ဂဂဝ် – ဖေဖဝ်ဝါရဳ(၁၁)
နကဵုသၟတ် ပါလုပ်ဒၟံၚ် ပ္ဍဲပရေၚ်ပၠန်ဂတးက္ညၚ်ဂွံ သွက်ဂွံစွံလဝ်စိုတ်ဂၠိၚ်ၚ်ကီု သွက်ဂွံညဳသာသၟဟ်န် ကေုာံရေၚ်သ္ကအ်ကီု သွက်ဂွံလ္ၚတ်ဒၟံၚ် အဆက်ဟွံပိုတ်သ္ကုတ်ကီုဂှ် သ္ဂံၚ်တာန်ခေဝ် ဥက္ကဋ္ဌ ဒပ်ပၠတရဴဒဳမဝ်ကရေဇြဳကွးဘာ ဆေၚ်ရာကဵုအလုံကၟိန်ဍုၚ်ဗၟာ (ABSDF) ဟီုသ္ဂးလဝ်ရ။
ဥက္ကဋ္ဌ ABSDF သ္ဂံၚ်တာန်ခေဝ် ကေုာံကောန်သ္ဂံၚ်ဂမၠိုၚ်ဂှ် ပ္ဍဲသၞာံဏံ နူပြဟ်ဟ်တေံ အာစိုပ်လဝ် ဒပ်ပရေၚ်စဵုဒၞာညးဍုၚ်ကွာန်ဒေသယျဝ် (YPDF) အလန်ပထမတုဲ ဟီုသ္ဂးလဝ်ကဵုသ္ဂံၚ်ဂမၠိုၚ် ပ္ဍဲကဵုၝောံခန်ယောနက သာ်ဏံရ။
ဒပ်ပရေၚ်စဵုဒၞာညးဍုၚ်ကွာန် ဒေသယျဝ် (YPDF) ကဵု ABSDF (ဒေသယျဝ်)တအ်ဂှ် နူကဵုသၞာံ ၂၀၂၁ ဂိတုဒဳဇြေမ်ဗာတေံ ထ္ပက်စၟတ်တဲတုဲ ပံၚ်တောဲရေၚ်တၠုၚ်ဒၟံၚ် နဒဒှ်မဟာမိတ် ပ္ဍဲကဵုကဆံၚ်သၟဝ် ပ္ဍဲကိစ္စစပ်ကဵု မပ္တံပရေၚ်ပၞာန်၊ ပရေၚ်နဲကဲကွတ်ပညာ၊ လွဟ်လက်နက်မကမ်၊ တန်ဗ္တောန် ပ္ဍဲအရာပၠန်ဂတးကဵု တၠအဝဵုပၞာန်ဂှ်ရ။
ဒပ်ပၠတရဴဒဳမဝ်ကရေဇြဳကွးဘာ ဆေၚ်ရာကဵုအလုံကၟိန်ဍုၚ်ဗၟာ (ABSDF)ဂှ် ဝၚ်ပၠန်ဂတး ဗီုပြၚ်ဒးတတ်ကၠောံကၠုၚ်ကဆံၚ်ကဆံၚ် ကေုာံပရေၚ်ဆဵုဂဗ၊ ပရောပရာပါလုပ်ကၠုၚ် ပ္ဍဲပရေၚ်ပၠန်ဂတးက္ညၚ်၊ ပရေၚ်ဆက်စၠောံရေၚ်တၠုၚ်ဒၟံၚ် ကရောံအလဵုအသဳ ပရေၚ်ညဳသၟဟ်ကောန်ဂကူ (NUG) ကီု သီုကဵုဂကောံရပ်လွဟ်ကောန်ဍုၚ်အရၚ်တအ်ဂှ်လေဝ် ဟီုထ္ၜးသောၚ်ကလးကဵု ဒပ်ပရေၚ်စဵုဒၞာညးဍုၚ်ကွာန် ဒေသယျဝ်ရဂှ် ဂွံတီကေတ်ရ။
ဒပ် ABSDF ဂှ် ဒှ်ဂကောံပၠန်ဂတး ဒစဵုဒစးဒၟံၚ်ကဵု ပရေၚ်ဒပ်ပၞာန်သီအဝဵု အာယုက် (၃၀) သၞာံပြၚ် မွဲဂကောံတုဲ ကၠောန်သ္ပဒၟံၚ် ပရေၚ်ဗ္တောကဵုဒၟံၚ်ကွတ်ပၞာန် ကေုာံပရေၚ်ထံက်ပၚ်ကဵုဒၟံၚ် ဂကောံစဵုဒၞာ ပ္ဍဲပရေၚ်ပၠန်ဂတးက္ညၚ်တအ်ရ။
ပရိုၚ်-သြၚ်လောန်တိုၚ်(မ်)