ရေဝ်၊ ဖေဖဝ်ဝါရဳ (၁၁)
ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် စနူဂိတုဖေဖဝ်ဝါရဳ (၈) တုဲ ဒပ်ကံၚ်ဇြဳပၞာန်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ဒေသရေဝ်သၟဝ်ကျာဂှ် ညးမၞုံတာလျိုၚ် ဂကောံဒပ်စဵုဒၞါညးဍုၚ်ကွာန်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ဗၞတ် (၆၀) ပြၚ်ပါဂှ်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် လ္ပာ်ကွာန်ကရေၚ် မသ္ပဒတဴဗွဲမဂၠိုၚ် သီုကဵုပါလုပ် ကွာန်ဗာလမု၊ ကွာန်တြေံ ( ရွှာဟောၚ်း) မဒှ်ကွာန်ဂမၠိုၚ် နူလ္ပာ်သ္ကုတ်သၟဝ်ကျာ ပွိုၚ်ဍုၚ်ရေဝ်တံဂှ်ရ။
ၜိုန်ရဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ကီုလေဝ် ဒဵုကဵုအခိၚ်လၟုဟ်ဂှ် ပေါဲဗ္တိုက်ဆေၚ်မုက်တံ က္တဵုဒှ်လဝ် ဟွံမွဲဏီတုဲ ပရေၚ်ပၞာန်ၜါလ္ပာ်တံ သာကြံၚ်မ္ၚိုဟ်ကၠုၚ်ရောၚ်ဂှ် ညးဒုၚ်တာလျိုၚ် ဂကောံဒပ်ဒမၠုက်ရေဝ် ဗိုလ်ကျာန်ယျေတ် သ္ဂးရ။
ဆ္ဂး ဒပ်ကံၚ်ဇြဳပၞာန်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲဒေသရေဝ်သၠုၚ်ကျာ တိဍာ်ထိၚ်ဒဝ် ဗော်ဍုၚ်မန်တၟိတံ ဟွံမွဲဏီပုဟ်ဂှ် ဂွံတီကေတ်ရ။
ၜိုန်ရဒပ်ကံၚ်ဇြဳပၞာန် ထ္ပက်ကရောၚ်ပၞာန် ပ္ဍဲကဵုဒေသရေဝ်သၠုၚ်ကျာတံဟွံမွဲကီုလေဝ် တမ်ဒပ်ဖျေံသ္ဇိုၚ် ကံၚ်ဇြဳပၞာန်တံဂှ် ပန်ပှော်ဗ္တိုက်ဒၟံၚ် နကဵုလွဟ်ဇၞော် ကုဂကောံဇြဟတ်ပၠန်ဂတးတံ နွံဒၟံၚ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ကြဴနူလလောၚ်တြးပရေၚ်အုပ်ဓုပ်ပၞာန်တုဲဂှ် ပတေၚ်ဂြတ်လဝ် ပရေၚ်ဂီုကၠီု အလုံပွိုၚ်ဍုၚ်ရေဝ်မွဲဂှ်တုဲ ပ္ဍဲကဵုကၚ်စၟဳစၟတ် မဖျေံလဝ်ကၠာတေံဂှ်လေဝ် ထပ်ဗပေၚ်စုတ်ဇြဟတ်မၞိဟ်တံတုဲ စၟဳစၟတ်စဳစောတ်ဒၟံၚ် မၞိဟ်အာကၠုၚ်တံ သောဲသောဲဗြဲဗြဲရ။
ပ္ဍဲ (၃၇) ပွိုၚ်ဍုၚ် အလုံမွဲကၟိန်ဍုၚ် သီုကဵုပါလုပ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ပ္ဍဲဂိတုဖေဖဝ်ဝါရဳ (၂) တေံ ကံၚ်ဇြဳပၞာန် လလောၚ်တြးလဝ် ပရေၚ်အုပ်ဓုပ်ပၞာန် မာယှေဝ်လဝ်ရ။
ပရိုၚ်−သြၚ်လောန်တိုၚ်(မ်)