တၚ်ဆက်စၠောံသၟာန်သွဟ်လဝ်ကဵု ညးမၞုံအခေါၚ်ဟီု ဂးရုၚ်သ္ကိုပ်ဝန်ဇၞော် NUG အလဵုအသဳပရေၚ်ညဳသၟဟ်ကောန်ဂကူ။
ကံၚ်ဇြဳပၞာန်သီအဝဵု ပံက်ကၠုၚ်ဇြေန်တာ တၚ်ဂၞၚ်နဲကဲကွတ်ပညာ နျူကလဳယာ နအရီုဗၚ်ရုယှာ ပ္ဍဲဍုၚ်လဂုၚ် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၆) တေံတုဲ တၚ်တုပ်စိုတ် ဆေၚ်ရာကဵု ပရေၚ်ပံၚ်တောဲရေၚ်တၠုၚ် နဲကဲကွတ်ပညာနျူကလဳယာဂှ်လေဝ် ထ္ပက်လဝ်စၟတ်တဲရ။ မွဲလပါ်ပၠန်လေဝ် ကံၚ်ဇြဳပၞာန်ဂှ် သွက်ဂွံသိုၚ်ခၞံ ရုၚ်စက်ဓာတ်လလဳနျူကလဳယာ နကဵုကွတ်ပညာနဲကဲ ရုယှာတုဲ စဳဇန်လဝ် သွက်ဂွံဓမံက်အာရုပ်ရဴ လၟေၚ်ကမၠောန်နျူကလဳယာဂှ် စဳဇန်လဝ်ရ။ ပ္ဍဲလတူလၟေၚ်ကမၠောန်ကံၚ်ဇြဳပၞာန် ကၠောန်ရေၚ်တၠုၚ်ဒၟံၚ် ဗီုဏံဂှ် နကဵု NUG လစွံစိုတ် လညာတ်တအ်၊ ဖိုလ်အဆက်နျူကလဳယာ ကေုာံသွက်ကၟိန်ဍုၚ်နာနာ ဂွံကဵုဇြဟတ်ဓရိုဟ်ဂှ် စပ်ကဵုအကာဲအရာတအ်ဏံတုဲ ဆက်စၠောံသၟာန်သွဟ်လဝ်ကဵု ညးမၞုံခေါၚ်ဟီုဂး ရုၚ်သ္ကိုပ်ဝန်ဇၞော် NUG အလဵုအသဳပရေၚ်ညဳသၟဟ်ကောန်ဂကူရ။
-အလန်ကိုပ်ကၠာအိုတ်ဏံ စပ်ကဵုနဲကဲကွတ်ပညာနျူကလဳယာ ကံၚ်ဇြဳပၞာန်ရေၚ်တၠုၚ်ဒၟံၚ်ဂှ်တုဲ နကဵု NUG မုကၠောန်ရေၚ်တၠုၚ်လဝ် နွံဒၟံၚ်ရော။
ယဝ်ရဒးဟီု အတိုၚ်အလုံမွဲဂၠးကဝ်တှ်ေ ရုယှာဂှ် ကဵုဒၟံၚ်အရီုဗၚ်ကဵု ကံၚ်ဇြဳပၞာန်ဂၠိုၚ်အိုတ် ဟီုစမာန်ရ။ ပရေၚ်သွံကဵုကပေါတ်လွဟ်လက်နက်ပၞာန်လေဝ် ဂွံတီကေတ်အတိုၚ်တၚ်ဂၞၚ်တအ်ရ။ လၟုဟ်တှ်ေ ကိစ္စဇြဟတ်နျူကလဳယာရ။ အရာဏံ စကၠောန်ကၠုၚ်ဒၟံၚ်ဂှ် နွံရ။ ဟီုတှ်ေ စပ်ကဵုကိစ္စဏံတုဲ ပိုဲလေဝ် လ္ၚတ်ဲဂၠိုက်ဂၠာဲတုဲတှ်ေ တၚ်ဂၞၚ်ၜိုတ်ဂွံမာန်ဂှ် ပကောံပကေဝ်ဒၟံၚ် နွံရ။ တၚ်ဂၞၚ်ပိုဲပကောံပကေဝ်လဝ်ဗီုဏံဂှ် အလဵုအသဳNUG ပိုဲသၟးဟွံသေၚ်တုဲ ကၟိန်ဍုၚ်ဂၠးကဝ်နာနာတအ်ဂှ်လေဝ် တၚ်ဂၞၚ်ၜိုတ်ပိုဲဂွံလဝ် သီုဖအိုတ်ဂှ် ပလံၚ်ဗစိုတ်ကဵုဒၟံၚ် မွဲဒမြိပ်အခိၚ်ရ။
-ယဝ်ရနျူကလဳယာ စိုပ်အာ ပ္ဍဲတဲကံၚ်ဇြဳပၞာန်တှ်ေ နဒဒှ်ဖိုလ်ဍေံ ကၟိန်ဍုၚ်ဏံ ဗီုပြၚ်လဵုဆက်ဒှ်ကၠုၚ်မာန်ရော။
နူစတမ်ဝါဒိတေံ ဟီုကၠုၚ်လဝ်တုဲဒၟံၚ်ရ။ ဒပ်ပၞာန်ပ္ကီုပရာပ် မေန်အံၚ်လှာၚ် က္ဍိုက်ဒၟံၚ်က္ဍိုပ်ဏံ သွက်ညးဍုၚ်ကွာန် နွံဒၟံၚ်ပ္ဍဲကၟိန်ဍုၚ်ဗၟာပိုဲဟေၚ် အန္တရာယ်နွံဟွံသေၚ်ပုဟ်။ ကဆံၚ်ပထမဂှ်တှ်ေ ပရေၚ်ဂီုကၠီုကၟိန်ဍုၚ်အာဇြဳယာန် ပ္ဍဲကဵုဒေသ၊ ပရေၚ်ဂီုကၠီုတအ်လေဝ်ဇၞော်တိုန်ဒၟံၚ် နဒဒှ်ဂကောံဇီုကပိုက်ဒးဒၟံၚ်ဟီုဂှ် ဟီုကဵုကၠုၚ်ဒၟံၚ်သတိ မွဲဒမြိပ်ရ။ လတူနူဏံ တိုန်မွဲကဆံၚ်တုဲယဝ်ရဒးဟီုဏောၚ်တှ်ေ ပ္ဍဲဒေသသၟးဟေၚ်ဟွံသေၚ်။ ယဝ်ရလညာတ် သ္ပမာန်ကေတ်ဇၞးညးဍုၚ်ကွာန် နကဵုလွဟ်လက်နက် ပ္ကီုပရာပ် ဂွံဒၟံၚ်ဏောၚ်ဟီုတုဲ တုဲပၠန် ယဝ်ရဇီုကပိုက်ဒးအခေါၚ်အဝဵုဇကုမ္ဂး ညးလဵုလေဝ် ဟွံအေၚ်ဒုၚ်တုဲ ကမၠောန်ဓဇန်ကြာန်တအ်လေဝ် ဆက်တုဲကၠောန်သ္ပဒၟံၚ်ဏီဏောၚ်တှ်ေ ပ္ဍဲဒေသသၟးဟေၚ်ဟွံသေၚ် သွက်ကၟိန်ဍုၚ်ဂၠးကဝ်နာနာတအ်လေဝ် ဒှ်ကၠုၚ် နဒဒှ်ဂကောံမၞုံကဵုအန္တရာယ်ယျဟီုဂှ် ဗီုဏံအဲမိက်ဂွံဟီုရ။ ပ္ဍဲကဵုဂှ် ကဵုရုယှာတှ်ေ ပရေၚ်ပံၚ်တောဲလောန်ၜက်နူသၞောတ်ဗ္ၜတ်ပံက်ဖက် ရေၚ်တၠုၚ်ဒၟံၚ်ဂှ်လေဝ် ပိုဲဂွံညာတ်ဆဵုကေတ်ရ။ ကိစ္စတအ်ဏံလေဝ် ဒှ်အကာဲအရာ ဇီုကပိုက်ဒးဒၟံၚ် ပရေၚ်ဂီုကၠီုဂၠးကဝ်ရ။
-နကဵုကံၚ်ဇြဳပၞာန်သီအဝဵုလၟုဟ်ဏံတှ်ေ စကၠောန်ဒၟံၚ်နဲကဲကွတ်ပညာနျူကလဳယျာဂှ်ရ နကဵု NUG နူကဵုကၟိန်ဍုၚ်နာနာမွဲကဆံၚ် ဗီုပြၚ်လဵု သွက်ဂွံကဵုအာဇြဟတ်ဓရိုဟ်ကဵု ကံၚ်ဇြဳပၞာန် နွံရော။
ပ္ဍဲအခိၚ်လၟုဟ်ဏံတှ်ေ ဗီုကဵုလွဟ်လက်နက်နျူကလဳယျာတအ်ဂှ် စိုပ်အာပ္ဍဲတဲကံၚ်ဇြဳပၞာန်ဟာဟီုဂှ် ကိစ္စဏံ ဂွံဒှ်ကၠုၚ်ပြဟ်ဟ်မာန်ဂှ် ပြဟ်မံၚ်ဏီ ဟီုစမာန်ရ။ ဆဂးဂှ် ဂကောံပၞာန်ပ္ကီုပရာပ်ဂှ် သွက်ပရေၚ်အဝဵုဍေံတအ် ဂွံတန်အာဍာ်ဇမၠိၚ်ဂှ် ဒှ်အကာဲအရာချပ်စန်စာဒၟံၚ် PLAN ဍာ်ဇမၠိၚ်ရဂှ် အဲညာတ်ကေတ်ရ။ ဟိုတ်နူဂှ်ရ အရာဏံလၟုဟ်ဂှ်တှ်ေစပလုမ်ပ္တိုန်ရဂှ် ဒးကၠိုဟ်ဒုၚ်ကေတ်တဲရ။ ကိစ္စစပ္တံကၠုၚ်ဗီုပြၚ်ဏံဂျ် ယဝ်ရသောၚ်ကလးထောံပြဟ်ဟ်ဟွံမာန်ပုဟ်တှ်ေ အာဂတနူဏံ ပ္ဍဲဒိုဟ်အဂၞဲအေယှမွဲဒမြိပ်ဏံ။ လေံဒုက်ရုယှာ။ တုဲပၠန်ကောန်ဍုၚ်ကောန်ကွာန်ဇကုသၟးဟွံသေၚ်ပုဟ် သီုကဵုပ္ဍဲဒေသ။ သီုကဵုဂၠးတိဇၞော်ဏံ ဒှ်ကၠုၚ်ဗီုပြၚ်ထၟာဲယာမ်ကဵုဒဒိုက်အခိၚ်ဟွံရုဲ ဇၞော်ဇၞော်မွဲရ။ တၠုၚ်လအာကၟိန်ဍုၚ်ဗၟာ သွက်ဂွံဒှ်အာဗီုပြၚ်ဏံနွံအာမာန်ရ။ ဂကောံဇြဟတ်ပ္ကီုပရာပ်ဏံ ယဝ်ရဆက်ဂွံအာအခေါၚ်ကၠောန် အတိုၚ်ပၟိက်စိုတ်ဗီုဏံဏီဏောၚ်တှ်ေ ကဵုရုယှာလေဝ် ပရေၚ်ပံၚ်တောဲလတူနူဏံ ယဝ်နွံကၠုၚ်တှ်ေ ဍုၚ်ဗၟာသၟးဟေၚ်ဟွံသေၚ်။ ဒှ်အကၠုၚ်အကာဲအရာပရေၚ်ဘပဠ ဇၞော်ကၠုၚ် စဵုကဵုအလုံမွဲဂၠးကဝ်မာန်ဒၟံၚ်ဏောၚ်ဂှ် အဲသ္ၚဳဂၠိပ်ညာတ်ကေတ်ရ။ ဟိုတ်ဂှ်ရ ကိစ္စဗီုဏံ နူစပ္တိတ်ကၠုၚ်ဇြဟတ် ကၠာဟွံဂွံလဇုဲလဇဏီ ညံၚ်ဂွံပဒေါံထောံပြဟ်ဟ်မာန်ဂှ် ညးနွံပၟိက်ကဵုပရေၚ်ၜိုဟ်လလံဂၠးကဝ်တအ် ပံက်ကောံတုဲ ထေက်ကဵုဒးသောၚ်ကလး ဒးလွဳပရာဏောၚ်။
-နဒဒှ်အလန်လကြဴအိုတ်ဏံ စပ်ကဵုနျူကလဳယျာတုဲ မုမိက်ဂွံဗတိုက်ဖ္အောဝ်ကၟိန်ဍုၚ်နာနာ နွံကီုရော။
ရုယှာဂှ်လေဝ် ဩဇာအဝဵုဍေံမွဲဒမြိပ်လပါ်အာယှဏံရ။ သွက်ဂွံသၠဲပတိတ်လပါ်သ္ကုတ်အာယှဂှ် ဒှ်ဗီုပြၚ်လဂါံဇိုၚ်ဂါံတိတ်ကၠုၚ်ရ။ ဗီုဂှ်ကီုရ ဂကောံပၞာန်ဂှ်လေဝ် သွက်အဝဵုဍေံတအ်ဂွံဆက်တန်တဴဂှ် မုက်မတ်ညးဂှ်လေဝ် ဗဵုရံၚ်ဟွံသေၚ်ရ။ အရာလဵုလေဝ်ချပ်စန်စာဟွံသေၚ်ရ။ သွက်အဝဵုအဏာဍေံဂွံတန်တဴအာမွဲဓဝ် ယဝ်ဒးကဵုရုယှာသီုကၟိန်ဍုၚ်မွဲလေဝ် ဍေံကဵုရဂှ်ရ။ ယဝ်ရဒုၚ်လျိုၚ်သါက်ဍေံတအ်ဏောၚ်တှ်ေ အရာလဵုဟွံဟီု သွက်ဂွံကဵုထောံရုယှာဂှ် ဒှ်ဒၟံၚ်ဒတုဲရ။ ဟိုတ်ဂှ်ရ ပိုဲတအ်ဂှ် ပရေၚ်ပံၚ်တောဲကံၚ်ဇြဳပၞာန်ကဵုရုယှာတအ်ဂှ် သွက်ညးလဵုလေဝ် ဒှ်လပါ်ခိုဟ်ဟွံသေၚ်ပုဟ်။ သွက်ကောန်ညးဍုၚ်ကွာန်ကၟိန်ဍုၚ်ဗၟာဓဝ်ဟွံသေၚ်ပုဟ်။ သွက်ကၟိန်ဍုၚ်ပ္ဍဲဒေသဗီုကဵုအာဇြဳယာန်တအ်ကီု သီုကဵုသွက်ကၟိန်ဍုၚ်ဇြဟတ်ဇၞော်တၞဟ်ဟ်တံဂှ် တၠုၚ်လအာလပါ်ခိုဟ်ဗီုလဵုပလေဝ်နွံကၠုၚ်ဟွံသေၚ်ဂှ်ရ ကၠာဟွံဂွံစတမ်ကၠောန်ဗဒှ် ဃောပတိတ်ဒၟံၚ်ဇြဟတ်ဂှ် ညံၚ်ဂွံတာဒၞာထောံပြဟ်ဟ်မာန် ထေက်ကဵုဒးဘိုၚ်ရေၚ်တၠုၚ်ထေက်ဏောၚ်ဂှ် ညာတ်ကေတ်ရ။