ကျိုက်ထဝ်၊ ဖေဖဝ်ဝါရဳ (၁၂)
ပ္ဍဲတွဵုရးဍုၚ်မန် ။ပွိုၚ်ဍုၚ်ကျာ်ထဝ်၊ ပ္ဍဲကဵုပေါဲဗတိုက်ၜါလပါ် က္တဵုဒှ်လဝ် ပ္ဍဲဗ္ဒာဲကၠအ်ကိုဝ်ကိုဝ် အကြာကွာန်အၚ်္ဂဘိုဝ်ကဵု ကွာန်တေတ်ဇြုက်ပေန်ဂှ် လပါ်ကံၚ်ဇြဳပၞာန် ကောန်ဒပ် (၃) တၠ ပါလုပ်သီုဗိုလ်မွဲတၠ ဒးချိုတ်လဝ်ရဂှ် ဥက္ကဋ္ဌ ကဝ်မတဳကောပ်ကာဲပရေၚ်မိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုဖေဖဝ်ဝါရဳ စၟတ်တ္ၚဲ (၁၁) အခိၚ်နူဂယး ပ္ဍဲအခိၚ်ၜိုတ် (၉)နာဍဳဂှ် အကြာဒပ်ကံၚ်ဇြဳပၞာန် ကၠုၚ်မၚ်ဒၟံၚ်ကၚ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်က္တဵုဒှ်လဝ် ပ္ဍဲဗ္ဒာဲကၠအ်ကိုဝ်ကိုဝ်ဂှ်ရ။
ပေါဲဗတိုက်ဂှ် ရေၚ်ကွဳစက်ကံၚ်ဇြဳပၞာန် သွက်ဂွံတတ်အာ ပွိုၚ်ဍုၚ်ကျာ်ထဝ်ဂှ် ဒပ်ပံၚ်ကောံ KNLA တအ် သွက်ဂွံတံၚ်ခတိုဟ်မာၚ် ဃောကၠုၚ်ဒၟံၚ်ဂှ် ပေါဲဗတိုက်ၜါလ္ပာ် က္တဵုဒှ်လဝ်ရ။
ပ္ဍဲကဵုပေါဲဗတိုက်ၜါလ္ပာ် က္တဵုဒှ်လဝ် ဗ္ဒာဲၜိုတ် (၂၀)မိနေတ်ဂှ် ဟိုတ်နူလပါ်ဒပ်ပံၚ်ကောံ KNLA ကေတ်လဝ်ကၠာတဲမာန်ကၠုၚ်လဝ်ဂှ်ရ လပါ်ကံၚ်ဇြဳပၞာန် ဒးချိုတ်အာ (၃)တၠ ပါလုပ်သီုဗိုလ်မွဲတၠတုဲ လပါ်ဒပ်ပံၚ်ကောံဂှ် ပရေၚ်ဇီုကပိုက် ဂွံလဝ်ဘဲဝပ်ဟၟဲရဂှ် ဥက္ကဋ္ဌ ကောပ်ကာဲပရေၚ်မိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုပေါဲဗတိုက်ၜါလပါ်ဂှ် နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ပ္ဍဲတုၚ်ဇြယာတ် ၜိုန်ရပန်ဖျေံနၚ်လွဟ်ဇၞော် အဆက်ဆက်ကီုလေဝ် လပါ်ဒပ်ပံၚ်ကောံ KNLA ပရေၚ်ဇီုကပိုက်ဒး မမိက်ကဵုမွဲမွဲ ဟၟဲတုဲ ကလေၚ်ဆုတ်တိတ်အာ ဗွဲမအံၚ်ဇၞးမာန်ရ။
ပ္ဍဲဂိတုဂျာန္နဝါရဳ စၟတ်တ္ၚဲ (၅) ဂှ်လေဝ် ရေၚ်ကွဳစက်ကံၚ်ဇြဳပၞာန် ကၠုၚ်လပါ်ကျာ်ထဝ် နူကဵုဝဝ် (၄)ဖ္ဍိုက်ဂှ် ဟိုတ်နူ ဒပ်ပံၚ်ကောံ KNLA တံၚ်ခတိုဟ်လဝ်မာၚ် ပ္ဍဲကွာန်အၚ်္ဂဘိုဝ်တုဲ ကွဳစက်ပၞာန် မွဲဖ္ဍိုက်လီုလာ်အာလဝ်တုဲ ကောန်ဒပ်ကံၚ်ဇြဳပၞာန် (၅)တၠ ဇီုကပိုက် ဂွံလဝ်ဝပ်ရ။
ပ္ဍဲပွိုၚ်ဍုၚ်ကျာ်ထဝ် ပ္ဍဲကဵုဍာန်ကွဳစက် လဂုၚ်-မတ်မလီု ရေၚ်ကွဳစက်ပၞာန် ဒးဒုၚ်ဗတိုက်ဒၟံၚ် ခြာဟွံလအ်ဟွံလအ်တုဲ နူလပါ်ကံၚ်ဇြဳပၞာန် ကၠောန်သ္ပကၠုၚ် ပရေၚ်အောပ်မၚ်ကၚ်၊ ဖျေံဗ္ဒပ်တအ်ရဂှ် ဂွံတီကေတ်လဝ်ရ။
ပရိုၚ်-သြၚ်လောန်တိုၚ်(မ်)