မတ်မလီု၊ ဖေဖဝ်ဝါရဳ(၁၀)
ပ္ဍဲတွဵုရးဍုၚ်မန် သွက်သၟတ်လ္ၚဵုတအ် ဂွံလုပ်ပ္ဍဲဒပ်ကံၚ်ဇြဳပၞာန် ကေုာံဒပ်ဗၠာဲသၟိၚ်တအ်ဂှ် ဂကောံဒပ်ဗၠာဲသၟိၚ် သၟဝ်တဲကံၚ်ဇြဳပၞာန် ကေုာံညးကဵုပရိုၚ် ဗၠာဲသၟိၚ်တအ် ဗက်ဂၠာဲစန္ဒက်ဒၟံၚ် နွံကၠုၚ်ရဂှ် သၟတ်ဒေသဂမၠိုၚ် ဟီုကဵု ဌာန်ပရိုၚ်သြန်လောန်တိုၚ်ရ။
ပ္ဍဲအရာစန္ဒက်သၟတ်တအ်ဂှ်လေဝ် ယဝ်လုပ်ဒပ်ကံၚ်ဇြဳပၞာန် အခိၚ်လၟုဟ်တှ်ေ ကဆံၚ်တိုန်ပြဟ်တုဲ သြန်ဂိတုလေဝ် ဂွံဂၠိုၚ်ဒၟံၚ်ရောၚ်ဂးတုဲ ဗက်ဂၠာဲ စန္ဒက်ဒၟံၚ်ရ။
ပ္ဍဲပရေၚ်စန္ဒက်ဒၟံၚ်ဗီုဏံဂှ်လေဝ် ပ္တဝ်လဝ်ကဵု သၟတ်ဟွံတိုန်ဘာ မၞုံပ္ဍဲအရာပ်၊ ပ္ဍဲကွာန်တအ်၊ သၟတ်ကၠောန်ဒၟံၚ်ကမၠောန် ဂွံတှ်ေတုဲတအ်ကီု သီုကဵုသၟတ် ကမၠောန်ကၟိတ်ဟၟဲတအ် အဓိကတုဲ ဗက်ဂၠာဲစန္ဒက်ဒၟံၚ်ရ။
ပရေၚ်လပါ်ကံၚ်ဇြဳပၞာန် ဗက်ဂၠာဲစန္ဒက်ဒၟံၚ်သၟတ်တအ် သွက်ဂွံလုပ် ပ္ဍဲဒပ်ဍေံတအ်ဂှ် ဟိုတ်နူကဵုပေါဲဗတိုက်က္တဵုဒှ်ဒၟံၚ် ဇၟာပ်ပ်တ္ၚဲတုဲ ဇြဟတ်ဒပ်ဍေံတအ် အောန်ယအ်စှ်ေကၠုၚ်ဒၟံၚ်ဂှ်ရ ဂစာန်ကၠောန်ဒၟံၚ် သွက်ဂွံကလေၚ်ဗပေၚ်ဇြဟတ်ရဂှ် ညးဒေသတအ် ဟီုသ္ဂးလဝ်ရ။
ကံၚ်ဇြဳပၞာန်ဂှ် ၜိုန်ရဗက်ဂၠာဲစန္ဒက်ဒၟံၚ်သၟတ် သွက်ဂွံလုပ်ဒပ်ဍေံတအ်ကီုလေဝ် ပ္ဍဲမွဲကာလသီအဝဵု ပွိုၚ်(၂) သၞာံတုဲကၠုၚ်ဏံဂှ် ပါဲနူပရေၚ်ၜုၚ်တက် ရပ်ဒက် ပြိုက်ဂစိုတ် သၟတ်ထ္ၜးဆန္ဒ ဟွံဒုၚ်တဲကဵုပရေၚ်သီအဝဵုတအ်တုဲ ပရေၚ်ရပ်စုတ်ထံၚ်စာတ်လေဝ် ကၠောန်သ္ပကၠုၚ်လဝ်ရ။
ကံၚ်ဇြဳပၞာန်ဂှ် သွက်ဂွံဂွံပရိုၚ် ဂကောံပရေၚ်စဵုဒၞာညးဍုၚ်ကွာန်ကီု သွက်ဂွံဂွံ တၚ်ဂၞၚ်ပရိုၚ် ညးဘိုၚ်ရီုဗၚ်ကဵုဒၟံၚ်တအ်ဂှ် သွက်ဂွံစွံအာ ညးကဵုပရိုၚ်ဂှ် ကဵုကၠုၚ်လဝ်တၚ်စၞောန် ဓလုက် နွံကၠုၚ်ဒၟံၚ်ရ၊
မွဲလပါ်ပၠန်ဂှ် ပ္ဍဲဇၟာပ်ပ်ဒၞာဲ ကောန်ဒပ်ဍေံတအ် ဒးဒုၚ်ဗတိုက်ဒၟံၚ်တုဲ ဟိုတ်နူဇြဟတ်အောန်ယအ်စှ်ေကၠုၚ်ဂှ်ရ ပရေၚ်ကံၚ်ဇြဳပၞာန် ကော်ကေတ်ညးယိုက်ဂၠေၚ်သ္ဇိုၚ်ဝန်ပၞာန် မၞိဟ်ဗြဴတအ်တုဲ ပ္ကတ်ပ္ကေၚ်ကဵုကၠုၚ် နွံဒၟံၚ်ကီု ပ္ဍဲကဵုကွာန်တအ်ဂှ်လေဝ် ဒက်ပ္တန် ပၞာန်ညးဍုၚ်ကွာန်တုဲ ပရေၚ်ပ္ကတ်ပကေၚ်ကဵုကၠုၚ် နွံဒၟံၚ်ရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် သ္ဇိုၚ်ဝန် Non-CDM နူကဵုဌာနနာနာတအ်လေဝ် ပ္ဍဲကဵုတက္ကသိုလ်သ္ဇိုၚ်ဝန်ဗဟိုဝ် (ဖံၚ်ကျဳ) ဂှ် ပ္ဍဲအရာကဵုတန်ဗ္တောန်ဂှ်လေဝ် ကဵုကၠုၚ်ဒၟံၚ်တန်ဗ္တောန် ကွတ်ပၞာန်ကေုာံ ပရေၚ်ပန်ပှ်ောလွဟ်အဓိကတုဲ ပၟိက်ဒှ်ကၠုၚ်မ္ဂး ဒးယိုက်ဂၠေၚ်တာလျိုၚ်ပၞာန်ဏောၚ်ဂှ်လေဝ် ပရေၚ်ဟီုဂး နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)