တၚ်ဆက်စၠောံသၟာန်သွဟ်လဝ်ကဵု ညးဂၠိုက်ဂၠာဲသ္ၚဳဂၠိပ် ပရေၚ်ဍုၚ်ကွာန် ဒံက်တာသာၚ်ကျဳဇြေန်သိုဝ်။
အခေါၚ်သ္ဇိုၚ်ဝန်တအ်ကီု သီုကဵုကောန်အရာပ် ညးဍုၚ်ကွာန်တအ် ရပ်လွဟ်လက်နက်ဂှ် ရုၚ်ဝန်ဇၞော်၊ ဌာနဝန်ဇၞော် ပရေၚ်အပ္ဍဲဍုၚ်ကံၚ်ဇြဳပၞာန်၊ လလောၚ်တြးကၠုၚ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၁) ဂှ်ရ။ ပ္ဍဲကဵုအခေါၚ် ပရေၚ်ရပ်လွဟ်ဂှ် သ္အာၚ်နူကဵုသ္ဇိုၚ်ဝန်တအ်တုဲ ကောန်အရာပ်ညးဍုၚ်ကွာန်တအ်လေဝ် ဂရၚ်ပ္တိန် အာတ်အခေါၚ် ရပ်လွဟ်မာန်ရဂှ် ဟီုသ္ဂးလဝ်ရ။
ပရေၚ်လလောၚ်တြးကၠုၚ် အခေါၚ်ရပ်လွဟ်ဂှ် တၚ်ရန်တၟံ ပ္ဍဲကံၚ်ဇြဳပၞာန် ဗီုလဵုနွံဒၟံၚ်ရော။ ဖိုလ်ပရေံပရေံ ဗီုလဵု က္တဵုဒှ်ကၠုၚ်မာန်၊ စပ်ကဵုမူဝါဒ အခေါၚ်ရပ်လွဟ် ကၟိန်ဍုၚ်နာနာတအ်တုဲ ဆက်စၠောံသၟာန်သွဟ်လဝ်ကဵု ဒံက်တာသာၚ်ကျဳဇြေန်သိုဝ်ရ။
-အလန်ကိုပ်ကၠာအိုတ်ဏံ ပ္ဍဲလတူကံၚ်ဇြဳပၞာန် လလောၚ်တြးကၠုၚ် မူအခေါၚ်ရပ်လွဟ်မာန် သီုကောန်အရာပ်ညးဍုၚ်ကွာန်ဂှ် ဗီုလဵုညာတ်ကေတ်ရော။
ပ္ဍဲအခိၚ်ပဋိပက္ခပရေၚ်ပၞာန် ဂၠိုၚ်ဒၟံၚ်ဏံ ညးပါလုပ် ပ္ဍဲပဋိပက္ခပရေၚ်ပၞာန်ဂှ် နွံဒၟံၚ်တၞဟ်ခြာရ။ ပ္ဍဲကဵုလပါ်ပရေၚ်ပၠန်ဂတးပိုဲကဵုဒှ်၊ လပါ်ဒပ်ပၞာန်ကဵုဒှ် နူကဵုတံဝါဒိတေံ ရန်လဝ်သွက်ဂွံရပ်လွဟ်တုဲ ညးတအ်ပါလုပ်ဆေၚ်စပ်ကၠုၚ်တၞဟ်ခြာနွံရ။ ဟီုတှ်ေ ပ္ဍဲကဵုဗီုပြၚ်ဏံဂှ် ညးလဵုအန္တရာယ်နွံရော၊ ညးလဵုအန္တရာယ်ဟၟဲရောဂှ် ဘာသာညးတအ် ညးတအ်စၟတ်သမ္တီလဝ် တုဲတုဲဒၟံၚ်ရ။ ဆဂးလၟုဟ်ဏံဂှ် သ္ဇိုၚ်ဝန်လပါ်ညးအရာပ်တအ်၊ မၞိဟ်ဟွံဆေၚ်စပ် ပါလုပ် ပ္ဍဲပရေၚ်ပၞာန်နူတံဝါဒိတေံ တုဲပၠန်ပရေံနူဂှ်ပၠန် နူကဵုသီအဝဵုတုဲဂှ် ပ္ဍဲကဵုတွဳဗွိုၚ်ပရေၚ်မၞိဟ်ပိုဲတအ် အကြာညးမွဲကဵုမွဲ ပရေၚ်ဟွံဂံၚ်ပတှ်ေစှ်ေစိုတ်တအ် က္တဵုဒှ်ကၠုၚ်ဒၟံၚ်ဂၠိုၚ်ရ။
အခိၚ်သံသယ ညးမွဲကဵုညးမွဲ ဇၞော်တိုန်ကၠုၚ်ဒၟံၚ်ဏံဂှ် ဗ္ဂပ်စုတ်ကဵုလွဟ်ဗီုဏံဟီုဂှ် အန္တရာယ်ဇၞော်လောန်ရ။ မုဒှ်ရောတှ်ေ မၞိဟ်တအ်ဂှ် မိက်ဂွံ ဒှ်မၞိဟ် နူကဵုတံဝါဒိတေံလေဝ် သွက်ဂွံရပ်လွဟ် သွက်ဂွံပါလုပ်ပရေၚ်ပၞာန်ဂှ် ဟွံသေၚ်ပုဟ် ။ ဒှ်သ္ဇိုၚ်ဝန်ညးအရာပ်တအ်ရ။ တုဲပၠန် ကိစ္စစပ်ကဵုလွဟ်လက်နက်တအ်တုဲ ပရဟ်ဒုၚ်ပလေဝ်ပလေတ်လဝ် ပကတ်ပကေၚ်လဝ်ဟွံသေၚ်ပုဟ်။ ဂုဏ်နူဂှ်ရ သာတုဲ ပရေၚ်ဇီုကပိုက်ဒး ပ္ဍဲကွာန်ပ္ဍဲအရာပ်တအ် ပဋိပက္ခသာတုဲ ဂၠိုၚ်တိုန်ကၠုၚ်မာန်ရ။ ဗွဲတၟေၚ်တှ်ေ ပ္ဍဲအကြာညးအရာပ်တအ် ဗီုဏံဂှ် ပဋိပက္ခလွဟ်လ်ကနက်တအ်ပါလုပ်ဒၟံၚ် က္တဵုဒှ်ကၠုၚ်ယျဂးတုဲ အရာဗၠေတ်မှာပလေဝ်ပလေတ်ဟွံဂွံတအ် သာတုဲကလိလောန်ကၠုၚ် ဂၠိုၚ်တိုန်မာန်ဏောၚ် ချိၚ်ခယျကေတ်ရ။
-မွဲပၠန်ဂှ် ပရေၚ်လလောၚ်တြးမူအခေါၚ်ရပ်လွဟ်ဂှ် တၚ်ရန်တၟံ ပ္ဍဲကံၚ်ဇြဳပၞာန် ဗီုလဵုနွံရော။
သ္ဇိုၚ်ဍေံ ဗွဲအပြောံတှ်ေ စဵုကဵုဒှ်ကၠုၚ်မွဲဒမြိပ်ဂှ် ဍေံတအ်ဂွံထိၚ်ဒဝ် ပ္ဍဲဍုၚ်ဂှ် ခက်ခုဲကၠုၚ်ဟီုဂှ် မံက်ကၠးဒၟံၚ်ရ။ လကြဴအိုတ်ဏံ မာယှေဝ်လဝ်လေဝ် ဍေံတအ်ပ္တိတ်လဝ်ရ။ တုဲပၠန် အခိၚ်ထိၚ်ဒက်ဒၟံၚ်ဂှ် ပ္ဍဲကဵုဒၞာဲဟွံဂွံပ္တိတ်လဝ် မာယှေဝ်လဝ်ဏီတအ်ဂှ်လေဝ် ပဋိပက္ခရပ်လွဟ် ဗွဲတၟေၚ်တှ်ေ ပရေၚ်ပန်ဗတိုက်ပ္တဝ်လဝ်ကဵု ညးဆေၚ်ဆက်ကဵု ကံၚ်ဇြဳပၞာန်တအ် နွံကၠုၚ်ဒၟံၚ်ဂှ်ရ သွက်ဂွံကဵုပရေၚ်ဂီုကၠီုဂှ် ခက်ခုဲကၠုၚ်ရ။ ဟိုတ်၈ှ်ရ ဗ္ဂပ်စုတ်က္ဍိုပ် ပရေၚ်ဂီုကၠီုတုဲ ပ္ဂပ်ကဵုညးဍုၚ်ကွာန်တအ်လွဟ်ဂှ် ပဋိပက္ခ နွံဒၟံၚ်ပ္ဍဲဍေံတအ်ဂှ် ညံၚ်ဂွံဒှ်အာဗီုပြၚ်ပဋိပက္ခအကြာကောန်ဍုၚ်ကွာန်ရေၚ်သ္ကအ်ဂှ် ကၠောန်သ္ပဒၟံၚ်ရဂှ် ပိုဲသ္ၚဳဂၠိပ်ပါ်ပါဲကေတ်မာန်ရ။
မုဒှ်ရောတှ်ေ အရာဏံဂှ် ပ္ဍဲအကြာညးဍုၚ်ကွာန်ကဵု ညးဍုၚ်ကွာန် ပ္ဂပ်လဝ်လွဟ်မွဲအခိၚ်ဏံဂှ် ယဝ်ရပရေၚ်ပြိုက်ဂစိုတ် ဗီုပြၚ်ဏံ ဒှ်ကၠုၚ်ဏောၚ်တှ်ေ ဒှ်ကၠုၚ်ဟိုတ် ကိစ္စညးဍုၚ်ကွာန်တအ် ဂိသ္ကေဝ်ရေၚ်သ္ကအ်ရ။ ပ္ဍဲကဵုကွာန်ပိုဲ ပ္ဍဲအရာပ်ပိုဲ ဒက်ဂကောံတုဲ ဗတိုက်ကၠုၚ်ညးသ္ကအ်မာန်ကၠုၚ်ရ။ ဒှ်ကၠုၚ်တၠုၚ်လအာဗီုဏံဏောၚ်တှ်ေ နဒဒှ်ဗီုပြၚ်ကံၚ်ဇြဳပၞာန် နစကကဵု ဂကောံပရေၚ်ပၠန်ဂတး လပါ်ဏံဟွံသေၚ်တုဲ ဒှ်ပဋိပက္ခ ပ္ဍဲအကြာညးဍုၚ်ကွာန် ထံက်ဂလာန်ကဵုနစကကဵု ညးဍုၚ်ကွာန်ဒစဵုဒစးကဵုနစကဂးတုဲ ဍေံတအ်ထ္ၜးကၠုၚ်ဟိုတ်ဂွံရ။ အရာတအ်ဏံဂှ် ဍေံတအ်ဖန်ဗဒှ်ဏောၚ်ဂှ် အဲညာတ်ကေတ်ရ။
-အလန်လကြဴအိုတ်ဏံ မူဝါဒအခေါၚ်ရပ်လွဟ် ပ္ဍဲကၟိန်ဍုၚ်နာနာတအ်ဂှ် နွံဒၟံၚ် ဗီုပြၚ်လဵုရော။ စပ်ကဵုဖိုလ်ပရေံပရေံတအ်တုဲ ဟီုလဴထ္ၜးကဵုညိ။
အတိုၚ်ကၟိန်ဍုၚ်တှ်ေ ဗီုကဵုအမေရိကတအ်တှ်ေ အခေါၚ်အရာရပ်လွဟ်ဟီုဂှ်တှ်ေ ပျးဌာန်လဝ် နဒဒှ်အခေါၚ်အရာ ကောန်ဍုၚ်ဍေံတအ် နွံဒၟံၚ်ရ။ ဆဂးတၚ်ပျးဌာန်ဂှ်ရ လၟုဟ်ဏံ ဒှ်ဒၟံၚ် ပ္ဍဲကၟိန်ဍုၚ်ဍေံတအ် ပရေၚ်ပန်ပှော်ပ္ဍဲဘာတံ၊ ပရေၚ်ပန်ပှ်ော ဒှ်ကၠုၚ် ဟိုတ်နူပရေၚ်က္ဍုဟ်မၠေံဘာသာ ဂကူတုဲ ဒှ်ကၠုၚ်တအ်၊ ပရေၚ်ချိုတ်ဂျိုၚ် နွံကၠုၚ်ဒၟံၚ်တုဲ စပ်ကဵုမူဝါဒဂှ်ရ ညးတအ်ကလေၚ်ကယျာန်ဝါတ်ကၠုတ် ညးသ္ကအ်နွံကၠုၚ်ရ။ ကၟိန်ဍုၚ် ကဵုကၠုၚ်အခေါၚ်ရပ်စပ်လွဟ်တၞဟ်တအ်ဂှ်လေဝ် နွံကၠုၚ်ဗီုဏံရ။ ဆဂးဒးတီလဝ်ဂှ်တှ်ေ ကဵုဏာအခေါၚ်ရပ်လွဟ် ဂွံအာအခေါၚ်ရပ်လွဟ်တုဲဂှ် သွက်ဂွံကလေၚ်ရုပ်သီအခေါၚ်ရပ်လွဟ် ဝါတ်ဂါတ်မံၚ်ဏောၚ်။ ဗွဲမဂၠိုၚ်တှ်ေ ဗ္ဂပ်ကဵုလွဟ်ဂှ် လောဲမံၚ်ရ။ သွက်ဂွံကလေၚ်သီကေတ်လွဟ် ဂွံရုပ်သီအခေါၚ်ရပ်လွဟ်ဂှ် အခိၚ်လေဝ်လအ် ပရေၚ်ကယျာန်ဓဝါတ်လေဝ် သာတုဲယှုက်ထုဲအာဏောၚ်ဂှ် ဂွံညာတ်ကေတ်ရ။ ယဝ်ရဒးဟီုတှ်ေ သွက်ကိစ္စဂွံဗ္ဂပ်ကဵုလွဟ်ဂွံ ဒးပလေဝ်ပလေတ်စလဝ်ဗွဲမဂၠိုၚ်ထေက်ရ။ ပ္ဍဲပရေၚ်ဆေၚ်ဆက်ကဵု သွာၚ်လွဟ်လက်နက်ဂှ် အခေါၚ်သွံရာ တုဲပၠန် ပရေၚ်ပတိုန်စၟတ်သမ္တီ။ ဗီုဏံ သၞောတ်စှ်ေစှ်ေ ဗီုပြၚ်နွံနွံ ဗီုလဵုကၠောန်သ္ပအာညံၚ်ပရေၚ်စလာပ်သ္ကဲဟွံဂွံမွဲဟီုဂှ် ဒးတော်တၟော်လဝ်ထေက်ရ။ ဟွံသေၚ်တှ်ေ ဇၟာပ်ပ်မၞိဟ် ဂွံရပ်ဒၟံၚ်လွဟ်လောဲလောဲဏောၚ်တှ်ေ ကဵုဂကောံမၞိဟ်ဒေါသဇၞော်မံၚ်ဂှ်တှ်ေ ပြသၞာသွက်ဂွံယှုက်ထုဲကၠုၚ်ဟေၚ်ရ။