နေပျဳဒဝ် – ဖေဖဝ်ဝါရဳ(၁၈)
ကၟိန်ဍုၚ်ဇြဟတ်ဇၞော်လ္ၚဵုလ္ၚဵုတအ် ထ္ၜးဟိုတ်နာနာ လုပ်စိုပ်ပြံကစောန်ဒၟံၚ် ပ္ဍဲကဵုကိစ္စပရေၚ်အပ္ဍဲဍုၚ်တုဲ ညံၚ်ပရေၚ်ညိၚ်ဝတ်ဂွံလီုလာ် ညံၚ်ပရေၚ်ညဳသၟဟ်ဂွံပါ်ဒကး သုၚ်စောဲ နဲကဲစုၚ်တုဲ ရေၚ်တၠုၚ်ကၠုၚ်ဒၟံၚ်ကီု လတူကၟိန်ဍုၚ်သၟတ်ဂမၠိုၚ် ပၟိက်နွံမွဲဗီု ပၟိက်ဟၟဲမွဲနဲ ကၠောန်ဒၟံၚ်တုဲ ကၠောန်သ္ပဒၟံၚ်ပရေၚ်ကဵုဇြဟတ်ဓရိုဟ် ကရေပ်ဓရတ် သ္ပမာန်ကေတ်ဇၞး ပါ်ကဆံၚ်ဆက်ဆောံဒၟံၚ်ရဂှ် ကံၚ်ဇြဳပၞာန် ဟီုသ္ဂးလဝ်ရ။
ပ္ဍဲဖိုဝ်ရာမ်ပရေၚ်ဆာန်ကၟိန် ကၟိန်ဍုၚ်ဗၟာ-ရုယှာ ကေုာံပရေၚ်ပံၚ်တောဲ စၟတ်သမ္တီပဒက်ပ္တန်ပရေၚ်ဆက်ဆောံ ကလုတ်တမာန် မရနုက်ကဵု (၇၅)ဝါ ကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ(၁၆) က္ဍိုပ်သ္ကိုပ်ပၞာန် ဟီုသ္ဂးကၠုၚ်သာ်ဏံရ။
“ကၟိန်ဍုၚ်သၟတ် ဗီုကၟိန်ဍုၚ်ဗၟာပိုဲဏံ ပၟိက်ဇၞော်ဒၟံၚ် ပ္ဍဲပရေၚ်ဍုၚ်ကွာန်ပထဝဳ မွဲဍုၚ်ဂှ် ညံၚ်ဂွံဓမံက်ရုပ်ရဴ အတိုၚ်ပၟိက်စိုတ်ဍေံတအ်မာန်ကီု ညံၚ်ဩဇာ ပ္ဍဲဒေသဂွံဗျာပ်တြးတိုန်ကီု ပရေၚ်ကဵုဇြဟတ်ဓရိုဟ်ကရေပ်ဓရတ် နဲကဲစုၚ်ကီု၊ ပရေၚ်ဂၠာဲဒုဟ် ဟီုဂးပါ်ပါဲဟီုဂရိုဟ်တအ်ကီု၊ ပရေၚ်ကၟာတ်လဒဵုကေတ်အရေဝ်တအ်ကီုတအ်ဂှ် ကေတ်အသိၚ်ရေၚ်တၠုၚ်ဒၟံၚ် အဆက်ဆက် သီုစိုတ်သီုစရိုတ်ဂှ် ဂွံဆဵုညာတ်ကေတ်ဒၟံၚ် ဗွဲမအောန်စိုတ်ရ” ဂှ် က္ဍိုပ်သ္ကိုပ်ပၞာန် မေန်အံၚ်လှာၚ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲလတူကၟိန်ဍုၚ်ဗၟာ ပရေၚ်ကၟိန်ဍုၚ်ဇၞော်လ္ၚဵုတအ် လညာတ်လပါ်ပရေံ ကေုာံပရေၚ်ကၠောန်ရေၚ်တၠုၚ်ဒၟံၚ် ညံၚ်ဂွံဟုတ်ယုတ်လီုလာ်အာ အလုံအိုဿီု သွက်ဂွံဆေၚ်မုက် တတ်ကၠောံအာမာန် က္ဍိုပ်သ္ကိုပ်ကၟိန်ဍုၚ်ရုယှာ ကေုာံ ကောန်ဍုၚ်ကွာန်ရုယှာဂမၠိုၚ် ဘိုၚ်ထ္ၜလဘာ် ရီုဗၚ်ကဵုဒၟံၚ်တအ် တၚ်ဏာဂုဏ်ဗွဲတၟေၚ်ရဂှ် ညးဟီုသ္ဂးလဝ်ဏီရ။
နဒဒှ်တွဳဗွိုၚ် ပရေၚ်ပံၚ်တောဲရေၚ်တၠုၚ် ကရောံကၟိန်ဍုၚ်ရုယှာဂှ် ပရေၚ်ဆက်ဆောံကၠောံကၟိန်ဍုၚ်၊ ကိစ္စပရေၚ်ကူသာန်သွံရာန်ကီု၊ ကဏ္ဍသၟာအာတရဴဂၠးကဝ်ကီု၊ ယေန်သၞာၚ်အခိုက်ကၞာ ကေုာံကဏ္ဍပရေၚ်ဝေၚ်ဇြဟတ်တအ်ကီု သီုကဵုပ္ဍဲကဏ္ဍပံၚ်ကောံတၞဟ်သ္အာၚ်ဂမၠိုၚ် ပံၚ်တောဲရေၚ်တၠုၚ်အာဂှ်ရ ညးဍုၚ်ကွာန်တအ်လေဝ် သွက်ဂွံပံၚ်တောဲရေၚ်တၠုၚ် နူကဵုကဏ္ဍကၠုၚ်စိုပ်ဇကုဂှ် ဟီုသ္ဂးလဝ်ရ။
ကံၚ်ဇြဳပၞာန် ဍိုက်ကဵုဇြဟတ်လွဟ်တုဲ သီကေတ်လဝ်အဝဵုကၟိန်ဍုၚ်ဂှ် ကၟိန်ဍုၚ်ဂၠးကဝ်ဂမၠိုၚ်ကီု သီုကဵုကၟိန်ဍုၚ်ဒေသတအ် ပါဲပ္တိတ်ထောံလဝ်တုဲ ပံၚ်တောဲရေၚ်တၠုၚ်ဒၟံၚ် ပ္ဍဲကိစ္စ စပ်ကဵုပရေၚ်ကလုတ်တမာန် ကရောံအလဵုအသဳပရေၚ်ညဳသၟဟ်ကောန်ဂကူ NUG ရ။
ပရိုၚ်-သြၚ်လောန်တိုၚ်(မ်)
ဗီုရုပ်-ရုၚ်ဂအုပ်စဵုဒၞာ