ဗိက်၊ ဖေဖဝ်ဝါရဳ (၁၈)
ပ္ဍဲဂိတုဖေဖဝ်ဝါရဳ (၁၇) ၜိုတ်အခိၚ်ပယျာံဂယး (၅) နာဍဳဂှ် လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲလ္ပာ်ကွာန်တြေံ ကွာန်တုၚ်ဗျဝ်၊ ပွိုၚ်ဍုၚ်ဗိက်၊ ရးဒေသဇၞော်တၞၚ်သဳဂှ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်ပံၚ်ကောံမဟာမိတ် ပွိုၚ်ဍုၚ်တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ် ဒပ်ကံၚ်ဇြဳပၞာန်ကဵု ကောန်ဂကောံဒပ်ပၞာန်ညးဍုၚ်ကွာန် ဇြဟတ်ဒပ် (၃၀) ပြၚ် မဖျေံလဝ်ဒပ်ဂှ် ဂကောံဒပ်ဒမၠုက်ဟွံဗက်စလ္ပာ်၊ တမ်ဒပ်(၂) ခရိုၚ်ဗိက်၊ ပကဖ ဗိက်၊ ပကဖ ပွိုၚ်ဍုၚ်ကျောန်သု ကေုာံ ဂကောံဒပ်ပံၚ်ကောံမဟာမိတ်ဂမၠိုၚ်တံ လုပ်စိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ်မွဲနာဍဳတုဲ လ္ပာ်ကံၚ်ဇြဳပၞာန် မွဲတၠ ချိုတ်၊ မွဲတၠ ကလိဂွံလဝ်ဝပ်တုဲ သီဂိုၚ်ဂွံလဝ် သီုကဵုသေနာတ်မွဲဇကိုအ်ဂှ် သ္ဂးရ။
ကြဴနူပေါဲဗ္တိုက်ၜါလ္ပာ်တုဲ လ္ပာ်ကံၚ်ဇြဳပၞာန် စဵုကဵုပယျာံဂယး (၁၀) နာဍဳဂှ် ၜိုန်ရကၠောန်သ္ပပန်ပှော်လဝ် နကဵုလွဟ်ဇၞော်၊ လွဟ်ဍောတ်တံ ကြာန်န်ကီုလေဝ် လ္ပာ်ဂကောံဒပ်ပံၚ်ကောံစဵုဒၞါညးဍုၚ်ကွာန်တံ ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ဂှ် ဂွံတီကေတ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသနူကွာန်တုၚ်ဗျဝ်လ္ၚဵုတံဝွံ ပါဲဒလေတ်လဝ်ယာယဳ ဒၞါဲဗၠးဘဲတံတုဲ ညးဒေသလ္ၚဵုတံဂှ် အောပ်မာလဝ် ပ္ဍဲကဵုသ္ၚိဒၟံၚ်တံရဂှ် သ္ဂးရ။
ကွာန်တုၚ်ဗျဝ်ဝွံ ဒှ်ကွာန်ဆက်လဝ် ပွိုၚ်ဍုၚ်ဗိက်ကဵု ပွိုၚ်ဍုၚ်တၞၚ်သဳ မွဲတုဲ ဟိုတ်နူဒှ်ကွာန် ပၞာန်ညးဍုၚ်ကွာန်မွဲကွာန်ဂှ်ရ ဂကောံဒပ်စဵုဒၞါဒေသတံ လုပ်စိုပ်ဗ္တိုက်ဒၟံၚ် ဗွဲဏှမွဲဏှရ။
သၞာံတုဲကၠုၚ် ပ္ဍဲဂိတုနဝ်ဝေမ်ဗာ ၂၂ တေံဂှ်လေဝ် အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲကွာန်တုၚ်ဗျဝ်ဂှ် သ္ကိုပ်အုပ်ဓုပ် ကံၚ်ဇြဳပၞာန်ခါန်ကၞက် ဥူဇြုၚ်တာန် ကေုာံ ဒုဗိုလ်အကြာပ်မွဲတၠ လ္ပာ်ကံၚ်ဇြဳပၞာန်တံ ချိုတ်အာလဝ်တုဲ ကောန်ဒပ်ကံၚ်ဇြဳပၞာန် (၅) တၠလေဝ် ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)