ဝဝ်လေဝ်၊ ဖေဖဝ်ဝါရဳ(၉)
မွဲကရောံကဵု ပေါဲဗတိုက်ၜါလပါ် က္တဵုဒှ်ဒၟံၚ်ဂှ် ဟိုတ်နူပရေၚ်ပၞာန်ဆက်ကြံၚ်မ္ၚိုဟ်သ္ကာတ်မြဟ်ဒၟံၚ်တုဲ ဂၠံၚ်ကွဳစက်ဇၞော် ဝဝ်လေ-ထဳကပလေဝ် တွဵုရးဍုၚ်ကရေၚ် မၞုံပ္ဍဲတိဍာ် KNU ဒပ်မဟာ (၆) ဂှ် စတမ်နူတ္ၚဲဏံ ဂိတုဖေဖဝ်ဝါရဳ စၟတ်တ္ၚဲ (၈)တုဲ ကၟာတ်ဒၞာလဝ် အခေါၚ်အာကၠုၚ်ရဂှ် ဒပ်စဵုဒၞာကောန်ဂကူကရေၚ် (KNDO) နူတံဒပ် လၟိဟ် (၈) ကဵုသမ္တီ လလောၚ်တြးကၠုၚ်လဝ်ရ။
ဗ္ဒပ်ကံၚ်ဇြဳပၞာန် မၞုံပ္ဍဲကွာန်ထဳကပလေဝ် ဗ္ဒာဲဒေသဝဝ်လေဝ် သ္ကုတ်သၠုၚ်ကျာဗြဝတဳ တွဵုရးကရေၚ်ဂှ် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၃၁) တေံဂှ် ဒပ်ပံၚ်ကောံ ဒပ်ပၞာန်စဵုဒၞာကောန်ဂကူကရေၚ် (KNDO) က္ဍိုက်လဝ်က္ဍိုပ်ဂှ် အာစိုပ်ပန်ဗတိုက်လဝ် နကဵုဒရုမ်တုဲ နူလပါ်ကံၚ်ဇြဳပၞာန် (၄) တၠ ပါလုပ်သီုသ္ကိုပ်ဒပ်လ္ပာ် (၂)တၠ ဒးချိုတ်အာလဝ်ရ။
ကြဴနူပရေၚ်ပရော ဒပ်ပံၚ်ကောံ KNDO အာစိုပ်ပန်ဗတိုက်လဝ် ဗ္ဒပ်ကံၚ်ဇြဳပၞာန်တုဲဂှ် ဍာန်ကွဳစက်ဇၞော် ဝဝ်လေဝ်-ထဳကပလေဝ်ဂှ် စတမ်နူတ္ၚဲဏံတုဲ ကွဳစက် ကွဳလိုန်ဓာတ် ကောန်အရာပ်၊ ဂကောံလဵုဟွံဟီု ကဵုအာအခေါၚ် တတ်ကၠောံအာကၠုၚ် ဟွံသေၚ်ရပုဟ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KNDO ဂှ်ရ။
စတမ်နူတ္ၚဲကဵုသမ္တီလလောၚ်တြးလဝ်ဂှ်တုဲ စဵုကဵုပေါဲဗတိုက်တုဲဒှ် ဟိုတ်သာ်လဵုဒှ်ဒှ် ကဵုအခေါၚ်တတ်ကၠောံအာကၠုၚ် ဟွံသေၚ်တုဲ ပ္ဍဲလတူတၚ်လလောၚ်တြးဏံ ယဝ်ရဟွံဒ္ဂေတ်ဗက်မ္ဂး ဖိုလ်အဆက်က္တဵုဒှ်ကၠုၚ် လကြဴတအ်ဂှ် ကေတ်အာတာလျိုၚ်ဟွံသေၚ်ရဂှ် KNDO ဟီုသ္ဂးလဝ်ရ။
အခိၚ်ပြဟ်ဟ်လၟုဟ်ဏံဂှ် ပ္ဍဲဗ္ဒာဲဒေသဝဝ်လေဝ် သ္ကုတ်သၠုၚ်ကျာဍုၚ်ဗြဝတဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNDD တအ် အကာဲအရာပရေၚ်ပၞာန် ကြံၚ်မ္ၚိုဟ်သ္ကာတ်မြဟ်ဒၟံၚ်ရ။
တံဒပ် KNDO လၟိဟ်(၈) ဂှ် ကၟာတ်ကၠုၚ်အခေါၚ်တတ်ကၠောံအာကၠုၚ် ဍာန်ကွဳစက်ဇၞော် ဝဝ်လေဝ်-ထဳကပလေဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံတအ် ပေါဲဗတိုက် ဆက်က္တဵုဒှ်သ္ကာတ်မြဟ်ကၠုၚ်မာန်ဒၟံၚ်တုဲ ဟိုတ်နူဒှ်ဓဝိၚ် ဂွိၚ်ဖေက်ဇီုကပိုက်ဒး လတူကောန်အရာပ် ညးဍုၚ်ကွာန်တအ်ရဂှ် တမ်ရိုဟ်တၚ်ဂၞၚ်ပရိုၚ်မွဲတၠ ဟီုသ္ဂးလဝ်ရ။
ဗ္ဒပ်ထဳကပလေဝ်ကံၚ်ဇြဳပၞာန် မၞုံပ္ဍဲတိဍာ်ဒပ်မဟာ (၆) ဂှ် ပ္ဍဲသၞာံ (၂၀၂၂) ဂိတုမာတ်ချ်တေံဂှ် ဒပ်ပံၚ်ကောံ KNDO တအ် လုပ်စိုပ်ဗတိုက်ကၠုၚ်လဝ်တုဲဂှ် ၜိုန်ရသီကေတ်ဂွံလဝ် စဵုကဵုဗ္ဒပ်သၟဝ်ကုန်ဂှ် မာန်ကၠုၚ်လဝ်ကီုလေဝ် ဟိုတ်နူလပါ်ကံၚ်ဇြဳပၞာန် ပန်ရီုကၠုၚ်ကဵုက္ၜၚ်ကျာတုဲ ဒပ်ပံၚ်ကောံတအ် သီကေတ်ဗ္ဒပ်ဂှ်ဟွံမာန်တုဲ ဒးဆုတ်ကလေၚ်တိတ်အာလဝ်ရ။
ပရိုၚ်-သြၚ်လောန်တိုၚ်(မ်)