ညံၚ်လေဝ်ပေန်၊ ဖေဖဝ်ဝါရဳ (၁၁)
ပ္ဍဲကဵုတိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ဟိုတ်နူဒးအာ မကမ်လွဟ်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ်ဂှ်တုဲ ညးဒေသ (၁) တၠ ချိုတ်တုဲ (၃) တၠ ကလိဂွံလဝ်ဝပ်ဂှ် KNU ဗဟဵု လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ (၈) တေံရ။
အပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန်ဂှ် ဒပ်ကံၚ်ဇြဳပၞာန် ဇြဟတ်ဒပ်ဗ္ဒါဲ (၅၀) မၞုံဂှ်ဝွံ ပ္ဍဲဂိတုဖေဖဝ်ဝါရဳ (၇) အခိၚ်ဇိုၚ်သဝ်တ္ၚဲဂှ် နူကဵုနာတ်တာန်ကွေန်မွဲကဆံၚ် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန်ဂှ်ရ က္တဵုဒှ်လဝ်ပေါဲဗ္တိုက်ၜါလ္ပာ် ကဵုဒပ်မဟာ (၃) KNLA ပ္ဍဲကဵုဗ္ဒါဲကွာန်အုန်ပေန်သုရ။
ကြဴနူပေါဲဗ္တိုက်က္တဵုဒှ်တုဲဂှ် ဒပ်ကံၚ်ဇြဳပၞာန်ဝွံ နူကဵုဒဒန်နာတ်တာန်ကွေန်ဂှ် နကဵုတၚ်ရန်တၟံနွံနွံ ပန်ပှော်စုတ်လဝ် လွဟ်ဇၞော် (၅၀) မပြၚ် အပ္ဍဲကွာန်ဂမၠိုၚ်ဂှ် ပါလုပ် ပ္ဍဲကဵုတၚ်လလောၚ်တြး KNU ရ။
မကမ်လွဟ်ဇၞော် (၂၂) မ နူကဵုဒပ်ကံၚ်ဇြဳပၞာန်တံ မပန်ပှော်လဝ်ဂှ်ဝွံ ဟိုတ်နူဒတုံဗ္တိုဟ်ထ္ကးအာလဝ် အပ္ဍဲကွာန်အုန်ပေန်သုဂှ်ရ မၞိဟ်တြုံဒၟံၚ်ကွာန်ဂှ်မွဲတၠ ချိုတ်တုဲ သီုကဵုပါလုပ် မၞိဟ်ဗြဴမွဲတၠ (၃) တၠ ဇီုကပိုက်ကလိဂွံလဝ်ဝပ်ဂှ် KNU သ္ဂးလဝ်ရ။
ဟိုတ်နူကဵုပရေၚ်ပန်ပှော်လွဟ်ဇၞော် နူကဵုဒပ်ကံၚ်ဇြဳပၞာန်တံဂှ်ရ ညးဍုၚ်ကွာန် (၄၀၀၀) ပြၚ် နူကဵုကွာန်နှံက်ကုန်၊ ယာန်မျဵုအံၚ်၊ အုန်ချေတ်ကုန်၊ တပျေကုန်၊ ယျေတွေန်ကုန်ကျဳ၊ ယျေတွေန်ကုန်လေဝ် သီုကဵုပါလုပ်ကွာန်အုန်ပေန်သုတံဂှ်ဝွံ ဒးဂြိပ်ဒဴပါဲဒလေတ်ဒၟံၚ် အပ္ဍဲအခိၚ်ဗ္တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)