မတ်မလီု – ဖေဖဝ်ဝါရဳ(၉)
တ္ၚဲပၠန်ဂတးဗတိုက်သရိုဟ်တၠအဝဵုပၞာန် မရနုက်ကဵု (၃)သၞာံဟီုဂှ် ညံၚ်ဟွံဂွံနွံဂှ် နညးလုပ်ဂကောံအလဵုအသဳဂမၠိုၚ်ကီု သီုဂကောံဇြဟတ်ပၠန်ဂတးဂမၠိုၚ်သီုဖအိုတ် ပ္တိတ်အာဇြဟတ်ညဳညဳသာသာညိဂှ် သ္ကိုပ်ဝန်ဇၞော် အလဵုအသဳ NUG မာန်ဝေန်ခိုၚ်တာန် ဟီုဗတိုက်ဖ္အောဝ်လဝ်ရ။
ပ္ဍဲကောံဓရီုအလဵုအသဳ ညဳသၟဟ်ကောန်ဂကူ မရနုက်ကဵု (၅) ဝါ မကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ တုဲကၠုၚ်စၟတ်တ္ၚဲ (၇) ပ္ဍဲအခိၚ်နူဂယးဂှ် ဟီုသ္ဂးလဝ် သာ်ဏံရ၊
“သွက် one year plan အလဵုအသဳပရေၚ်ညဳသၟဟ်ကောန်ဂကူ ဂွံအံၚ်ဇၞးမာန်ဂှ် ဒၟာနူဂွံကၠုၚ်သြန်ဘဏ္ဍာ နွံပၟိက်တုဲ စိုတ်ဓာတ်ဂွံမြဟ်မြဴကၠုၚ်ကီု မွဲလပါ်ပၠန်ဂှ်လေဝ် ရံၚ်ကဵုဒဒှ် Project တအ်အံၚ်ဇၞးဒှ်ဒၟံၚ်တုဲ တၚ်ညးဍုၚ်ကွာန်ပိုဲ ဒုၚ်ဂိုၚ်ကေတ်လဝ် လတူပရေၚ်ပၠန်ဂတးကီု၊ တၚ်ပတှ်ေစှ်ေစိုတ်တအ်ကီု မွဲတော်လေဝ် ဟွံအောန်ယအ်စှ်ေအာဏီတုဲ ပါလုပ်ကဵုဒၟံၚ်ဂှ် ဂွံတီကေတ်လဝ်ဂှ်ရ မိပ်စိုတ်ဗွဲမလောန်ရ” ဂှ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုသ္ဂးလဝ်ရ။
သ္အာၚ်နူဂှ်ပၠန် သွက်တၚ်ပတှ်ေညးဍုၚ်ကွာန်တအ်ဂှ် နကဵုအလဵုအသဳမွဲတန် သွက်ဂွံဗတိုက်သရိုဟ်ဖျေံ ကံၚ်ဇြဳပၞာန်ဂှ် လတူနူကြံၚ်မ္ၚိုဟ် ညံၚ်ဂွံကြံၚ်မ္ၚိုတ်တိုန်မာန်ဂှ် ဂစာန်အာဏောၚ်ဂှ်လေဝ် ဟီုကဵုလဝ်ကတိပါၚ်ဏီရ။
မွဲကရောံကဵုကံၚ်ဇြဳပၞာန်သီအဝဵု ထပ်ဂလိုၚ်ပတိုန်အာယုက် (၆) ဂိတုဂှ် ကၠောန်သ္ပကၠုၚ်ပရေၚ်ပြံၚ်သၠာဲတအ်နွံကၠုၚ်ကီု စပ်ကဵုပ္တိတ်ကၠုၚ်အမိၚ် သွက်ဂွံဒ္ဂေတ်ဗက်အခေါၚ်အဝဵု ပရေၚ်အုပ်ဓုပ်ပၞာန် ဆေၚ်ရာကဵု ပရေၚ်စဳရေၚ်သၞောဝ် နကဵုပရေၚ်အုပ်ဓုပ်ပၞာန် ပွိုၚ်ဍုၚ် (၃၇) ပွိုၚ်ဍုၚ်တအ်တုဲ သွက်ဂကောံအလဵုအသဳတအ် ဂွံသ္ၚဳဂၠိပ်သၞောတ်စှ်ေစှ်ေဂှ် ဟီုဗတိုက်ဖ္အောဝ်လဝ်ရ။
အလဵုအသဳပရေၚ်ညဳသၟဟ်ကောန်ဂကူဂှ် နူကဵုအစဳဇန်ကံၚ်ဇြဳပၞာန် ဍဵုဍိုက်ပျဲပျာဲဒၟံၚ်ညးဍုၚ်ကွာန်တအ်ဂှ် ညံၚ်ပရေၚ်ဇီုကပိုက် ၜိုတ်အောန်မာန် ညံၚ်ဂွံအောန် ဒးပ္တိတ်အာဇြဟတ်ရောၚ်ဂှ် သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)