ရေဝ်၊ ဖေဖဝ်ဝါရဳ (၁၅)
ပ္ဍဲဂိတုဖေဖဝ်ဝါရဳ (၁၄) အခိၚ်ပယျာံနူဂယးဂှ် အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခမရ (၅၈၇) ဖျေံသ္ဇိုၚ်ကွာန်ရုတ်တံၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန် နကဵုလွဟ်ဇၞော် ကေုာံ လံၚ်ချာကၠဟ်ဗုမ်တံဂှ် ဂွံတီကေတ် နူကဵုဂကောံပၠန်ဂတးတွဵုရးဍုၚ်မန် (MSRO) ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် (၆) နာဍဳကဝက်ဂှ် ဂကောံပၠန်ဂတးတွဵုရးဍုၚ်မန် (MSRO) အာစိုပ်ပန်ပှော်ဗ္တိုက်လဝ် သၞေဟ်ကၚ် တမ်ဒပ်ကံၚ်ဇြဳပၞာန် ခမရ (၅၈၇) ဂှ် နကဵုလံၚ်ချာကၠဟ်ဗုမ် လွဟ်ဇၞော် ၄၀ မမ ရ။
ကမ် ၄၀ မမ မပန်ပှော်လဝ် ပ္ဍဲကဵုပရေၚ်ဗ္တိုက်ဏံဂှ်ဝွံ ဒတုံထ္ကးအာလဝ် လ္တူသၞေဟ်ကၚ်ကံၚ်ဇြဳပၞာန်တဝ်ဝ်တုဲ ပရေၚ်ချိုတ်ဂျိုၚ် လ္ပာ်ဒပ်ကံၚ်ဇြဳပၞာန်တံဂှ် ဂၠိုက်ဂၠါဲဒၟံၚ်ဖိုဟ်ရောၚ် ညးဒုၚ်တာလျိုၚ် နူဂကောံပၠန်ဂတးတွဵုရးဍုၚ်မန် (MSRO) မွဲတၠ ဟီုရ။
ကြဴနူဗ္တိုက် သၞေဟ်ကၚ်တမ်ဒပ် ကံၚ်ဇြဳပၞာန်တုဲဂှ် ကောန်သ္ဂံၚ် (MSRO) တံ ဇီုကပိုက်ဒးဟွံမွဲ ဗွဲမအံၚ်ဇၞး ကလေၚ်ဆုတ်ကလေၚ်မာန်လဝ်ဂှ်ကီု၊ ဂတနူဏံလေဝ် ဗီုဂွံအခေါၚ်ဂှ် ပသောၚ်အာ ကံၚ်ဇြဳပၞာန် ကေုာံ လေံထံက်ဍေံတံရောၚ်ဂှ် လလောၚ်ပ္တိတ်လဝ်ရ။
တမ်ဒပ်ကံၚ်ဇြဳပၞာန် ခမရ (၅၈၇) ဂှ်ဝွံ ပ္ဍဲဂိတုဂျာန္နဝါရဳ သၞာံတုဲတေံလေဝ် ဒးဒုၚ်ဗ္တိုက်လဝ် ကဵုလွဟ်ဇၞော်တုဲ အပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန် (၂) တၠ ချိုတ်တုဲ (၆) တၠ ကလိဂွံလဝ်ဝပ်ရ။
ကြဴနူလ္ပာ်ကံၚ်ဇြဳပၞာန်တံ လလောၚ်တြး ပွိုၚ်ဍုၚ်ရေဝ်၊ တွဵုရးဍုၚ်မန် ပရေၚ်အုပ်ဓုပ်ပၞာန်တုဲဂှ် တမ်ဒပ်ဖျေံသ္ဇိုၚ် (၂) ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်ကဵု စမြိုၚ်လ္ၚဵု ဇီုကပိုက်လီုလာ်တံ နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)