ညံၚ်လေဝ်ပေန်၊ ဖေဖဝ်ဝါရဳ (၁၄)
ပ္ဍဲသၞေဟ်ကွဳပၟတ် ဍုၚ်ညံၚ်လေဝ်ပေန်၊ ရးဒေသဇၞော်တၞၚ်သဳဂှ် ဟိုတ်နူဗုမ်ဗ္တိုဟ်ထ္ကး ပ္ဍဲဂိတုဖေဖဝ်ဝါရဳ ၁၃ အခိၚ်လဒေါဝ်တ္ၚဲဂှ်တုဲ ညးအာတရဴ (၃) တၠ ချိုတ်တုဲ (၉) တၠ ကလိဂွံလဝ်ဝပ်ဂှ် ညးဒေသတံကဵု ဂကောံရီုဗၚ်ဟံၚ်ပြာ်ပရေၚ်မၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတ္ၚဲဂှ် ၜိုတ်လဒေါဝ်တ္ၚဲဂှ် အဃောညးအာတရဴဂမၠိုၚ် မၚ်မံၚ်ကွဳပၟတ် ပ္ဍဲသၞေဟ်ညံၚ်လေဝ်ပေန်ဂှ် ဟိုတ်နူဗုမ်ဗ္တိုဟ်ထ္ကး က္တဵုဒှ်အာလဝ်ဂှ်ရ ညးဍုၚ်ကွာန်အာတရဴတံ ဇီုကပိုက်ချိုတ်ဂျိုၚ် က္တဵုဒှ်လဝ်ရ။
ဟိုတ်နူဗုမ်ဗ္တိုဟ်ထ္ကးတုဲ မဠေအ်အ်အေ၊ မဏိဏိဝေန်၊ ကိုဝ်တနာၚ်ထောန်တံ (၃) တၠ ဒၟံၚ်ကွာန်လက်တက် ပွိုၚ်ဍုၚ်ဒံၚ်တွေန်ကျဳ၊ ရးမဂွဵုတံ ချိုတ်အာလဝ်ရ။
သ္အာၚ်နူဂှ်ပၠန် ပ္ဍဲကဵုပရေၚ်ဗုမ်ဗ္တိုဟ်ထ္ကးဏံဂှ် ဒဝ်တာန်ဌေ၊ မတူဇြာလေန်၊ ဒဝ်ခေန်မဵုဝေန်၊ ကိုဝ်တပိုၚ်ဂျဝ်၊ မနုဝါ နူပွိုၚ်ဍုၚ်ဒံၚ်တွေန်ကျဳ၊ မပျေအ်ဖူခိုၚ်၊ ကိုဝ်တုၚ်ဇြဝ် နူဍုၚ်ညံၚ်လေဝ်ပေန်၊ ကိုဝ်အံၚ်ထောန်လေန် နူဒိုက်ဥူ ၊ ဒဝ်ခေန်ဨမျေတ် နူပျောန်တသာ တံ (၉) တၠဂှ် ကလိဂွံလဝ်ဝပ်တုဲ ပ္ဍဲကဵုဂှ် (၃) တၠဝွံ ဒှ်ဒၟံၚ် အကာဲအရာ ဒးဂွိၚ်တံရ။
ဟိုတ်နူပရေၚ်ဗုမ်ဗ္တိုဟ်ထ္ကးတံတုဲ ညးအာတရဴမ္ဒးဇီုကပိုက်ချိုတ်အာတံဂှ် ဂကောံရီုဗၚ်ဟံၚ်ပြာ်ပရေၚ်မၞိဟ်တံ ပလံၚ်ဗစိုပ်ကဵုလဝ် ရုၚ်ဂဥုဲညံၚ်လေဝ်ပေန်ဂှ် ဂွံတီကေတ်ရ။
လၟေၚ်ဒဒှ်ဏံဝွံ အပ္ဍဲဒပ်ပၞာန်သီအဝဵု ပွိုၚ် (၂) သၞာံဂှ် ဟိုတ်နူဗုမ်ဗ္တိုဟ်ထ္ကးတုဲ ညးအာတရဴတံ ဒးဇီုကပိုက်ချိုတ်အာလဝ် ပ္ဍဲကဵုသၞေဟ်ကွဳစက်ဂှ် ဒှ်အလန်ကိုပ်ကၠာအိုတ်ရ။
ပရိုၚ်−သြၚ်လောန်တိုၚ်(မ်)