မတ်မလီု၊ ဖေဖဝ်ဝါရဳ(၁၀)
သွက်ဂွံထိၚ်ဒက်ကောံကာဲအာ ကောန်ဒပ်သၟဝ်တဲ ဗော်သွးကောန်ဂကူကရေၚ် (KNU) တအ်ဂှ် ကဝ်မတဳပ္ညဳပ္ညပ်ဓမံက်ရုပ်ရဴပရေၚ်ညဳသၟဟ် ကေုာံပရေၚ်ၜိုဟ်လလံကောန်ဂကူ ကံၚ်ဇြဳပၞာန် ပလံၚ်ဗစိုပ်လဝ် လိက်ကလေၚ်ပရိုၚ် ဇရေၚ် ဥက္ကဋ္ဌ KNU ကေုာံ ဂအုပ်က္ဍိုက်က္ဍိုပ်ပၞာန် KNLA ရဂှ် ဂွံတီကေတ်ရ။
နကဵုပရောပရာ စပ်ကဵုသွက်ဂွံထိၚ်ဒက်ကောပ်ကာဲကဵု ကောန်ဒပ်သၟဝ်တဲ KNU ဂှ် ကဝ်မတဳပ္ညဳပ္ညပ်ဓမံက်ရုပ်ရဴ ပရေၚ်ညဳသၟဟ်ကောန်ဂကူ ကေုာံပရေၚ်ၜိုဟ်လလံ ကံၚ်ဇြပၞာန် ကဵုကၠုၚ်ပရိုၚ် ကုဥက္ကဋ္ဌ KNU သ္ကိုပ်ပၞာန်ဇၞော်မူတူဇြေဖိုဝ်၊ ကေုာံ ဂအုပ်က္ဍိုက်က္ဍိုပ်ပၞာန် သ္ကိုပ်ပၞာန်ဇၞော်သဝ်ဂျဝ်နဳရ။
ပ္ဍဲကဵုတၚ်ကဵုပရိုၚ်ဂှ် နကဵုကဝ်မတဳဗဟိုဝ် မပါလုပ် သီုဥက္ကဋ္ဌဇၞော် KNU ကေုာံဂအုပ်က္ဍိုက်က္ဍိုပ်ပၞာန်တအ် သွက်ဂွံကောပ်ကာဲထိၚ်ဒက်အာ ကောန်ဒပ်သၟဝ်တဲတအ်၊ ကောန်ဒပ် KNDO တအ် ညံၚ်ဟွံဂွံကၠောန် ကမၠောန်ပလီုပလာ်၊ မုကမၠောန်သာ်လဵုဟွံဟီု ရံၚ်ကဵုဒတုဲဖိုလ်ညးဍုၚ်ကွာန်တုဲ သွက်ဂွံရေၚ်တၠုၚ် ကောပ်ကာဲအာမာန်ဂးဂှ် ပါလုပ်ဒၟံၚ်ရ။
ပ္ဍဲလတူတၚ်သမ္တီကံၚ်ဇြဳပၞာန်ကဵုကၠုၚ်ဂှ် နကဵုကဝ်မတဳဗဟိုဝ် KNU အစဳဇန်သွက်ဂွံကလေၚ်ပလန်အာတဲ နွံဒၟံၚ်တုဲ အခိၚ်လၟုဟ်ပြဟ်ဟ်ဏံ စပ်ကဵုကိစ္စဏံတုဲ ဟီုသွဟ်ကဵုဟွံမာန်ဏီရဂှ် ညးမၞုံအခေါၚ်ဟီုဂး KNU ဖဒိုဝ်သဝ်တဝ်နဳ ဟီုလဝ်ရ။
ညးမၞုံအခေါၚ်ဟီုဂး ဒပ်မဟာ(၅) ဖဒိုဝ်မာန်မာန်ဂှ်မ္ဂး နူကဵုအခိၚ်ပြဟ်ဟ်တေံရ ကံၚ်ဇြဳပၞာန် ကေတ်အခေါၚ်ခိုဟ်ကဵု လိက်ကသုက် NCA တုဲ ပရေၚ်ကၠောန်ရေၚ်တၠုၚ် ကမၠောန်ကရေပ်ဓရတ် လတူ KNU ဂှ် ကၠောန်ကၠုၚ်ဒၟံၚ်တုဲ နကဵု KNU လေဝ် နွံပၟိက်ဒၟံၚ် သွက်ဂွံဒးသောၚ်ကလး ဒဒှ်ရလိက်ကသုက် NCA လီုလာ်အာတုဲ ပိုတ်တ်သ္ကုတ်တ်ရဂှ် ဟီုသ္ဂးလဝ်ရ။
ဒပ်ကံၚ်ဇြဳပၞာန်ဂှ် ဒေါံဇူလဝ်ပရေၚ်ချဳဒရာၚ်ပၞာန်ဏောၚ် ၜိုန်ရဟီုဂးလဝ်ကီုလေဝ် အခိၚ်လၟုဟ်ဏံ ပ္ဍဲကဵုတိဍာ် ဗော်သွးကောန်ဂကူကရေၚ် KNU ထိၚ်ဒဝ်လဝ်ဂှ် အကြာဒပ်ကံၚ်ဇြဳပၞာန်ကဵု ဒပ် KNLA ၊ KNDO တအ် ပေါဲဗတိုက် ဆက်က္တဵုဒှ်ဒၟံၚ်တုဲ ပ္ဍဲကာလပၞာန်သီအဝဵု ပွိုၚ်(၂)သၞာံဂှ် ပေါဲဗတိုက် ဗ္ဒာဲ (၈၀၀၀) ဝါ က္တဵုဒှ်လဝ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်-သြၚ်လောန်တိုၚ်(မ်)