မတ်မလီု၊ ဖေဖဝ်ဝါရဳ (၁၄)
ဗော်ညဳသၟဟ်မန် မဒှ်ဗော်ပရေၚ်ဍုၚ်ကွာန် ကောန်ဍုၚ်အရၚ်မွဲဂှ်ဝွံ သွက်ဂွံပ္တိုန်စရၚ် ဇရေၚ်ကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ဂှ် ပ္ဍဲကောံဓရီုဗဟဵုကမ္မတဳ မကၠောန်သ္ပလဝ် ပ္ဍဲဂိတုဖေဖဝ်ဝါရဳ (၁၁) ဂှ် မၞိဟ်ဒစဵုဒစးဟွံမွဲ သ္ဂုတ်သွာတ်လဝ်ရ။
အတိုၚ်တၚ်သ္ဂုတ်သွာတ် ကောံဓရီုဗဟဵုကမ္မတဳဂှ်မ္ဂး သွက်ဂွံပ္တိုန်စရၚ် နဒဒှ်ဗော်ကၟိန်ဍုၚ်ဂှ် အခက်အခုဲနွံဂှ်ရ သ္ဂုတ်သွာတ်လဝ် သွက်ဂွံပ္တိုန်အာစရၚ်ဗော် ၜိုတ်ကဆံၚ်တွဵုရးဍုၚ်မန်ဓဝ်ရ။
ဗော်ညဳသၟဟ်မန်ဂှ် ဒဒှ်မဒးပ္တိုန်စရၚ်ဗော်ဂှ်ဝွံ တၞဟ်နဗော် သ္ဂောံဆက်ဂျိုၚ်တဴအာကီု သွက်ဂွံလုက်စုက်ဆက်စပ်ကဵု ညးဍုၚ်ကွာန်တံမာန်ကီုဂှ်တုဲ ဒးကၠောန်လဝ်ရောၚ်ဂှ် သ္ဂးရ။
ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန် (MSFC) ဂှ် ပေါဲရုဲမာဲကံၚ်ဇြဳပၞာန် မကၠောန်ဗဒှ်ဂှ်ဝွံ ဟိုတ်နူဟွံလုပ်သၞောဝ်ဂှ်ရ နကဵုဗော်ညဳသၟဟ်မန် ဟွံဒးပ္တိုန်စရၚ်ဗော်ပုဟ်ဂှ် ဟီုရ။
“ကံၚ်ဇြဳပၞာန်ဂှ် သီလဝ်အဝဵုတုဲ ဟိုတ်နူညးဍုၚ်ကွာန်တံ ရုဲစှ်လဝ်ဟွံသေၚ်ဂှ်ရ အခေါၚ်ဂွံကၠောန်ပေါဲရုဲမာဲ ဟွံမွဲတုဲ ယဝ်ရကၠောန်ဗဒှ်အတေၚ်မ္ဂးလေဝ် ပေါဲရုဲမာဲလုပ်သၞောဝ်ဂှ် ဟွံဒှ်ပုဟ်။ ဟိုတ်ဂှ်ရ နကဵုဗော်ညဳသၟဟ်မန် သွက်ဂွံပါလုပ် ပေါဲရုဲမာဲဟွံလုပ်သၞောဝ်ဂှ် ဟွံဒးရးပုဟ်၊ ဂုဏ်နူဟွံဒးရးဂှ်ရ သ္ဇက်ဒးကၠောန် Register ဟွံမွဲပုဟ်ဂှ် ညာတ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် ပံၚ်တောဲပူဗိုၚ်ထောံ ပေါဲရုဲမာဲဟွံလုပ်သၞောဝ်ဂှ်ကဵု စၟတ်သမ္တီကဵုထောံဗဗွဲဓဝ် ကုဂကောံပၞာန် မပကီုပရာပ်ရပ်လွဟ်တံဂှ်ဝွံ ဒၟါနူအာယုက်တၠအဝဵုပၞာန် ဂၠိၚ်မာန်ဂှ်ရ ညံၚ်ဂွိုအ်ကၠောန် ပြဝသာ်ဏံတံအိုတ်ဂှ် ကံၚ်ဇြဳဖေဝ်ဒရာဍုၚ်မန် (MSFC) ဖ္တိုက်ဖ္အောဝ်လဝ်ရ။
ကံၚ်ဇြဳဖေဝ်ဒရာဍုၚ်မန် (MSFC) ဝွံ ပြံၚ်လှာဲဒက်ပ္တန်လဝ် ပ္ဍဲဂိတုဂျာန္နဝါရဳ (၁၅) တုဲကၠုၚ်တေံ နူကဵုကမ္မတဳပံၚ်ကောံ ရေၚ်တၠုၚ်ကေၚ်ကာဍုၚ်မန် (MSICC) မဒက်ပ္တန်လဝ် အပ္ဍဲသၞာံ ၂၀၂၁ ဒပ်ပၞာန်သီလဝ်အဝဵုတေံရ။
အခိၚ်လၟုဟ်ဂှ် ညးစၞးနူကံၚ်ဇြဳဖေဝ်ဒရာဍုၚ်မန် (MSFC) (၃) တၠဝွံ ယိုက်ဂၠေၚ်ဒၟံၚ် တာလျိုၚ်ဝန်ဇၞော် ပ္ဍဲဂကောံအလဵုအသဳညဳသၟဟ်ဂကူ NUG တုဲ ညးစၞး (၃) တၠပၠန်ဂှ်လေဝ် ကေတ်ဒၟံၚ်တာလျိုၚ် နဒဒှ်ကောန်ဂကောံ ပ္ဍဲ ကံၚ်ဇြဳကဵုကသပ်ညဳသၟဟ်ဂကူ (NUCC) ရ။
ဗော်ညဳသၟဟ်မန်ဝွံ ပ္ဍဲပေါဲရုဲမာဲ သၞာံ ၂၀၂၀ တုဲကၠုၚ်တေံ ပ္ဍဲကဵုရးလ္ဂုၚ်၊ ရးဗဂေါ၊ ရးတၞၚ်သဳ မပါလုပ်ကီု သီုကဵုတွဵုရးဍုၚ်ကရေၚ်၊ တွဵုရးဍုၚ်မန်တံဂှ် လုပ်စိုပ်ပြိုၚ်ပ္ကာန်လဝ်တုဲ ဂွံဇၞးလဝ် ဒၞါဲညးစၞး (၁၂) ဒၞါဲရ။
ဆ္ဂး ဗွဲကြဴသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီအဝဵုတုဲဂှ် ပံၚ်တောဲလဝ်ကဵု ကံၚ်ဇြဳပၞာန်တုဲ နဒဒှ်ကောန်ဂကောံကံၚ်ဇြဳပၞာန် ပ္ဍဲကဆံၚ်ကၟိန်ဍုၚ်ကဵု ကဆံၚ်တွဵုရးဂှ် ဗလးလဝ် ညးစၞးဂွံဇၞး (၂) တၠတံဂှ်ရ ဒးဆေၚ်လဝ်မုက်ကဵု ပရေၚ်ပါ်ပါဲ အပ္ဍဲညးဍုၚ်ကွာန်မန်တံရ။
ပရိုၚ်−သြၚ်လောန်တိုၚ်(မ်)