မတ်မလီု – ဖေဖဝ်ဝါရဳ(၁၅)
နကဵုညးလုပ်ဂကောံအလဵုအသဳဂမၠိုၚ် ဒးဒက်ပ္တန်လဝ် ဍာ်ဒကေဝ်က္ဍိုက်က္ဍိုပ် ဒပ်ပၠန်ဂတးရပ်လွဟ် ပ္ဍဲလညာတ်ပရေၚ်ဍုၚ်ကွာန် သ္ကေက်သ္ကာစိစောန်ရောၚ်ဂှ် သမ္မတယာယဳ ဒူဝါလယှဳလ အလဵုအသဳပရေၚ်ညဳသၟဟ်ကောန်ဂကူ ဟီုသ္ဂးလဝ်ရ။
ပ္ဍဲကောံဓရီု အလဵုအသဳပရေၚ်ညဳသၟဟ်ကောန်ဂကူ မရနုက်ကဵု (၆) ဝါကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၄)တ္ၚဲဏံဂှ် ဟီုသ္ဂးကၠုၚ် သာ်ဏံရ။
“ပူဂဵုက္ဍိုက်က္ဍိုပ်ညးဍုၚ်ကွာန်တအ်ဂှ် နကဵုဍာ်ဒကေဝ် ၜိုတ်ထေက်ကြိုက် ဒေါံဇူဒၟံၚ် ဟွံဂွံပုဟ်။ ပါဲနူဂှ်ပၠန် ပ္ဍဲလညာတ်ပရေၚ်ဍုၚ်ကွာန် သ္ကေက်သ္ကာစိစောန်လေဝ် ဒးဒက်ပ္တန်စွံလဝ် ဂကူဍာ်ဒကေဝ်က္ဍိုက်က္ဍိုပ် ဒပ်ပၠန်ဂတးရပ်လွဟ်မာန်ဏောၚ်။ ကာလဂှ်မှ ဂွံထ္ၜးပျး ပရေၚ်က္ဍိုက်က္ဍိုပ် ပ္ဍဲဒပ်ပၠတရဴပရေၚ်ဍုၚ်ကွာန် ဗွဲမပြာကတ်မာန်ဏောၚ်” ဂှ် သမ္မတNUG ယာယဳ ဟီုသ္ဂးလဝ်ရ။
သ္အာၚ်နူဂှ်ပၠန် ပရေၚ်ကၠောံစိုပ်ကၠုၚ် ပ္ဍဲကာလပၠန်ဂတးက္ညၚ် ပေၚ်ကၠုၚ်(၃)သၞာံဏံဂှ် သွက်သွဟ်ပရေၚ်ဍုၚ်ကွာန် ချိုတ်တ်ပၠိုတ်ပၠိုတ် ဂွံမံက်တိုန်ကၠုၚ်ဂှ် ဒးပ္တိတ်ဇြဟတ်တုဲ နကဵုတၚ်သ္ၚဳဂၠိပ်ဗွဲယေဘုယျ ဆက်အာဂတတေံ ဂွံဟွံသေၚ်ဂှ်ရ နွံဒၟံၚ်ပၟိက်ကဵု သွဟ်ပရေၚ်ဍုၚ်ကွာန် ပိုတ်တ်သ္ကုတ်တ် ရပ်ထ္ၜးပါ်ပရအ်ကဵုညးဍုၚ်ကွာန်တအ်ဂွံရဂှ် ဟီုသ္ဂးလဝ်ဏီရ။
သွက်ဂွံလုပ်ပေါဲဗတိုက်ဗစိုပ်ဒတုဲ ပရေၚ်ပၠန်ဂတးက္ညၚ်ဂှ် နွံဒၟံၚ်ပၟိက်ကဵု ပရေၚ်ဒက်ပ္တန် ဇြဟတ်ပရေၚ်ညဳသၟဟ် မဟာမိတ် ပ္ဍဲဍုၚ်ကီု ကဵုကၟိန်ဍုၚ် ဇိုၚ်ဝုတ်ဒိုဟ်တအ်လေဝ် ညံၚ်ဂွံဒှ်ပရေၚ်ဆက်ဆောံမဟာမိတ်ဂှ် ဒးပ္တိတ်ဇြဟတ်တုဲ ကိစ္စပရေၚ်အပ္ဍဲဍုၚ်တအ်ဂှ် ဆေၚ်ဆက်ဒၟံၚ်ကဵု ကိစ္စပရေၚ်ဍုၚ်ကွာန်ပထဝဳ တိုက်ရိုက်ရဂှ် သမ္မတ NUG ယာယဳ ဟီုသ္ဂးလဝ်ရ။
ကောံဓရီု အလဵုအသဳ NUG ဂှ် သမ္မတယာယဳ ဒူဝါလယှဳလကီု၊ ဝန်ဇၞော်ကၟိန်ဍုၚ် ဒုဝန်ဇၞော်ကၟိန်ဍုၚ် မပါလုပ် သီုသ္ကိုပ်ဝန်ဇၞော် မာန်ဝေန်ခိုၚ်တာန် ကေုာံ ညးမၞုံတာလျိုၚ်ဂမၠိုၚ် တိုန်စိုပ်လဝ်ရဂှ် ဂွံတီကေတ်ရ၊
ပရိုၚ်-သြၚ်လောန်တိုၚ်(မ်)