ဂဂဝ် – ဖေဖဝ်ဝါရဳ(၁၈)
ရးဒေသမဂွေ၊ ပ္ဍဲပွိုၚ်ဍုၚ်ဂဂဝ်ဂှ် ကွဳစက်ပ္ဍိုက်ညးအာတရဴ သၟတ်တိတ်ဍုၚ်သ္အာၚ်ပါဗက်ကၠုၚ် ကံၚ်ဇြဳပၞာန်ရပ်လဝ်ဂှ် ၜိုန်ရလအ်ကၠုၚ် ဗ္ဒာဲ (၁၀)တ္ၚဲဒှ်ကီုလေဝ် ဟွံဂွံကလေၚ်ဗလးပ္တိတ်ကဵုလဝ်ဏီရဂှ် ညးဒေသဂမၠိုၚ် ဟီုသ္ဂးလဝ်ရ။
ဂိတုဖေဖဝ်ဝါရဳ တုဲကၠုၚ် စၟတ်တ္ၚဲ(၇) တေံဂှ် ကွဳစာအာန်ဇြာတုမ် ပ္ဍိုက်ညးအာတရဴ ဒရိပ်ဒၟံၚ်ကွာန်မောက်ကဵု ဖာကာန်တိုက်ရိုက်ဂှ် ဒးဒုၚ်ရပ်လဝ် ပ္ဍဲသၞေဟ်ကၚ်ပိတောက် ဗ္ဒာဲခလရ-၅၀ ဂဂဝ် ဂှ်ရ။
ကွဳစက်ဂှ်ဓရိပ်ဒၟံၚ် ဂွံၜါ၊ ပိလတုန်တုဲဂှ် ပျူသဝ်ထဳစောန်စိုတ်တအ် စုတ်ကဵုဏာ ဗွိုၚ်လတက် PDF ၊ ကပေါတ်ကညောတ် ဒပ်ပရေၚ်စဵုဒၞာသုၚ်စောဲတုဲ ဒၟာနူကဵုလဝ်ပရိုၚ် ဒပ်သၞေဟ်ကၚ် ဂဂဝ် ခလရ – ၅၀ တုဲ ရပ်ကေတ်လဝ် ညးအာတရဴတအ်ကီု သီုကဵုသၟာဒဳကွဳစက်ရဂှ် ညးဒေသမွဲတၠ ဟီုသ္ဂးလဝ်ရ။
ပ္ဍဲကွဳစက်ဂှ် ပါဲနူသၟာဒဳကွဳစက်တုဲ သၟတ်တိတ်ဍုၚ်သ္အာၚ်တအ် အပံၚ်လၟိဟ်(၁၇)တၠ ပါလုပ်ဒၟံၚ်ရဂှ် ဂွံတီကေတ်တုဲ ကံၚ်ဇြဳပၞာန်ရပ်လဝ်ညးတအ် စဵုကဵုအခိၚ်လၟုဟ်ဏံရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲကဵုဒၞာဲဂှ် ဟိုတ်နူပကောံပကေဝ်ဒၟံၚ် ဇြဟတ်ပျူသဝ်ထဳတအ်တုဲ နကဵုတၚ်စောတ်စောဲ သၟတ်ဟွံမိက်သ္ပပျူသဝ်ထဳတုဲ တိတ်ဒၟံၚ်တရဴဂးတုဲ ပါံဒၞက်ရလဝ်ရဂှ် ၜိုန်ရညးဒေသဂမၠိုၚ် ဟီုသ္ဂးလဝ်ကီုလေဝ် နကဵုသြၚ်လောန်တိုၚ်(မ်) သွက်ဂွံသ္ပဒ္တန်တၞဟ်ခြာမာန်ဂှ် ပ္တိတ်ဒၟံၚ်ဇြဟတ်ရ။
ကောန်ဒပ်ကံၚ်ဇြဳပၞာန်ဂှ် နူကဵုလလောၚ်တြးလဝ် ဒေသယျဝ် နဒဒှ်ပရေၚ်အုပ်ဓုပ်ပၞာန်တုဲဂှ် ဗက်ရပ်ဒၟံၚ် ကောန်ညးဍုၚ်ကွာန်တအ် နွံကၠုၚ်အဆက်က်ရ။
ကံၚ်ဇြဳပၞာန်သီအဝဵု လလောၚ်တြးလဝ် ပရေၚ်အုပ်ဓုပ်ပၞာန် ပ္ဍဲပွိုၚ်ဍုၚ် အပံၚ်(၃၇) ပွိုၚ်ဍုၚ် အလုံကၟိန်ဍုၚ်ဗၟာတုဲ ပ္ဍဲရးဒေသမဂွေဂှ်မ္ဂး ပွိုၚ်ဍုၚ်ဂဂဝ်၊ ထဳလေန်၊ ပေါက် ကေုာံပွိုၚ်ဍုၚ်သဝ် လလောၚ်တြးလဝ် ပရေၚ်အုပ်ဓုပ်ပၞာန်ရဂှ် ဂွံတီကေတ်ရ။
စဵုကဵုအခိၚ်ပြဟ်ဟ်လၟုဟ်ဏံ ညးဒးဒုၚ်ပြိုက်ဂစိုတ်လဝ် ဟိုတ်နူကံၚ်ဇြဳပၞာန် နွံကၠုၚ် ဗ္ဒာဲ(၃)လ္ၚီတၠတုဲ မၞိဟ်ဒးဒုၚ်ရပ်လဝ်တအ်ဂှ်လေဝ် နွံကၠုၚ် ဗ္ဒာဲၜါလက်ယျဂှ် AAPP ဓမံက်ထ္ၜးလဝ်ရ။
ပရိုၚ်-သြၚ်လောန်တိုၚ်(မ်)