ဘာပန်၊ ဖေဖဝ်ဝါရဳ (၁၅)
ပ္ဍဲခရိုၚ်ဘာပန် ကေုာံ ခရိုၚ်ဒူပလာယာ တိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် အပ္ဍဲဂိတုဂျာန္နဝါရဳ ပွိုၚ် (၁) ဂိတုဂှ် ဟိုတ်နူပရေၚ်ပန်ပှော်ဗ္တိုက်ကဵုက္ၜၚ်ကျာ ဒပ်ကံၚ်ဇြဳပၞာန်တံဂှ်တုဲ သီုကဵုပါလုပ်ကောန်ၚာ်သၟတ်၊ ညးဍုၚ်ကွာန်ကောန်အရာပ် (၁၃) တၠ ချိုတ်အာလဝ်ဂှ် ပ္ဍဲဂိတုဖေဖဝ်ဝါရဳ (၁၄) ဂှ် KNU လလောၚ်ပ္တိတ်လဝ်ပရိုၚ်ရ။
အပ္ဍဲဂိတုဂျာန္နဝါရဳဂှ် ဒပ်ကံၚ်ဇြဳပၞာန် သုၚ်စောဲက္ၜၚ်ကျာဗ္တိုက်တံကဵု က္ၜၚ်ကျာသၞေၚ်ဝဲတံတုဲ ကၠောန်သ္ပဗ္တိုက်လဝ်တရဴကျာ ကုကွာန်ဂမၠိုၚ် ကေုာံ ပ္ဍဲဝၚ်ကမၠောန် နူကဵုတိဍာ်ဒပ်မဟာ (၆) ခရိုၚ်ဒူပလာယာ ကဵု ဒပ်မဟာ (၅) ခရိုၚ်ဘာပန် KNU တံ အပံၚ်လၟိဟ်လ္တုန် (၅၇) ဝါတုဲ ဂြာတ်ဖျေံလဝ် မခတိုဟ် (၂၀၈) မဟွံကတုဲ ပန်ပှော်ဗ္တိုက်လဝ်ကဵု သၞာတ်စက် လ္တုန်ဗွဲမဂၠိုၚ်ဂၠေၚ်ရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန် စွံပွန်လ္တူကောန်အရာပ်တံဂှ်တုဲ ကောန်ၚာ်အာယုက် (၂) သၞာံ (၁) တၠ၊ အ္စာခရေတ်ယာန်ဗၠိုပ်ဍာ် (၁) တၠ၊ အ္စာထ္ၜးဓဝ်ခရေတ်ယာန်ကာတ္တလေတ် (၁) တၠပါလုပ်တုဲ ကောန်အရာပ် (၁၃) တၠ ဒးချိုတ်အာလဝ်တုဲ ကောန်အရာပ် (၉) တၠ သီုကဵုပါလုပ်ကောန်ၚာ်အာယုက် (၄) သၞာံ မွဲတၠ ဇီုကပိုက်ကလိဂွံလဝ်ဝပ်ဂှ် လလောၚ်ပ္တိတ်လဝ်ရ။
သ္အာၚ်နူဂှ်ပၠန် ဟိုတ်နူပရေၚ်ဗ္တိုက်တရဴကျာတံတုဲ သ္ၚိဒၟံၚ်ညးဍုၚ်ကွာန်တံ (၃၃) မ ပၟတ်တူဒှ်အာဆောံတုဲ (၂၄) မ ဇီုကပိုက်လီုလာ်အာလဝ်တုဲ ဘာဗ္တောန်လိက် (၂) မ၊ ဘာကျာ်ခရေတ်ယာန်ဗၠိုပ်ဍာ် (၄) မ၊ ရုၚ်ဂဥုဲ (၁) မ၊ ဘာလကျာ် (၂) မ ကေုာံ စမြိုၚ်ညးဍုၚ်ကွာန်ပိုၚ် (၈) မ ဇီုကပိုက်လီုလာ်အာလဝ်တုဲ ၚုဟ်မးဆောံလေၚ်အာ (၁၀) ပြကောဋိကိုဋ်ၝာတ် နွံဂှ် ဂွံတီကေတ် နူကဵုတၚ်လလောၚ်တြး KNU ရ။
အပ္ဍဲဂိတုဂျာန္နဝါရဳ ပ္ဍဲတိဍာ်အုပ်ဓုပ် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA, KNDO တံဂှ် ပေါဲဗ္တိုက်ၜါလ္ပာ် (၄၀၀) ပြၚ် က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဗ္ဒါဲ (၄၇၀) ချိုတ်အာလဝ်တုဲ လ္ပာ် KNU ဂှ် (၂၄) တၠ ပြဟ်လလုဲအာလဝ်ရ။
ဟိုတ်နူပေါဲဗ္တိုက်ၜါလ္ပာ်တံတုဲ ညးဍုၚ်ကွာန်ဒေသ ဗ္ဒါဲ (၄) ကိုဋ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲလမျီုတံတုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)