ကဝ်တူလေဝ်၊ ဖေဖဝ်ဝါရဳ (၁၄)
အပ္ဍဲတိဍာ်ဗော်သွးကောန်ဂကူကရေၚ် KNU ဂှ် အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ပွမဝးပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဝွံ စိုပ်ကၠုၚ် ဒဵုကဵုအကာဲအရာပရေံအိုတ်ဂှ် ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကွာန်တိဍာ်အုပ်ဓုပ် KNU ဂှ် ဒပ်ကံၚ်ဇြဳပၞာန်ဝွံ အပ္ဍဲကာလသီအဝဵုဂှ် မ္ၚးနူပန်ပှော်ဗ္တိုက်ကဵုက္ၜၚ်ကျာ ကေုာံ လွဟ်ဇၞော်တံသၟးဟွံက ယဝ်ရပေါဲဗ္တိုက်က္တဵုဒှ်မ္ဂး ရပ်ဒက်ကောန်အရာပ်ဂမၠိုၚ် နဒဒှ်ဇွောံစဵုဒၞါပၞာန် ကေုာံ ပန်ပှော်ဂစိုတ်တံဂှ် ကၠောန်ၜိုတ်ဒၟံၚ်ရ။
ဒပ်ကံၚ်ဇြဳပၞာန်ဂှ် ပ္ဍဲသၞာံ (၂၀၂၃) ဏံဂှ်လေဝ် ဒေါအ်ဒေၚ်လဝ် ပရေၚ်ရေၚ်တၠုၚ်ချဳဒရာၚ် စပ်ကဵုပရေၚ်ပၞာန်တံရောၚ် ၜိုန်ရလလောၚ်ပ္တိတ်လဝ်ကီုလေဝ် သီုကဵုပါလုပ် တိဍာ်အုပ်ဓုပ် KNU ကီု ပ္ဍဲကဵုရးဒေသ ကေုာံ တွဵုရးဗွဲမဂၠိုၚ်ဂှ် ဟိုတ်နူကၠောန်သ္ပလဝ်ချဳဒရာၚ်ပရေၚ်ပၞာန်ဂှ်ရ ပေါဲဗ္တိုက်သ္ကာတ်မြဟ်ဒၟံၚ် ကဵုဂကောံဒပ်ပၠန်ဂတးညးဒေသတံတုဲ ပ္ဍဲလ္တူကွာန် ဒၞါဲကောန်အရာပ်တံမံၚ်ဂှ်လေဝ် ပန်ပှော်လွဟ်ဇၞော်တံ၊ ဗ္တိုက်ကဵုတရဴကျာတံ၊ စံၚ်ပလီုပလာ်တံဂှ် ဆက်ကၠောန်ၜိုတ်ဒၟံၚ်ရ။
ဟိုတ်နူ စွံလဝ်ပွန် လ္တူကွာန်ဂမၠိုၚ် ဒၞါဲညးဍုၚ်ကွာန်ကောန်အရာပ်တံမံၚ်ဂှ်တုဲ ဒပ်ကံၚ်ဇြဳပၞာန် ပန်ပှော်ဗ္တိုက်ဒၟံၚ်ကဵုလွဟ်ဇၞော် ကေုာံ ဂြာတ်ဒၟံၚ်ဗုမ်တံဂှ်ရ ညးဍုၚ်ကွာန်ကောန်အရာပ်တံ ဒးချိုတ်အာကီု၊ ကလိဂွံအာဝပ်ကီု၊ ဒးဂြိပ်ဒဴပါဲဒလေတ်တံကီု ကေုာံ သ္ၚိဌာန်လီုလာ်စာ်ထောၚ်တံဂှ် က္တဵုဒှ်ဒၟံၚ်တုဲ သာတုဲဒးဂဗကၠုၚ်ဒၟံၚ် အကာဲအရာဟွံဂီုကၠီု နူကဵုကၠာတေံရဂှ် ညးမၞုံအခေါၚ်ဟီုဂး KPSN သဝ်လေဝ်ကပဝ် သ္ဂးရ။
သ္အာၚ်နူဂှ်ပၠန် ပ္ဍဲကဵုတိဍာ်ဗော်သွးကောန်ဂကူကရေၚ် KNU ဂှ် စွံပွန်လ္တူညးဍုၚ်ကွာန်ကောန်အရာပ်ဂမၠိုၚ်တုဲ အကာဲအရာဒပ်ကံၚ်ဇြဳပၞာန် ကၠောန်ၜိုတ်ဝးပ္ကဝ်ဒၟံၚ် အခေါၚ်အရာမၞိဟ်ဂှ်ဝွံ ပ္ဍဲအခိၚ်လၟုဟ်ဂှ် ဒှ်ဒၟံၚ်ဗီုပြၚ်သၠုၚ်အိုတ်ဂှ် သဝ်လေဝ်ကပဝ် ဆက်ဟီုရ။
ပ္ဍဲတိဍာ်အုပ်ဓုပ် KNU ဂှ် အပ္ဍဲဒပ်ပၞာန်သီအဝဵုပွိုၚ် (၂) သၞာံဂှ် ဟိုတ်နူပဋိပက္ခပရေၚ်ပၞာန်တံတုဲ ညးဒဒိုက်ပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ်တံ ဂၠိုၚ်ကဵုကိုဋ် နွံဒၟံၚ်တုဲ သ္ၚိဌာန် ကေုာံ စမြိုၚ် ဂၠိုၚ်ကဵုလ္ၚီ ဒးဒုၚ်စံၚ်ပလီုလဝ်ရ။
ပ္ဍဲကဵုသၞာံ ၂၀၂၃ လ္ပာ်မံက် ပရေၚ်ပၞာန် မသာကြံၚ်မ္ၚိုဟ်ကၠုၚ်ဒၟံၚ်ဂှ် မ္ၚးနူက္ၜၚ်ကျာ ဒပ်ကံၚ်ဇြဳပၞာန်တံဂှ် ဟိုတ်နူပရေၚ်ပန်ပှော်လွဟ်ဇၞော်တံတုဲ မွဲတ္ၚဲ အောန်အိုတ် ကောန်အရာပ် (၅) တၠဟွံအောန် ဇီုကပိုက်ချိုတ်ဂျိုၚ်တံ သၠုၚ်တိုန်ကၠုၚ်ရ။
အခိၚ်လၟုဟ်ဂှ်လေဝ် ပ္ဍဲကဵုတိဍာ်အုပ်ဓုပ် KNU ကြပ်ဖအိုတ်ဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်တောဲ KNLA, KNDO တံ ဆက်သ္ကာတ်မြဟ်ဒၟံၚ်တုဲ ဟိုတ်နူပေါဲဗ္တိုက်တံတုဲ ကောန်အရာပ်ဒေသ ဇီုကပိုက်ချိုတ်ဂျိုၚ် ကလိဂွံဝပ်တံ သာသ္ကာတ်မြဟ်လဝ်တုဲ လၟိဟ်မ္ဒးဂြိပ်ဒဴပါဲဒလေတ်တံဂှ်လေဝ် လ္တူနူကဵုအကာဲရာကၠာတေံဂှ် သာတုဲဂၠိုၚ်ကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)