ၚဖေဝ်-ဖေဖဝ်ဝါရဳ (၁၀)
ပန်ဗတိုက်လဝ် က.ပ.စ -၁၄ သၟဝ်တဲကံၚ်ဇြဳပၞာန် ကၠောန်သ္ပဒၟံၚ် ပရေၚ်ရပ်ဒက်ၜုၚ်တက် ညးဍုၚ်ကွာန် ဟၟဲကဵုဗဗွဲဓဝ် နကဵုလွဟ်ဇၞော်ရဂှ် က္ဍိုပ်သ္ကိုပ်ပၞာန် PRA Magway ဟာကျူလဳ ဟီုသ္ဂးလဝ်ရ။
ဂိတုဖေဖဝ်ဝါရဳ စၟတ်တ္ၚဲ (၉) ပ္ဍဲအခိၚ်နူဂယးဂှ် ရုၚ်စက်ဍုန်ယာမ် က.ပ.စ- ၁၄ ဖျေံသ္ဇိုၚ်ပွိုၚ်ဍုၚ်ၚဖေဝ်ဂှ် ကရောၚ်ပၞာန် PRA Magway ၜါကရောၚ်ပၞာန် ပန်ဖျေံလဝ်ကဵု လွဟ်ဇၞော်ရ။
“ပ္ဍဲကဵုကိစ္စဏံ ပရေၚ်ကော်ဏာ ကောန်အရာပ်ညးဍုၚ်ကွာန် ဟွံဆေၚ်ဆက်တအ် ပ္ဍဲကဵုဗ္ဒပ်ကၚ်တုဲ စၟဳစၟတ်၊ ၜုၚ်တက် ဗီုတအ်ဏံ နွံကၠုၚ်ဒၟံၚ်ဂှ် ပိုဲမိၚ်လဝ်ရ။ အတိုၚ်ပရိုၚ် ဂွံနၚ်နူကဵုသတ်ပညောန်ဂှ်တှ်ေ ဍေံတအ် ဒးအာလဝ်ဂိဂိဏောၚ် မိၚ်လဝ်ရ”ဂှ် ဟာကျူလဳ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဗတိုက်လဝ် က.ပ.စ- ၁၄ သၟဝ်တဲကံၚ်ဇြဳပၞာန် နကဵု ၁၀၇-(မမ) ဒုမ်ယှတ် (၂)၊ RPG – ၁ မ တုဲ အကာဲအရာ ဇီုကပိုက်ဂွံလဝ်ဘဲဝပ် သောဲသောဲဗြောဲဗြောဲ သ္ပဒ္တန်ဟွံမာန်ဏီရဂှ် ညးဟီုလဝ်ရ၊
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ (၁) တေံလေဝ်အကြာကွာန်ဂုက်ဂျဳကဵု ကွာန်မျေလာတ် ပွိုၚ်ဍုၚ်ၚဖေဝ်ဂှ် ဒၟာနူကွဳစက်ဒပ်ကံၚ်ဇြဳပၞာန်ပါဗက်ကၠုၚ် ဒးဒုၚ်တံၚ်ခတိုဟ်လဝ်မာၚ်ကဝ်သၠဗဗြိုက်တုဲ ပရေၚ်ချိုတ်ဂျိုၚ် ဇီုကပိုက်ဒးလဝ် နွံဒၟံၚ်ရဂှ် ဂွံတီကေတ်ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၈)တေံအခိၚ်ဗ္တံ ၜိုတ် (၁၁)ဂှ် ပ္ဍဲကဵုခရိုၚ်မေန်ဗူ ဒပ်စဵုဒၞာညးဍုၚ်ကွာန်ပံၚ်ကောံတအ် လုပ်စိုပ်ဗတိုက်လဝ် ဗ္ဒပ်ဗၠာဲသၟိၚ် သလေန်-ကာန်ပျာ ဂှ်တုဲ မၞိဟ်ဟွံအောန်နူ မသုန်တၠ ဇီုကပိုက် ဂွံလဝ်ဘဲဝပ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)