လၟိုၚ်-ဖေဖဝ်ဝါရဳ(၁၂)
ပ္ဍဲတွဵုရးဍုၚ်မန်၊ မကမ်လွဟ်ဇၞော် ဒပ်အမၠံက်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲကွာန်တၟံကၞေၚ် ဍုၚ်လၟိုၚ်ဂှ် ဟိုတ်နူပြဟ်ဒတုံစှ်ေအာ ပ္ဍဲဘာလကျာ် (ရောဖိုအ်ဂေဟ်) ကွာန်ဇြုၚ်ဇြဳမျာၚ်တုဲ ကောန်ထပိုဲမွဲဇကု ဒးပဝ်အာလဝ်တုဲ ခမဳမွဲဇကု ဇီုကပိုက်ဂွံလဝ်ဘဲဝပ်ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၀) အခိၚ်ဇိုၚ်သဝ်တ္ၚဲဂှ် ပန်ဖျေံတုဲ ကောန်ထပိုဲဂှ် ဒးပဝ်အာပ္ဍဲဒၞာဲဂှ်တုဲ ခမဳဂှ်မ္ဂး ပလံၚ်ဗစိုပ်ဏာလဝ် ရုၚ်ဂဥုဲလၟိုၚ်ရဂှ် ဂွံတီကေတ်ရ။
ကြဴနူဒပ်ပရေၚ်စဵုဒၞာဒေသတအ် ဗတိုက်လဝ်ကရောၚ်ပၞာန် ကံၚ်ဇြဳတုဲဂှ် ဟိုတ်နူဒးဂိလဝ်ဂှ်ရ နူကဵု အမတ (၃၁၇) ပန်ပှော်ဖျေံနၚ်လဝ်လွဟ်ဇၞော် ကြာန်ကြာန်ဓမာန်မာန်တုဲ ဟိုတ်နူဒတုံပြဟ်ခတိုဟ်ပါ်အာလဝ် ပ္ဍဲကွာန်ဇြုမ်ဇြဳမျာၚ် (၄)မတုဲ ဒတုံခတိုဟ်လဝ် ပ္ဍဲသ္ၚိဒၟံၚ်မၞိဟ် ကေုာံဘာလကျာ်ဂမၠိုၚ်ရ။
အကြာကွာန်အံၚ်တပျေကဵု ကွာန်ကၠအ်လမဴ ပ္ဍဲကဵုဒၞာဲတာဂျေဝ်ခဳဂှ် ဒပ်ဒမၠုက်ဒဵုလမ္စံက် ကၠတ်ပန်ပှော်လဝ် ကရောၚ်ပၞာန်ကံၚ်ဇြဳ ဇြဟတ်မၞုံ (၆၀)တၠ ပ္ဍဲဂိတုဖေဖဝ်ဝါရဳ စၟတ်တ္ၚဲ(၁၀) အခိၚ်နူဂယးတုဲဂှ် နူလပါ်ကံက်ဇြဳပၞာန် ဂွံလဝ်ဝပ် (၃)တၠရဂှ် လလောၚ်တြးလဝ် ပရိုၚ်ရ။
သ္အာၚ်နူဂှ်ပၠန် ကွဳစက်ရီုပၞာန်ကံၚ်ဇြဳ (၂)ဖ္ဍိုက် ကၠုၚ်နူဍုၚ်ရေဝ်ဂှ်လေဝ် အခိၚ်ပ္ဍိုက်ဏာမၞိဟ်ဒးဝပ်တုဲ ကလေၚ်စှ်ေအာဂှ် ဒပ်ဒမၠုက်ဒဵုလမ္စံက် ထပ်ဗတိုက်ပန်ပှော်လဝ်ပၠန်တုဲ လပါ်ကံၚ်ဇြဳပၞာန် ဒးချိုတ်အာ (၅)တၠတုဲ ဒးလဝ်ဘဲဝပ် (၃)တၠ ကွဳစက်မွဲဖ္ဍိုက် လီုလာ်အာလဝ်ရဂှ် ဂွံတီကေတ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ(၂၀) အခိၚ်နူဂယးဂှ်လေဝ် ဟိုတ်နူဒပ်အမၠံက်ကံၚ်ဇြဳပၞာန် ဖျေံလဝ်သ္ဇိုၚ်ကွာန်တၟံကၞေၚ်၊ ဍုၚ်လၟိုၚ်ဂှ် ပန်ဖျေံနၚ်လွဟ်ဇၞော်တုဲ ညးဗြဴနူကွာန်တၟံကၞေၚ်ၜါတၠ ဂွံလဝ်ဘဲဝပ်ရဂှ် ဂွံတီကေတ်ရ။
ကြဴနူဒပ်ပၞာန်သီအဝဵုတုဲ အကြာဒပ်ပရေၚ်စဵုဒၞာကဵု ဒပ်ကံၚ်ဇြဳပၞာန် ပေါဲဗတိုက်ဇီုကပိုက်က္တဵုဒှ်ဒၟံၚ် ဟွံလအ်ဟွံလအ်တုဲ နူလပါ်ကံၚ်ဇြဳပၞာန် လလောၚ်တြးလဝ် ပွိုၚ်ဍုၚ်ရေဝ်ဂှ် နဒဒှ်ပရေၚ်အုပ်ဓုပ်ပၞာန်ရ။
ပရိုၚ်-သြၚ်လောန်တိုၚ်(မ်)