မတ်မလီု၊ ဖေဖဝ်ဝါရဳ (၁၂)
ဗော်ညဳသၟဟ်မန် ဒှ်ဗော်ပရေၚ်ဍုၚ်ကွာန် ကောန်ဍုၚ်အရၚ်မွဲဗော်ဂှ် သွက်ဂွံပတိုန်စရၚ်စၟတ်သမ္တီ ပ္ဍဲကဆံၚ်ပွိုၚ်ဍုၚ်ဂှ် ကောံဓရီုကဝ်မတဳဗဟိုဝ် ဖျေံကၠုၚ်လဝ်သ္ဂုတ်သွာတ်ရဂှ် ဂွံတီကေတ်ရ။
ဟိုတ်နူတၚ်အပိုၚ်ခြာ သၞောဝ်ဥပဒေ ပတိုန်စရၚ်ဗော်ပရေၚ်ဍုၚ်ကွာန် ကံၚ်ဇြဳပၞာန်လလောၚ်တြးပ္တိတ်ကၠုၚ်လဝ်တုဲ နကဵုဗော်ညဳသၟဟ်မန် သွက်ဂွံဒးကလေၚ်ပတိုန်စၟတ်သမ္တီဗော်ဂှ် ကော်ကၠုၚ်လဝ်ကောံဓရီု ကဝ်မတဳဗဟိုဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၁)ဏံရ။
အတိုၚ်တၚ်သ္ဂုတ်သွာတ် ကောံဓရီုကဝ်မတဳဗဟိုဝ် ကော်လဝ်တ္ၚဲဏံဂှ်မ္ဂး ဖျေံကၠုၚ်လဝ်သ္ဂုတ်သွာတ် သွက်ဂွံပ္တိုန်စရၚ်စၟတ်သမ္တီ ပ္ဍဲကဆံၚ်ပွိုၚ်ဍုၚ်တုဲ အခေါၚ်ဒက်ပ္တန်ဗော် ကေုာံအခေါၚ်ပတိုန်စၟတ်သမ္တီဂှ် ဒးအာတ်ဂရၚ်ပ္တီ ဇရေၚ်ကဝ်မယှေန်ပေါဲရုဲမာဲကၟိန်ဍုၚ် (UEC) ပ္ဍဲပွိုၚ် (၆၀) တ္ၚဲရဂှ် ဂွံတီကေတ်ရ။
ဗော်ညဳသၟဟ်မန်ဂှ် ပ္ဍဲကဵုပေါဲရုဲမာဲတုဲကၠုန်တေံ လုပ်စိုပ်ပြိုၚ်လဝ် ပ္ဍဲကဵုတွဵုရးဍုၚ်မန် တွဵုရးကရေၚ် မပါလုပ်သီုရးလဂုၚ်၊ ရးဗဂေါ၊ ရးတၞၚ်သဳတုဲ ညးစၞး (၁၂) တၠ ဂွံဇၞးကၠုၚ်လဝ်မာဲရ။
ကြဴနူ သၞာံ ၂၀၂၁ ဂိတုဖေဖဝ်ဝါရဳ ပၞာန်သီကေတ်အဝဵုတုဲဂှ် ပံၚ်တောဲကဵု ကံၚ်ဇြဳပၞာန်တုဲ ဗလးဏာလဝ် ညးစၞးဇၞးမာဲ နဒဒှ်ညးလုပ်ဂကောံကံၚ်ဇြဳပၞာန် ကဆံၚ်ကၟိန်ဍုၚ် ကေုာံကဆံၚ်တွဵုရး ၜါတၠရ။
ပ္ဍဲကဵုသၞောဝ်ပတိုန်စရၚ်စၟတ်သမ္တီ ကံၚ်ဇြဳပၞာန်ပျးဌာန်လဝ်ဂှ် ယဝ်ရဒှ်ဗော်စန္ဒက် အလုံမွဲကၟိန်ဍုၚ်မ္ဂး စတမ်နူ တ္ၚဲပတိုန်စရၚ်စၟတ်သမ္တီတုဲ ပ္ဍဲပွိုၚ် (၉၀)တ္ၚဲဂှ် လၟိဟ်ကောန်ဗော် မွဲကိုတ်ကီု သီုကဵုလၟိဟ်သြန်ဂအုံ ကိုတ်လ္ၚီ၊ ပ္ဍဲပွိုၚ် (၁၈၀)တ္ၚဲဂှ် အောန်အိုန်ဒးပံက်ရုၚ်ဗော် ပ္ဍဲပွိုၚ်ဍုၚ် (၁၆၅) ပွိုၚ်ဍုၚ်ဏောၚ်ဂှ် ပျးဌာန်ကၠုၚ်လဝ်ရ။
ဗော်ပရေၚ်ဍုၚ်ကွာန်လ္ၚဵုတအ်ဂှ် ဟိုတ်နူအပိုၚ်အခြာ ပါလုပ်ပ္ဍဲသၞောဝ်ဥပဒေ ကံၚ်ဇြဳပၞာန်ပျးဌာန်လဝ်ဂှ်တုဲ ဖျေံကၠုၚ်သ္ဂုတ်သွာတ် သွက်ဂွံပတိုန်စရၚ်စၟတ်သမ္တီ ပ္ဍဲကဵုမွဲရးဒေသဇၞော် ဟွံသေၚ်မ္ဂး မွဲပွိုၚ်ဍုၚ်ဟေၚ်ရ။
အခိၚ်လၟုဟ်ဏံမ္ဂး အခေါၚ်ဒက်ပ္တန်ဗော် ကေုာံအခေါၚ်ပတိုန်စရၚ်စၟတ်သမ္တီဗော်ဂှ် ဗော်ကျာန်ခိုၚ်ယျေ ကေုာံဗော်မျာန်မပျဳဒဳမိုဝ်ကရေတ်တေတ်တအ်ဟေၚ် ကၠုၚ်အာတ်ဂရၚ်ပ္တီလဝ်ရဂှ် ဂွံတီကေတ် အတိုၚ်တၚ်လလောၚ်တြး ကဝ်မယှေန်ပေါဲရုဲမာဲကံၚ်ဇြဳပၞာန်ရ။
ပရိုၚ်-သြၚ်လောန်တိုၚ်(မ်)