ထဝါဲ၊ ဖေဖဝ်ဝါရဳ(၁၁)
ရးဒေသဇၞော်တၞၚ်သဳ၊ ပွိုၚ်ဍုၚ်ထဝါဲ၊ ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲဗ္ဒပ်ဗၠာဲသၟိၚ်ပကာရဳဂှ် ဂိတုဖေဖဝ်ဝါရဳ စၟတ်တ္ၚဲ (၁၀) အခိၚ်နူဂယးဂှ် ဂကောံဇြဟတ်ပၠန်ဂတးဒပ်ပံၚ်ကောံတအ် လုပ်စိုပ်ဗတိုက်ပန်ပှော်လဝ်ရဂှ် ညးမၞုံတာလျိုၚ် ဒပ်ပရေၚ်စဵုဒၞာဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ အခိၚ်နူဂယးၜိုတ် (၃)နာဍဳဂှ် ဗ္ဒပ်ဗၠာဲသၟိၚ်ပကာရဳ ဖျေံလဝ်ဗ္ဒပ်ဇြဟတ်ၜိုတ် ၁၀၀ ဂှ် KTLA၊ ပကဖ ခရိုၚ်ထဝါဲ ကေုာံဂကောံကောဒေံမဟာမိတ်ဂမၠိုၚ် အာစိုပ်ဗတိုက်လဝ်ရ။
ဟိုတ်နူပရေၚ်ပန်ဗတိုက်ဂှ်တုဲ က္တဵုဒှ်လဝ်ပရေၚ်ပန်ပှော်ညးသ္ကအ် လအ်ဗ္ဒာဲၜိုတ်မွဲနာဍဳကီု နူလပါ်ကံၚ်ဇြဳပၞာန်လေဝ် ပန်ဖျေံနၚ်ကဵု လွဟ်ဇၞော် အဆက်ဟွံပိုတ်သ္ကုတ်ရ။
ပ္ဍဲကဵုပရေၚ်ပန်ပှော်ၜါလပါ်ဂှ် ကောန်ဒပ်ကံၚ်ဇြဳပၞာန် ဟွံအောန်နူ (၅)တၠ ဒးချိုတ်အာလဝ်နွံမာန်တုဲ နူလပါ်ဒပ်ပံၚ်ကောံတအ် သ္ဂံၚ် PDF မွဲတၠ ဒးပြဟ်လလုဲအာလဝ်ရဂှ် ညးမၞုံတာလျိုၚ်ဒပ်ပရေၚ်စဵုဒၞာမွဲတၠ ဟီုသ္ဂးလဝ်ရ။
ဟိုတ်နူပေါဲဗတိုက်ဂှ်တုဲ ကောန်ညးဒေသပကာရဳတအ် ဒးဂြိပ်ပါဲဒဴဒၟံၚ် နွံကၠုၚ်ဒၟံၚ်ကီု ညးဒေသလ္ၚဵုတအ်ဂှ်မ္ဂး ဒးအောပ်မာဒၟံၚ် ပ္ဍဲကဵုသ္ၚိရဂှ် ဂွံတီကေတ်လဝ်ရ။
ပ္ဍဲဂိတုသေတ်တေမ်ဗာ စၟတ်တ္ၚဲ (၂၈) တုဲကၠုၚ်တေံဂှ်လေဝ် ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲဗ္ဒပ်ဗၠာဲသၟိၚ်ပကာရဳဂှ် အခိၚ်ဒပ်ပံၚ်ကောံတအ် လုပ်စိုပ်ဗတိုက်လဝ်ဂှ် နူလပါ်ဒပ်ကံၚ်ဇြဳပၞာန် ဟွံအောန်နူ (၃) တၠ ဇီုကပိုက်ဒးချိုတ်အာလဝ် နွံကၠုၚ်ရ၊
ပရိုၚ်-သြၚ်လောန်တိုၚ်(မ်)