သေတ်တွေ၊ ဖေဖဝ်ဝါရဳ(၁၄)
သ္ၚိဇၞော်ဒးရး မၞုံပ္ဍဲကွာန် ဗ္ဒာဲဒၞာဲဒပ်ကံၚ်ဇြဳပၞာန် ဖျေံလဝ်သ္ဇိုၚ် မၞုံပ္ဍဲတွဵုရးရခေၚ်သၟဝ်ကျာတအ်ဂှ် ကောန်ဒပ်ကံၚ်ဇြဳပၞာန်တအ် ပလီုပလာ်တုဲ ကေတ်ဏာကပေါတ်ကညောတ်သိုၚ်သ္ၚိ ကေုာံကပေါတ်အရပ်စပ်တအ်ရဂှ် ဂွံတီကေတ် နူညးဒေသဂမၠိုၚ်ရ။
အကြာဒပ်ကံၚ်ဇြဳပၞာန်ကဵု ဒပ်ပၞာန်ရခေၚ် (AA)တအ်ဂှ် ၜိုန်ရဒေါံဇူလဝ် ပရေၚ်ပန်ပှော် အတိုၚ်ဆေၚ်ရာကဵု အထံက်အရံၚ် ပရေၚ်မၞိဟ်ကီုလေဝ် ကောန်ဂကူရခေၚ်ပါဲဒဴဘဲပၞာန် မံၚ်တန်တဴဒၟံၚ် ပ္ဍဲတိဍာ်ဒပ်ပၞာန်ထိၚ်ဒဝ်လဝ်တအ် ဗွဲမဂၠိုၚ် သွက်ဂွံကလေၚ်စဴ ဌာန်ဒၟံၚ်ဂှ် ဟိုတ်နူဟွံပြေပြံၚ်ဏီတုဲ အခိၚ်သ္ၚိဂမၠိုၚ် ဒှ်ဒၟံၚ် ညံၚ်ကဵုတၠဟၟဲဂှ် ကောန်ဒပ်ကံၚ်ဇြဳပၞာန်တအ် ပလီုပလာ်ကၠုၚ်ဒၟံၚ် သ္ၚိဌာန်ညးဍုၚ်ကွာန်တအ် ဗီုလၟုဟ်ဏံရ။
သ္ၚိဒၟံၚ် မၞုံပ္ဍဲကွာန်တေန်မ ပွိုၚ်ဍုၚ်ကျောက်တဝ် တွဵုရးရခေၚ်သၟဝ်ကျာတအ်ဂှ် နူအခိၚ်ကောန်ကွာန်တအ် ဟၟဲတုဲဂှ် ဒးဒုၚ်ပလီုရိုဟ်ဒၟံၚ်တုဲ ဒပ်ကံၚ်ဇြဳပၞာန်ဖျေံလဝ်ဗ္ဒပ် ပ္ဍဲကဵုမွဲဗွိုၚ်အကြာဂှ်တုဲ ဒှ်ဒၞာဲအခေါၚ်ညးဍုၚ်ကွာန်တအ် လုပ်တိတ်အာကၠုၚ်ဟၟဲရဂှ် ညးဒေသတအ် ဟီုသ္ဂးလဝ်ရ။
ပရေၚ်ပလီုပလာ် ကပှ်ကေတ်ဏာဒၟံၚ် ကပေါတ်ကညောတ်ဒြပ်ရတ်ညးဍုၚ်ကွာန်တအ် ဗီုဏံ အေအေလေဝ် လုပ်စဵုဒၞာကၠုၚ်ဟၟဲကီု ဂွံဟီုဂးလဝ် မမိက်ကဵုမွဲမွဲလေဝ် ဟၟဲကီုဂှ်ရ ပ္ဍဲလတူဒးဒုၚ်စသိုၚ် ဖိုလ်အဆက်ပရေံပရေံ ဟိုတ်နူဒေါံဇူပရေၚ်ပန်ဂှ် ပရေၚ်ဟီုဂး အကြာညးဒေသဂမၠိုၚ် မံက်တိတ်ကၠုၚ်ရ။
“ပ္ဍဲကဵုဒၞာဲတအ်ဂှ် ကၠာနူဟွံဂွံဒေါံပန်ပှော်ဏီ ပြဒ္ဒညာဟၟဲပုဟ်။ စေဝ်ဍေံ စေဝ်ဇကု ဟွံၜက်ပုဟ်။ ညးနွံဒၟံၚ်လပါ်အေအေဂှ်တှ်ေ ဒးရံၚ်လပါ် အေအေရ။ မၞိဟ်နွံဒၟံၚ် ပ္ဍဲတိဍာ်ဒပ်ပၞာန်အုပ်ဓုပ်ဂှ်လေဝ် ဒးဖေက်ဒပ်ပၞာန်ရ။ ဒေါံဇူပရေၚ်ပန်ပှော်ဂှ် ဒပ်ပၞာန် မိက်ဂွံလုပ်တှ်ေလုပ်၊ မိက်ဂွံတိတ်တှ်ေတိတ်ဂှ်ရ ဒှ်ကၠုၚ်သွက်ဂွံပတိတ်ဂလာန်သၟာန် ပ္ဍဲလတူလမျီုပိုန်ဒြပ် သွက်မၞိဟ်ရးသၟဝ်ဝ်တအ်ရ။ သွက်ညးဍုၚ်ကွာန်ဟာ၊ သွက်ဂကောံၜါဂကောံဟာရ” ဂှ် ညးဒေသကျောက်တဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကွာန်တေန်မ မၞုံအကြာဍုၚ်ကျောက်တဝ် တွဵုရးရခေၚ်သၟဝ်ကျာကဵု ဍုၚ်ပလေတ်ဝ တွဵုရးချေၚ်သၠုၚ်ကျာ သ္ကုတ်လတူက္ၜဳကုလာတာန်ဂှ် နူကဵုသၞာံ ၂၀၂၀ ပေၚ်တေံ ဒပ်ကံၚ်ဇြဳပၞာန် ကၠုၚ်စိုပ်ဖျေံလဝ်ဗ္ဒပ်တုဲ ဟိုတ်နူလုပ်စိုပ် ဗက်ရပ်ဒၟံၚ် ကောန်ကွာန်တအ်၊ စံၚ်ပလီုကၠုၚ်ဒၟံၚ် သ္ၚိဌာန်တအ်တုဲ ဒှ်ကွာန် ဒးဂြိပ်ဒဴဒၟံၚ် သီုအလုံမွဲကွာန်ရ။
ပ္ဍဲကဵုအခိၚ်ဂှ် ပ္ဍဲမွဲဒမြိပ်က္ၜဳကုလာတာန်ဂှ် အကြာဒပ်ပၞာန်ကဵု ဒပ်ပၞာန်ရခေၚ်(AA) တအ် ဟိုတ်နူပေါဲဗတိုက်မဳဝ ပေါဲဗတိုက်အခိၚ်လအ်အိုတ် ပွိုၚ်(၃၀)တ္ၚဲဂှ်တုဲ ကောန်ကွာန်ဗ္ဒာဲဗ္ဒာဲတအ်ဂှ် ဒးဂြိပ်ဒဴတိတ် နူဌာန်ဒၟံၚ်ကီု ကွာန်မပ္တံကဵုမုမ်တာန် မပါလုပ်သီုတေန်မတ်ဂှ် ဒးဒုၚ်စံၚ်ပလီုလဝ်ရ။
ပ္ဍဲကဵုကွာန်တေန်မ သ္ၚိဟွံတူလဝ်ပၟတ် သှ်ေဒၟံၚ် ၜိုတ်(၄၀၀) မနွံတုဲ သ္ၚိသိုၚ်လဝ်နကဵုဆုဂကူခိုဟ် နွံကဵုၚုဟ်မး ဗွဲမဂၠိုၚ်တအ်ဂှ် ကံၚ်ဇြဳပၞာန်လုပ်စိုပ် ပလီုပလာ် ကေတ်ဏာဒၟံၚ်ရ။
ညးပါဲပၞာန် နူကွာန်တေန်မကဵု ကွာန်ပွဳဗွိုၚ်တအ်ဂှ် ဒးပါဲဒၟံၚ်ပၞာန် နူကဵု သၞာံ ၂၀၂၀ စဵုကဵု ၂၀၂၃ ဏံ ဗ္ဒာဲပွိုၚ် ပန်သၞာံတအ်ဂှ် ဟိုတ်နူတၚ်ထ္ၜးဟိုတ် ပရေၚ်ဂီုကၠီုတုဲ စဵုကဵုအခိၚ်လၟုဟ်ဏံ ညးတအ်ဟွံဂွံအခေါၚ်အာရံၚ်သ္ၚိဒၟံၚ် ကေုာံကၠအ်သွဝ်ညးတအ်ဏီရ။
“အေအေဟီုဒၟံၚ် ကၠောန်ကဵုသွက်ညးဍုၚ်ကွာန်တအ်ရဟီုဂှ် လၟုဟ်ဏံ ဗန်တဲတုဲကျောဝ်ရံၚ်ဒၟံၚ်ဟာဂှ် ပိုဲမိက်ဂွံသၟာန်ရ။ အခိၚ်ဍေံတအ်ကဵု ဍေံတအ် ပြေပြံၚ်ဒၟံၚ်ညးသ္ကအ်တှ်ေ မုမိက်ဂွံကေတ်တ် မုမိက်ဂွံကၠောန်န် ဓလေတ်ကဵုလဝ်မုက်ရ။ ယဝ်ရဍေံတအ်နွံကၠုၚ်ပၟိက်တှ်ေ ဒှ်ဟတေံရ ဒှ်ဟဏံရ ဂးတုဲ က္တဵုကၠောန်ရ။ အခိၚ်ဍေံတအ်နွံပၟိက်တှ်ေ အေအေဂှ် ညံၚ်ကဵုသွက်ဍုၚ်ညံၚ်ညံၚ် သွက်ကောန်ဍုၚ်အရၚ်ညံၚ်ညံၚ် ကၠောန်ဒၟံၚ်ရ။ လအခိၚ်ရိုဟ်ခရိုဟ်ကေတ်ဏာဏံတှ်ေ ဒဒှ်ရညးတအ်ဟၟဲပၟိက်ကီု၊ ထေက်ကဵုဒးချိၚ်ချကီု။ ဒှ်ကၠုၚ်ပရေၚ်ကြံၚ်မ္ၚိုဟ်မာန်ဏောၚ်ကီု ဒးပ္တိတ်တၚ်လလောၚ်တြးဏောၚ်လေဝ်” ဗီုဏံ ညးဒေသ တာန်တွောဲ မွဲတၠ ဟီုသ္ဂးလဝ်ရ။
စနူကဵုအခိၚ်ဒပ်ပၞာန်ရခေၚ် (AA) ကဵု ဒပ်ပၞာန် ဒေါံဇူပရေၚ်ပန်ပှော် အလန်ပဌမတုဲဂှ် သွက်ကောန်ကွာန်တေန်မတအ် ဂွံကလေၚ်စဴဌာန်ဒၟံၚ်ဂှ် ပလံၚ်ဗစိုပ်လဝ်လိက် ဇရေၚ်ကံၚ်ဇြဳတွဵုရး ကေုာံ ဥက္ကဋ္ဌကံၚ်ဇြဳပၞာန် မေန်အံၚ်လှာၚ် နွံကၠုၚ် (၉)ဝါပေၚ်ၚ်ရ။
နကဵုညးပါဲပၞာန်ရခေၚ်ဂမၠိုၚ် ကၠာဟွံဂွံကလေၚ်စဴဌာန်ဒၟံၚ်ဏီဂှ် ဟိုတ်နူပရေၚ်ပလီုပလာ် သ္ၚိဒၟံၚ်တအ် နွံဒၟံၚ်ဂှ်ရ ကိစ္စသွက်ဂွံစဵုဒၞာကဵု ကေုာံသွက်ဂွံရုပ်သီကဵု ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲစမြိုၚ်ပရေၚ်ဘာသာ ကေုာံဗ္ဒာဲဒၞာဲသ္ၚိဌာန်ညးဍုၚ်ကွာန်တအ်ဂှ် ၜိုန်ရအာတ်မိက်ကၠုၚ်လဝ်ကီုလေဝ် ဒးဒုၚ်သ္ပကၠုၚ်လဝ်မဇ္ဇျဟ်ရဂှ် ဂွံတီကေတ်ရ။
ဥူလှတုၚ် ဂအုပ်နာဲဗ္စာတွဵုရး ညးမၞုံအခေါၚ်ဟီုဂး တွဵုရးရခေၚ်ဂှ် နကဵုအလဵုအသဳ သွက်ဂွံကလေၚ်ပလံၚ်သၟာဒဒိုက် ဗစိုပ်ကဵုဌာန်ဒၟံၚ်ညးတအ်ဂှ် ပလေဝ်ပလေတ်လဝ်တုဲ ပ္ဍဲကဵုဒၞာဲလ္ၚဵုတအ်ဂှ် ၜိုန်ရကံက်ကေတ်ဒၟံၚ်စရၚ် ညးကလေၚ်စဴတအ်ကီုလေဝ် ကွာန်ပ္ဍဲပွိုၚ်ဍုၚ်ယျတေံတံၚ်ကဵု ကျောက်တဝ်လ္ၚဵုတအ်ဂှ် ဟိုတ်နူအကာဲအရာပရေၚ်ဂီုကၠီုတုဲ ဂွံအခေါၚ်စဴ မာန်ဟွံသေၚ်ဏီရဂှ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)