မတ်မလီု – ဖေဖဝ်ဝါရဳ(၁၈)
သွက်ဂွံကဵုသတိ ပရဟ်ဒုၚ်စဵုဒၞာ ပရေၚ်ကံၚ်ဇြဳပၞာန်သီအဝဵု ပန်ဗတိုက် နကဵုက္ၜၚ်ကျာမာန်ဂှ် ကော်ဘိက်အာ ညးဍုၚ်ကွာန်ယိုက်ဂၠေၚ်တာလျိုၚ် နဒဒှ်အထံက်ကၚ်ဗလးကျာရဂှ် ဌာနဝန်ဇၞော်ပရေၚ်စဵုဒၞာ NUG ကဵုလဝ်တၚ်သမ္တီရ။
သွက်ဂွံတီ ပရေၚ်ပၞာန်ကျာကံၚ်ဇြဳပၞာန် ချဳဒရာၚ်မွဲဒမြိပ်အခိၚ်မာန်ဂှ် ဗ္ဒပ်ပၞာန်ကျာတအ်ကီု သီုကဵုဗလးသၠာတ်က္ၜၚ်ကျာ ပွမမၚ်ရံၚ်ကျောဝ်ကဵုပရိုၚ် ပရေၚ်က္ၜၚ်ကျာအာကၠုၚ် မွဲဒမြိပ်ဂၠံၚ်တရဴဂှ် နွံဒၟံၚ်ပၟိက်ကဵု ညးကဵုပရိုၚ်တအ်ရဂှ် ဟီုသ္ဂးလဝ်ရ။
ပ္ဍဲအခိၚ်ဒပ်ပၞာန် သီကေတ်အဝဵုကၟိန်ဍုၚ်ဗၟာ ပွိုၚ်(၂)သၞာံဂှ် ကံၚ်ဇြဳပၞာန် ကၠောန်ကၠုၚ်ပရေၚ်ဗတိုက်ပန်ပှော် နကဵုက္ၜၚ်ကျာ (၇၀၀)ဝါပြၚ်တုဲ ပ္ဍဲကဵုပရေၚ်ပန်ပှော် နကဵုက္ၜၚ်ကျာတအ်ဂှ် ပရေၚ်ပန်ပှော် ပ္ဍဲလတူကောန်ညးဍုၚ်ကွာန် က္တဵုဒှ်လဝ်ဂၠိုၚ်အိုတ်ရဂှ် ဂွံတီကေတ်ရ။
ပ္ဍဲကဵုဂှ်မ္ဂး ပရေၚ်ပန်ပှော် ဘာဗ္တောန်လိက်လေတ်ယျေတ်ကုမ် မၞုံပ္ဍဲကွာန်ဒဳပေဝ်ယျေန်၊ ရးဒေသသေတ်ဂါၚ် ကေုာံဒေသအနာန်ပါ မၞုံပ္ဍဲပွိုၚ်ဍုၚ်ဖာကာန်၊ တွဵုရးကချေၚ်တအ်ဂှ် လျိုၚ်ဝန် KIO ကီု သီုကဵုကောန်အရာပ်တအ် ဒးချိုတ်ကၠုၚ်လဝ် ဗွဝ်ကဵုဗွဝ် နွံရ။
အလုံမွဲကၟိန်ဍုၚ် ကြဴနူဒပ်ပၞာန်သီအဝဵုတုဲဂှ် ဟိုတ်နူပရေၚ်ဒပ်ကံၚ်ဇြဳပၞာန် ပန်ဗတိုက်ကၠုၚ် နကဵုက္ၜၚ်ကျာတုဲ ကောန်အရာပ်ညးဍုၚ်ကွာန် (၂၀၀)တၠပြၚ် ဒးချိုတ်အာလဝ်ရဂှ် NUG လလောၚ်တြးလဝ်ရ။
သွက်ဂွံစဵုဒၞာပိုန်ဟာန် ဒြပ်ရတ်ညးဍုၚ်ကွာန်တအ် နပူဂဵုမိက်ဂွံပါလုပ်ရေၚ်တၠုၚ် နဒဒှ်အထံက်ကၚ်ဗလးကျာမ္ဂး ဆက်စၠောံကဵု အကံက် Telegram https://t.me/MASurveillance24 ဌာနဝန်ဇၞော်ပရေၚ်စဵုဒၞာ စဳဇန်ရေၚ်တၠုၚ်ကဵုဒၟံၚ်ညိဂှ် ဟီုဗတိုက်ဖ္အောဝ်လဝ်ရ။
ပရိုၚ်-သြၚ်လောန်တိုၚ်(မ်)