မတ်မလီု၊ ဖေဖဝ်ဝါရဳ(၁၁)
ဂကောံမဟာမိတ်ကောဒေံ ပါလုပ်သီုဒပ်ပၞာန်ရခေၚ် (AA) ဒေါံဇူလဝ်ပရေၚ်ပန်ပှ်ောကဵု ကံၚ်ဇြဳပၞာန်ပိဂကောံတအ်ဂှ် ကၠိုဟ်ကေတ်လတူကောန်ဍုၚ်အရၚ် ကောန်ညးဍုၚ်ကွာန် ကၠောန်ဒၟံၚ်ပရေၚ်ပၠန်ဂတးတအ် သီုဖအိုတ်တုဲ နကဵုဓဝ်ဗ္စာကဵုဇကုဇကုနွံနွံ ဆက်ရီုဗၚ်ထ္ၜလဘာ်အာ အရာထ္ၜလဘာ်ဂွံတအ်ရောၚ်ဂှ် ဟီုသ္ဂးကၠုၚ်ရ။
ပ္ဍဲကဵုလိက်သဝဏ် PSLF/TNLA၊ MNTJP/MNDAA ကေုာံ ULA/AA မဒှ်ဂကောံမဟာမိတ်ကောဒေံပိဂကောံ ပလံၚ်ဗစိုပ်လဝ် တ္ၚဲဗကပ်ဗဗေၚ်ညးဍုၚ်ကွာန် မုမ်ယွာ ပေၚ်(၂)သၞာံ ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၉)ဂှ် ချူဇန်ဟီုဂးလဝ်သာ်ဏံရ။
ပ္ဍဲကဵုတၚ်လလောၚ်တြးဂှ် စတမ်နူ သ္ကုတ်လကြဴ သၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ(၁)တုဲဂှ် ညးဍုၚ်ကွာန် ကောန်ဍုၚ်အရၚ် မၞုံဒၟံၚ် ပ္ဍဲကဵုကၟိန်ဍုၚ်ဗၟာတအ် စဵုဒၞာကၠုၚ်တိဍာ်ဇကုတၞဟ်တၞဟ်တုဲ သွက်တၠအဝဵုပၞာန် ရိုဟ်ကၞက်ဂွံပိုတ်သကုတ်အာဂှ် ဒပ်ပရေၚ်စဵုဒၞာညးဍုၚ်ကွာန်၊ ဒပ်ပရေၚ်စဵုဒၞာကောန်ဂကူ၊ ဂကောံစဵုဒၞာဒေတအ် ဒက်ပ္တန်ကၠုၚ်လဝ် နွံကၠုၚ်နာနာသာ်တုဲ နကဵုလွဟ် ၜိုတ်ဒှ်ကဵုဒှ် လုပ်ကၠုၚ်ဒၟံၚ်ပေါဲဗတိုက်ကဵု သၞောတ်စဵုဒၞာပၠန်ဂတးအိုတ်ရ။
ပရေၚ်ချဳဒရာၚ် ဟွံပ္ကီုပရာပ် မဒှ်ဂၠံၚ်တရဴ ပ္ဍဲကဵုဂှ် မွဲဂၠံၚ် ကေုာံပရေၚ်ကဝ်မတဳက္ဍိုက်က္ဍိုပ် ပေါဲဗတိုက်ညးဍုၚ်ကွာန် ဆေၚ်ရာကဵု အလုံပွိုၚ်ဍုၚ်မုမ်ယွာ ဒစဵုဒစးကဵု တၠအဝဵုပၞာန် ဓမံက်ထ္ၜးဒၟံၚ်ဆန္ဒဂှ် ပေၚ်ကၠုၚ်ပွိုၚ်(၂)သၞာံရ။
နကဵုကောဒေံမဟာမိတ်ပိဂကောံဂှ် သ္ပရှ်ေသှ်ေစၟတ်သမ္တီဒၟံၚ် ပၟိက်ဆန္ဒ တၚ်စၟဳပတှ်ေ ကောန်ဍုၚ်အရၚ် ညးဍုၚ်ကွာန် ကၟိန်ဍုၚ်ဗၟာဘဝတုပ်သၟဟ်တအ် လၟိုန်အခိၚ်တုဲ ဒတူလာၚ်ဒၟံၚ် မွဲစွံကဵု ညးမၞုံကဵုတၚ်ဒတူလာၚ် တၚ်ရန်တၟံတုပ်သၟဟ်တအ်မွဲစွံရဂှ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)