လဂုၚ် – ဖေဖဝ်ဝါရဳ (၁၈)
သွက်သၟာဒဒိုက်ကၟိန်ဍုၚ်ဗၟာတအ်ဂှ် ဂွံသုၚ်စောဲအာ ပ္ဍဲဇွောံမစၞစကာတၟေၚ် ကေုာံပရေၚ်ထံက်ပၚ်အာဟာရတအ် နဒဒှ်ပရေၚ်ရီုဗၚ် ဆေၚ်ရာကဵုအရီုဗၚ်ထံက်ပၚ်ပရေၚ်မၞိဟ်ဂှ် ထံက်ပၚ်အာ ဒဝ်ဠာ(၅၀) ပြကောဋိကိုတ်ရောၚ်ဂှ် ရုၚ်ကလုတ်တမာန်အမေရိကာန် လလောၚ်ပ္တိတ်လဝ် ပရိုၚ်ရ။
နူကဵုအေဂျေန်ဇြဳပရေၚ်ဖောအ်ဗြေဝ်တဴတက် ကၟိန်ဍုၚ်နာနာ အမေရိကာန် (USAID) မွဲကဆံၚ် မွဲကရောံကဵု အစဳဇန်ဇွောံမစၞစ ကုလသမဂ္ဂဂှ် လၟိဟ်မၞိဟ်အပံၚ်(၇၅၀၀၀၀) ပြၚ် နူကဵုပွိုၚ်ဍုၚ်က္တဵုဒှ်ဒၟံၚ်ပဋိပက္ခတအ်ဂှ် သွက်ဂွံလွဳပရာ ကေုာံသွက်ဂွံစဵုဒၞာ ပရေၚ်အာဟာရဆောတ်ယောၚ် ရီုဗၚ်ကဵုမာန်ရောၚ်ဂှ် ဟီုသ္ဂးလဝ်ရ။
ပ္ဍဲပရေၚ်ထံက်ပၚ်ဏံ မွဲကရောံကဵု ပရေၚ်ပါ်ပရအ်ဇွောံမလၟေၚ်ဂိတုဂှ် ကောန်ၚာ်သၟတ် သၟဝ်အာယုက်(၅)သၞာံဂမၠိုၚ်၊ မိယာဲနွံကဵုဒၟုၚ်ဒၠေၚ်ဂမၠိုၚ် ကေုာံမိယာဲနွံကဵုကောန်တှ်တအ်ဂှ် အပ်ပြာပ်ကဵုအာ ကပေါတ်စၞစ ဒှ်အာဟာရတအ်ရောၚ်ဂှ် ဂွံတီကေတ်ရ။
လၟိဟ်မၞိဟ် ပ္ဍဲကၟိန်ဍုၚ်ဗၟာ (၁၇)ပြကောဋိကိုတ် နွံဒၟံၚ်ပၟိက်ကဵုပရေၚ်ရီုဗၚ်ထံက်ပၚ် ဆေၚ်ရာကဵုအထံက်ပၚ်ပရေၚ်မၞိဟ်တအ်ရဂှ် ကုလသမဂ္ဂ လလောၚ်ပ္တိတ်လဝ်တုဲ နူကဵုသၞာံ ၂၀၂၀ တေံ ညးနွံပၟိက်ကဵုပရေၚ်ရီုဗၚ် မွဲပြကောဋိကိုတ် ဟွံပေၚ်ရဂှ် သ္ဂးလဝ်ရ။
ပ္ဍဲကဵုအခိၚ်လၟုဟ်ဏံမ္ဂး မၞိဟ်ဒးထောံလသာသ္ၚိဌာန်တုဲ ဒးဂြိပ်ဒဴဒၟံၚ် နွံကၠုၚ် ဗ္ဒာဲ(၂)ပြကောဋိကိုတ်တုဲ ပ္ဍဲကဵုဂှ် ဗွဲမဂၠိုၚ်တအ် ဟိုတ်နူပဋိပက္ခ ကြဴနူဒပ်ပၞာန်သီအဝဵု ကေုာံပရေၚ်ဟွံဂီုကၠီုဂမၠိုၚ်တုဲ ဒှ်ညးဒးထောံလသာလဝ်ဌာန်ဒၟံၚ်တုဲ ဒးဂြိပ်ဒဴဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)