သဓီု၊ ဖေဖဝ်ဝါရဳ(၉)
ပ္ဍဲပွိုၚ်ဍုၚ်ၜဳကလေၚ်၊ သဓီု ကေုာံ ပွိုၚ်ဍုၚ်ဘာအၚ် မဒှ်တိဍာ်ဗော်သွးကောန်ဂကူကရေၚ် KNU ဒပ်မဟာ (၁) ထိၚ်ဒဝ်လဝ်တအ်ဂှ် ဟိုတ်နူကံၚ်ဇြဳပၞာန် ပန်ဂြာတ်ထောံဖျေံဗုမ် နကဵုက္ၜၚ်ကျာ၊ ပန်ဖျေံဒၟံၚ်လွဟ်ဇၞော်တုဲ ညးဒေသ (၅၀၀၀)တၠ ပြၚ် ထပ်ဒးဂြိပ်ဒဴဒၟံၚ်ရဂှ် ဂွံတီကေတ်ရ။
ပ္ဍဲဂိတုဖေဖဝ်ဝါရဳ ပထမသတ္တာဟဂှ် ပ္ဍဲကွာန်ထုမ်ဗိုဝ် ကဵုကွာန်ထုမ်ဗိုဝ်ဂျဳ ပွိုၚ်ဍုၚ်သဓီုကီု၊ ပ္ဍဲကွာန်မေန်သဝ် နူကဵုပွိုၚ်ဍုၚ်ဘာအၚ်ကီု၊ ပ္ဍဲကွာန်ဒေါက်ယာတ် ပွိုၚ်ဍုၚ်ၜဳကလေၚ်ကီု ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် အရိုဟ်ဒဒှ်တ္ၚဲရ။
သ္အာၚ်နူဂှ်ပၠန် ပ္ဍဲဂိတုဖေဖဝ်ဝါရဳ စၟတ်တ္ၚဲ (၇) အခိၚ်ဗ္တံဂှ်လေဝ် ပ္ဍဲဗ္ဒာဲဗွိုၚ်ကွာန်ယှိုဲယောၚ်ပျ ပွိုၚ်ဍုၚ်ၜဳကလေၚ်ဂှ် ၜိုန်ရဂြာတ်ထောံဖျေံလဝ်ဗုမ် နကဵုက္ၜၚ်ကျာကီုလေဝ် ပရေၚ်ဇီုကပိုက်ဒးလဝ်ဘဲဝ်ဂှ် ဟၟဲရ။
ပါဲနူကံၚ်ဇြဳပၞာန် ဂြာတ်ထောံဖျေံဒၟံၚ်ဗုမ် နကဵုက္ၜၚ်ကျာဂှ် လၟုဟ်ဏံ ဟိုတ်နူပန်ဖျေံဒၟံၚ်လွဟ်ဇၞော်တုဲ ညးဍုၚ်ကွာန်ဂမၠိုၚ် ၜိုတ်(၅၀၀၀)တၠပြၚ် နူကဵုကွာန် (၁၀)ကွာန်တအ်ဂှ် ဒးဂြိပ်ပါဲဒဴဒၟံၚ် ပ္ဍဲဒၞာဲဌာန်ဗၠးဘဲ ကေုာံပ္ဍဲဂြိုပ်ဂၞိၚ်တအ်ရဂှ် ဥက္ကဋ္ဌ ကဝ်မတဳကောပ်ကာဲမိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဒေသ ဒးဂြိပ်ဒဴပါဲဓလေတ်ဒၟံၚ်တအ်ဂှ် ဂကောံညးအရာပ် သီု KNU ပါလုပ်ဒၟံၚ်တအ် ၜိုန်ရကဵုဒၟံၚ်ပရေၚ်ရီုဗၚ်ထံက်ပၚ်ကီုလေဝ် ဆက်နွံဒၟံၚ်ပၟိက်ကဵု အရီုဗၚ်ထ္ၜလဘာ်ပရေၚ်မၞိဟ် စပ်ကဵုဇွောံမစၞစ၊ ပလောံၜိုဟ်၊ ယာတ်လ္တက် ကေုာံနစိုက်ကပေါတ်တအ်ရဂှ် ဟီုသ္ဂးလဝ်ရ။
ပ္ဍဲခရိုၚ်သဓီု KNU ဂှ်မ္ဂး ဂိတုဂျာန္နဝါရဳ တုဲကၠုၚ်ဏံဂှ် ဟိုတ်နူကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ သ္ၚိဒၟံၚ် ဟွံအောန်နူ (၁၀)မ ဒးဇီုကပိုက်လီုလာ်လဝ်တုဲ ကောန်အရာပ်ညးဍုၚ်ကွာန် (၁)တၠ ဒးချိုတ်အာလဝ်နွံတုဲ ဂွံလဝ်ဘဲဝပ် (၁၂)တၠရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)