မတ်မလီု-ဖေဖဝ်ဝါရဳ (၁၂)
အလဵုအသဳပရေၚ်ညဳသၟဟ်ကောန်ဂကူဂှ် သွက်ညးဇီုကပိုက် ဂွံလဝ်ဘဲဝပ် ဟိုတ်နူဘဲဒဏ်ကသဳတိ ပ္ဍဲကဵုကၟိန်ဍုၚ်တူရကဳ ကေုာံသဳရဳယာတအ် ဂွံသက်သာခိုဟ်တိုန် ဗွဲမပြဟ်မာန် ဖျေံဗယာပ်ဒၟံၚ်မေတ္တာ မွဲကရောံကဵု ကောန်ညးဍုၚ်ကွာန် ကၟိန်ဍုၚ်ဗၟာမွဲစွံရဂှ် ပလံၚ်ဗစိုပ်လဝ် လိက်သဝဏ်ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၆) အခိၚ်နူဂယးဂှ် သ္ပဗဟိုဝ်ကဵုခရာ (၂၃) ကဳလောမဳတာ ဒမျိုဟ် (၂၄.၁)ကဳလောမဳတာ ဗၟံက်နာဒါဂဳ ပ္ဍဲပွိုၚ်ဍုၚ်ဂါဇြဳယာမ်တာပ်၊ ကၟိန်ဍုၚ်တူရကဳတုဲ ဟိုတ်နူကသဳတိ မၞုံကဆံၚ်သ္ကာတ် (၇.၈) ချဳခတဝ်လဝ်ဂှ်ရ အပံၚ်မၞိဟ် မၞုံပ္ဍဲဒေသတူရကဳ ကေုာံသ္ကုတ်ဒိုဟ်ဗာယပ်ကၟိန်ဍုၚ်သဳရဳယာတအ် ဂၠိုၚ်ကဵုလ္ၚီ ဒးချိုတ်အာလဝ်တုဲ စမြိုၚ်သ္ၚိဌာန် ဂၠိုၚ်ကဵုလ္ၚီတအ်လေဝ် ဒးလီုလာ်ခရိုဟ်စှ်ေလဝ် ဗွဲမဂၠိုၚ်ရ။
ပ္ဍဲလိက်သဝဏ်ဂှ်မ္ဂး ဟိုတ်နူဘဲဒဏ် ကသဳတိတုဲ ဂိုဟ်ကဟောံ အောန်စိုတ် တုပ်သၟဟ်ကဵုဂကောံကၟိန်အိန်ထံၚ် ညးဒးချိုတ်အာ ဟိုတ်နူဘဲဒဏ်ကသဳတိတအ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲအကြာမၞုံကဵုအန္တရာယ်လမျီုဂှ် ဟွံရံၚ်ကဵုလမျီုဇကုတုဲ ဂကောံသ္ပသ္ဇိုၚ်ကဵုပရေၚ်မၞိဟ် ကေုာံဂကောံရီုဗၚ်ဟံၚ်ပြာ်မၞိဟ် ရေၚ်တၠုၚ်ကဵုဒၟံၚ် ကမၠောန်ပရေၚ်ရီုဗၚ် ဍိုက်က်ပေၚ်ၚ်တအ်ကီု၊ အကြာတၚ်ခက်ခုဲနာနာဂှ် ဂကောံကၟိန်ဍုၚ်နာနာ ပလံၚ်ဗစိုပ် ရီုဗၚ်ကဵုလဝ် အရီုဗၚ်ထံက်ပၚ်ပရေၚ်မၞိဟ် ဗွဲမဂတာပ်အခိၚ် မပါလုပ်သီုညးတာလျိုၚ်ကၟိန်ဍုၚ်တူရကဳ ကေုာံသဳရဳယာတအ် ပရေၚ်က္ဍိုက်က္ဍိုပ် ကေုာံပရေၚ်မၚ်မွဲရံၚ်စံၚ်ညးဍုၚ်ကွာန်တအ် သၞောတ်စှ်ေစှ်ေ တၚ်ဏာဂုဏ်သီုဖအိုတ်ရဂှ် ဓမံက်ထ္ၜးလဝ် ပ္ဍဲလိက်ဝဏ် NUG ရ။
ရုၚ်ကလုတ်တမာန် ဖျေံသ္ဇိုၚ်ပ္ဍဲကၟိန်ဍုၚ်ဗၟာဂှ်လေဝ် ကဵုဒါန်ထံက် ပၚ်ကပေါတ်ရီုဗၚ် သွက်ညးဍုၚ်ကွာန် ဒးဒုၚ်လဝ်ဘဲဒဏ်ကသဳတိမာန်ဒၟံၚ်ရဂှ် လလောၚ်တြးလဝ် ပ္ဍဲမုက်လိက်ရုၚ်ကလုတ်တမာန်ညးတအ်ရ။
နကဵုကောန်ဍုၚ်တူရကဳ၊ မိဿဟာဲကၟိန်ဍုၚ်ဗၟာ ကေုာံမိဿဟာဲတၞဟ်သ္အာၚ် မိက်ဂွံကဵုဒါန်ထံက်ပၚ်တအ်ဂှ် ကပှ်ပကောံရေၚ်တၠုၚ်ကေတ်နၚ် ကပေါတ်ထံက်ပၚ်ရီုဗၚ်တအ်ဂှ်တုဲ ကၠုၚ်စိုပ်ကဵုဒါန်ထံက်ပၚ် ပ္ဍဲရုၚ်ကလုတ်တမာန် မၞုံဒၟံၚ် ပ္ဍဲပွိုၚ်ဍုၚ်မယာန်ကုမ်၊ ဂၠံၚ်ကာန်ယာတ်တာ၊ စၟတ် -၁၉ (အေဘဳ)တုဲ သွက်ဂွံကဵုဒါန်ထံပၚ်ဂှ် ကော်ဘိက်လဝ်ရ။
ပရိုၚ်-သြၚ်လောန်တိုၚ်(မ်)