ဘာပန်၊ ဖေဖဝ်ဝါရဳ (၁၈)
ဒပ်ကံၚ်ဇြဳပၞာန် ဟိုတ်နူထောံလဝ်မခတိုဟ် နကဵုက္ၜၚ်ကျာ လ္တူကွာန်ဂမၠိုၚ် မၞုံအပ္ဍဲတိဍာ် ဒပ်မဟာ (၅) ခရိုၚ်ဘာပန် ဗော်သွးကောန်ဂကူကရေၚ် KNU ၜါတ္ၚဲအဆက်က်ဂှ်ရ ဘာဗ္တောန်လိက်ကဵု စမြိုၚ်သ္ၚိဒၟံၚ်တံ လီုလာ်အာလဝ်ဂှ် ပ္ဍဲဂိတုဖေဖဝ်ဝါရဳ (၁၇) တေံ ကေအာန်ယူ လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဖေဖဝ်ဝါရဳ (၁၅) အခိၚ်ဗ္တံ (၁၁) နာဍဳဝိုက်ဂှ် က္ၜၚ်ကျာဗ္တိုက် ဒပ်ကံၚ်ဇြဳပၞာန် (၃) ဖ္ဍိုက်ဝွံ ကၠုၚ်စိုပ်ထောံလဝ်ဗုမ် (၆) မ ကုအပ္ဍဲကွာန်ထအ်ထဳပေဝ်၊ ဂကောံကွာန်ပေကေဒါ၊ ပွိုၚ်ဍုၚ်လူတဝ် ဒပ်မဟာ (၅) ခရိုၚ်ဘာပန်ဂှ်တုဲ ဘာဗ္တောန်လိက်မွဲဘာ စမြိုၚ် (၇) မပါဂှ်ကီု၊ ဆေၚ်ဖျာ (၃) ဆေၚ် ကေုာံ စာတ်သြောံ (၂) မ ဒးအာလဝ်တုဲ ပၟတ်တူဒှ်အာဆောံဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် စက်ထဲတိ (၄) မ၊ ကွဳလိုန်ဓာတ် (၂) ဖ္ဍိုက်၊ သလံၚ်အေန်တာနိတ်ဝိုၚ်ဖိုၚ် (၁) ကေုာံ စက်သ္ၚုမွဲမဂှ်လေဝ် ဇီုကပိုက်လီုလာ်အာလဝ်တုဲ ၚုဟ်မးအပံၚ်ဖအိုတ် သြန်သေံ (၃) ပြကောဋိကိုဋ်ၝာတ်ပြၚ် ဒးဆောံလေၚ်အာလဝ်ရောၚ် လလောၚ်ပ္တိတ်လဝ်ရ။
ပ္ဍဲဂိတုဖေဖဝ်ဝါရဳ (၁၄) တုဲကၠုၚ်တေံ အခိၚ်ဗ္တံ (၁၀) နာဍဳဂှ်လေဝ် က္ၜၚ်ကျာဗ္တိုက်ဒပ်ကံၚ်ဇြဳပၞာန် (၃) ဖ္ဍိုက်ဝွံ ထောံလဝ်ဗုမ် (၆) မ ကုအပ္ဍဲကွာန်ဒေဗုနဝ် ပွိုၚ်ဍုၚ်လူတဝ် ဒပ်မဟာ (၅) ခရိုၚ်ဘာပန် KNU ဂှ်တုဲ ဒးလဝ် သ္ၚိဒၟံၚ် (၆) မတုဲ ပၟတ်တူလီုလာ်အာလဝ်ဂှ် KNU သ္ဂးရ။
အပ္ဍဲအကြာတ္ၚဲတံဏံဂှ် ဒပ်ကံၚ်ဇြဳပၞာန် ကၠောန်သ္ပဗ္တိုက်ကၠုၚ် ကဵုက္ၜၚ်ကျာ အပ္ဍဲဒေသတိဍာ် ဒပ်မဟာ (၆) ခရိုၚ်ဒူပလာယာ ကေုာံ တိဍာ်ဒပ်မဟာ (၅) ခရိုၚ်ဘာပန် ကေအာန်ယူတံ အဆက်က်ရ။
သၞာံ ၂၀၂၃ အပ္ဍဲဂိတုဂျာန္နဝါရဳ ပွိုၚ်မွဲဂိတုဓဝ်ဂှ် ဒပ်ကံၚ်ဇြဳပၞာန် ကၠောန်သ္ပဗ္တိုက် ထောံလဝ်မခတိုဟ် လၟိဟ်လ္တုန် ဗ္ဒါဲ (၆၀) ဝါ ပ္ဍဲကဵုဒေသတိဍာ်ဒပ်မဟာ (၆) ခရိုၚ်ဒူပလာယာ ကဵု တိဍာ်ဒပ်မဟာ (၅) ခရိုၚ်ဘာပန် ကေအာန်ယူတံဂှ်တုဲ သီုကဵုပါလုပ် ကောန်ၚာ်သၟတ် ကေုာံ အ္စာဓဝ်ဘာသာခရေတ်ယာန်ဂမၠိုၚ် (၁၃) တၠ ချိုတ်အာလဝ်တုဲ (၉) တၠ ကလိဂွံလဝ်ဝပ်ဂှ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)