လဂုၚ် – ဖေဖဝ်ဝါရဳ (၁၅)
က္ဍိုပ်သ္ကိုပ်ကွးဘာ ဂကောံသမဂ္ဂကွးဘာ ဆေၚ်ရာကဵုအလုံကၟိန်ဍုၚ်ဗၟာ (ဗ.က.သ)တြေံ ကိုဝ်လေန်ထေတ်နိုၚ်(က)ဂျုၚ်ဂှ် ကံၚ်ဇြဳပၞာန် ထပ်ဖျေံကၠုၚ်ဒဏ်ထံၚ် ပွိုၚ်(၅)သၞာံပၠန်ရဂှ် ညးစုက်လုက်ကဵု ဂြောဝ်ဂတာသ္ၚိကၟိန်ညး ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကိုဝ်ထေတ်လေန်နိုၚ်ဂှ် ရုၚ်သၞောဝ်ဓဝ်ဗိုလ်လ္ၚီ သၟဝ်တဲကံၚ်ဇြဳပၞာန် ထပ်ဖျေံကၠုၚ်ဒဏ်ထံၚ် ပွိုၚ်(၅)သၞာံ နကဵုသၞောဝ်ဥပဒေ ပရေၚ်ဗတိုက်သရိုဟ် ပွပ္ကီုပရာပ် ၝောံပိုဒ် ၅၂ (ခ) ရ။
ဂဗုတ်ထပ်ဒးဒုၚ်ဖျေံကၠုၚ်ဒဏ်ထံၚ်ဂှ် ဒှ်ဂဗုတ်စောဲလဝ်နူတမ်တေံ နကဵုၝောံပိုဒ် ၅၀(ည) တုဲ ကလေၚ်ပြံၚ်စောဲလဝ် ၝောံပိုဒ် ၅၂ (ခ)ရဂှ် ဂွံတီကေတ်ရ။
ပ္ဍဲသၞာံတုဲကၠုၚ် ဂိတုဒဳဇြေမ်ဗာ စၟတ်တ္ၚဲ(၇) တေံဂှ်လေဝ် ရုၚ်သၞောဝ်ဓဝ်အၚ်စိၚ် ဖျေံကၠုၚ်လဝ် ကိုဝ်လေန်ထေတ်နိုၚ် နကဵုရာဇသာတ်ဇၞော် ၝောံပိုဒ် ၅၀၅ (က) ဒဏ်ထံၚ်(၃)သၞာံဂှ်ရ အပံၚ်လၟိဟ်ဒဏ်ထံၚ် စဵုကဵုပွိုၚ်(၈)သၞာံ ဒးဒုၚ်ဖျေံကၠုၚ်ရ။
ကိုဝ်လေန်ထေတ်နိုၚ်ဂှ် ကြဴနူဒပ်ပၞာန်သီအဝဵုတုဲ ပရေၚ်ကလိလောန်လဝ်ဒုဟ်ဒဏ် ဟၟဲမွဲသာ်တုဲ ပ္ဍဲသၞာံ ၂၀၂၁ ဂိတုမာတ်ချ်ဂှ် ကံၚ်ဇြဳပၞာန် ပံက်ဂဗုတ် ပ္တိတ်ဝရာန်တုဲ စိုပ်သၞာံ ၂၀၂၂ ဂိတုဂျောန်ဂှ် ဒးဒုၚ်ရပ်လဝ် ပ္ဍဲပွိုၚ်ဍုၚ်ဗိုလ်လ္ၚီရဂှ် ဂွံတီကေတ်ရ။
“ပါဲနူကဵုၝောံပိုဒ်ဍဵုဍိုက်ပရေၚ်ဍုၚ်ကွာန်တြေံတုဲ သီုကဵုဂဗုတ်ပရေၚ်ပ္ကီုပရာပ် ရပ်ဖျေံထံၚ် ဟွံဗဗွဲဓဝ်ရ” ဂှ် ညးမဒှ်သမ္ဘာ ကိုဝ်လေန်ထေတ်နိုၚ် ချူပတိုန်လဝ် ပ္ဍဲမုက်လိက်ဇာနှိက် ပရေၚ်မၞိဟ်ညးရ။
ပ္ဍဲသၞာံ ၂၀၂၂ ဂိတုအံၚ်တဝ်ဗာ တုဲကၠုၚ်တေံဂှ် ပ္ဍဲပရေၚ်ပရော ဂဗုတ်ဗုမ်ခတိုဟ် ပ္ဍဲဌာနလုပ်ဆဵုဂဗကောန်ထံၚ်၊ ထံၚ်အၚ်စိၚ်ဂှ် ညးမဒှ်မိယာဲ ကိုဝ်လေန်ထေတ်နိုၚ် ကၠုၚ်ပလံၚ်လုပ်ဆဵုဂဗကောန်ထံၚ်ဂှ် ဒးချိုတ်အာလဝ်တုဲ ကံၚ်ဇြဳပၞာန်ကၟာတ်လဒဵုလဝ် အခေါၚ်ပလံၚ်ဇွကမ္မဌာန် မိယာဲညးရ။
ပရိုၚ်- သြၚ်လောန်တိုၚ်(မ်)
ဗီုရုပ် – ဗီုဓာတ်တြေံ