၚ်ကလောန်တုဲ မချိုုတ်အာ ပ္ဍဲကဵုစမြိုၚ် Thai News Network TNN ဂှ်ဝွံ ဒှ်သူရာဝတ် သဳရဳသာဝတ် အာယုက်မၞုံ (၄၄) သၞာံရ။ ညးဝွံ ဒှ်မာန်နေဂျာကဆံၚ်လ္တူမွဲတၠ မကေတ်လဝ်တာလျိုၚ်အဓိက ကုခံက်သ္ၚိအၚ်အစဳဇန်တံဂှ်လေဝ် ဂွံတီကေတ်ရ။
လာၚ် TNN ဂှ်ဝွံ ဒှ်ဒၟံၚ်ကမၠောန် True ကဝ်ပဝ်ရေယှေန်မွဲရ။ ပ္ဍဲကဵုတၚ်ဒုၚ်စဳရေၚ် ပရိုၚ် Thai PBS ဂှ် သူရာဝတ်ဝွံ လေပ်ဒးစှ်ေအခိၚ်အပဵု အလုံမွဲသတ္တာဟတုဲ မၞိဟ်မရီုဗၚ်ကဵုညးလေဝ် ညးမွဲမှ ဟွံမွဲပုဟ်ဂှ် သ္ဂးရ။
သ္အာၚ်နူဂှ်ပၠန် မံၚ်စဟွံခိုဟ်တုဲ တ္ၚဲကေတ်လဝ်အခေါၚ် သီုၜါတ္ၚဲဂှ် ဟွံဂွံဇူလဝ် ခိုဟ်ဟ်မွဲသာ် ဒၟါနူတာလျိုၚ် ဟွံတုဲဏီဂးတုဲ သွက်ဂွံကလေၚ်စှ်ေကလောန်ဂှ် ဒးဒုၚ်ကော်လဝ်ရောၚ် ထ္မံက်ထ္ၜးလဝ်ရ။
ညးဂှ် ယဲခန္ဓ ယဲဆီၜေတ်နွံတုဲ အခိၚ်လက္ကရဴအိုတ် ဟိုတ်နူလတေၚ်ဆီကောန်တၟအ်ကၟာတ်က္တဵုဒှ်တုဲ စုတိအာလဝ်ဂှ် ဂွံတီကေတ်ရ။
သွက်ဂွံဂၠိုက်ဂၠါဲစၟဳစၟတ် ပရူကိစ္စ မဆက်စပ်ကဵု လၟေၚ်ဒဒှ်သူရာဝတ် မဒးချိုတ်အာလဝ်ဂှ် ဝန်ဇၞော်သၟာကမၠောန်ဍုၚ်သေံ ကဵုလဝ်အမိၚ်တုဲ နကဵုဌာနက္ဍိုက်ပ်စဵုဒၞါသၟာကမၠောန်တံဂှ်လေဝ် တၠကလောန်မေဿတာသူရာဝတ်ဝွံ မွဲသတ္တာဟမွဲတ္ၚဲ ကဵုလဝ်တ္ၚဲကၟာတ်နွံဟွံမွဲဂှ်ကီု အကာဲအရာဟွံကိတ်ညဳကဵု သၞောဝ်ဥပဒေ မပ္တံကဵုစကာ အခိၚ်အပဵုတံဂှ် စၟဳစၟတ်အာရောၚ် သ္ဂးရ။
အတိုၚ်သၞောဝ်ဍုၚ်သေံမ္ဂး အခိၚ်ကလောန် သၟာကမၠောန်တံဝွံ မွဲသတ္တာဟမ္ဂး ပဵုနူကဵု ၄၈ နာဍဳဟွံဂွံတုဲ ယဝ်ရဒးစှ်ေကလောန်အပဵုမ္ဂး သွက်နာဍဳအပဵုဂှ် မွဲသတ္တာဟမ္ဂး အပ္ဍဲ ၃၆ နာဍဳဟေၚ် သၞောတ်ဗ္ၜတ်လဝ်ရ။
ဝန်ဇၞော်သၟာကမၠောန်ဍုၚ်သေံဂှ် ညံၚ်ဂြောဝ်ဂတာ သူရာဝတ် သ္ဂောံကလိဂွံအခေါၚ်ဂွံဒုၚ်စသိုၚ်အိုဿီုဂှ် သွက်ဂွံရေၚ်တၠုၚ်ကဵု ချိုတ်တ်ပၠိုတ်တ်ဂှ် ကဵုလဝ်အမိၚ် ကုဌာနစဵုဒၞါသၟာကမၠောန် ကေုာံ ပရေၚ်မၞိဟ်တံရ။
ဌာနက္ဍိုက်ပ်စဵုဒၞါသၟာကမၠောန်ဂှ် လၟေၚ်ဒဒှ်ဏံဝွံ ယဝ်ရဒၟါနူကလောန်တုဲ ဒးချိုတ်အာလဝ်မ္ဂး ဂြောဝ်ဂတာညးဝွံ ကလိဂွံအာ သွက်ပရေၚ်ရီုဗၚ်ဂိယဲဂှ် (၅၀၀၀၀) ၝာတ် (S$2000) ၊ သြန်ဂိတု ညးမစုတိအာ (၇၀) တၟံကၠံဂှ် သွက် (၁၀) သၞာံ လၟေၚ်ဂိတုဂှ် ကလိဂွံအာ နဒဒှ်သြန်လေဲရောၚ်မဒှ်တုဲ နူကဵုရုၚ်ပရေၚ်မၞိဟ်ဂှ် ကလိဂွံအာ သြန်ဂိတုပေန်သေန်ဂမၠိုၚ်ရောၚ်ဂှ် ဟီုဂးလဝ်ရ။
Ref: The Straits Times