ဘာပန်၊ ဖေဖဝ်ဝါရဳ (၁၈)
ပ္ဍဲတိဍာ်ဗော်သွးကောန်ဂကူကရေၚ် KNU ဂှ် အပ္ဍဲဒပ်ပၞာန်သီအဝဵု ပွိုၚ် (၂) သၞာံဂှ် မွဲကရောံကဵုပေါဲဗ္တိုက်တံဂှ် ဟိုတ်နူပွမဖံက်ပ္ကဝ်အခေါၚ်အရာမၞိဟ် ဒပ်ကံၚ်ဇြဳပၞာန်တံဂှ်ရ ညးဒဒိုက်ပါဲဒဴဘဲပၞာန် နွံကၠုၚ် စဵုကဵုဗ္ဒါဲ (၅) ကိုဋ်ဂှ် ညးမၞုံအခေါၚ်ဟီုဂး ကေအာန်ယူ ပဒိုဝ်သဝ်တဝ်နဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတိဍာ်အုပ်ဓုပ် KNU ဂှ် အပ္ဍဲကာလသီအဝဵုဂှ် ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်တံတုဲ ပန်ပှော်လွဟ်ဇၞော်ကီု၊ ဗ္တိုက်ကဵုက္ၜၚ်ကျာကီု ကေုာံ ပွဝးပ္ကဝ်အခေါၚ်အရာမၞိဟ်တံဝွံ မွဲတ္ၚဲတုဲမွဲတ္ၚဲ သာပရေံကၠုၚ်ရ။
ဟိုတ်နူဒပ်ကံၚ်ဇြဳပၞာန် စွံပွန်ဗ္တိုက်ဒၟံၚ် လ္တူကောန်အရာပ်တံဂှ်ရ လၟိဟ်ညးပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်တံ ဂၠိုၚ်ကၠုၚ်လဝ်တုဲ စိုပ်ကၠုၚ် ဒဵုကဵုအကာဲအရာ လ္တူပရေံတုဲပရေံတံရောၚ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ သ္ဂးရ။
“အကာဲအရာဂှ်တှ်ေ တၟေၚ်တုဲ ဟွံခိုဟ်ကၠုၚ်ပုဟ်။ သာတုဲပရေံကၠုၚ်ရဂှ် မိက်ဂွံဟီုရ။ အတိုၚ်ပရိုၚ် အဲဂွံတီလက္ကရဴအိုတ်ဂှ်တှ်ေ ဒှ်အာစဵုကဵုမသုန်ကိုဋ်ယျ။ အပ္ဍဲတိဍာ်ထိၚ်ဒက်ပိုယ်တံဂှ်တှ်ေ။ ဟီုမ္ဂး လၟိဟ်ဂှ် ဂၠိုၚ်ကၠုၚ်ကွေံကွေံ။ မူဟိုတ်ရောဟီုတှ်ေ ကံၚ်ဇြဳပၞာန်ဂှ်လေဝ် ဇၟာပ်တ္ၚဲနွံ စွံပွန် ကုညးဍုၚ်ကွာန်တံဂှ်တုဲ ဗ္တိုက်ဒၟံၚ်တုဲတှ်ေ ညးဍုၚ်ကွာန်ဂှ် ဒးဂြိပ်ဒဴပါဲဒလေတ်ဒၟံၚ်ဟီုဂှ် သ္ဇက်ဂွံဒှ်သံသယဟွံမွဲရ။ လၟိဟ်မၞိဟ်မ္ဒးဂြိပ်ဒၟံၚ်တံ ဂၠိုၚ်ဟီုဂှ် ညအ်ရ” သာ်ဝွံ သ္ဂးရ။
ပ္ဍဲတိဍာ်အုပ်ဓုပ် KNU ဂှ် အပ္ဍဲဒပ်ပၞာန်သီအဝဵု ပွိုၚ် (၂) သၞာံဂှ် ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO ကေုာံ ဂကောံပံၚ်ကောံမဟာမိတ်ပၠန်ဂတး ကဵု အကြာဒပ်ကံၚ်ဇြဳပၞာန်တံဂှ် ပေါဲဗ္တိုက်အပံၚ် ဗ္ဒါဲ (၈၀၀၀) က္တဵုဒှ်လဝ်ရ။
ဟိုတ်နူပေါဲဗ္တိုက်ဂှ်တုဲ လၟိဟ်ညးဍုၚ်ကွာန်ကောန်အရာပ် မ္ဒးဂြိပ်ဒဴပါဲဒလေတ်ဒၟံၚ်တံဂှ်လေဝ် သာဂၠိုၚ်တိုန်ကၠုၚ်လဝ်တုဲ ဂဥုဲဇဗ၊ ဇွောံမစၞစ၊ ဒၞါဲစ္ၜုဲစ္ၜော်၊ ကပေါတ်အရပ်အစပ်တံ ဒှ်တမ် နွံပၟိက်ဒၟံၚ်ကာတၟေၚ်ရောၚ်ဂှ်လေဝ် ဂွံတီကေတ် နူကဵုဇရေၚ်ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ်လေဝ် အရီုဗၚ်ကာတၟေၚ် မနွံပၟိက် သွက်ညးဍုၚ်ကွာန်ပါဲဒဴဘဲပၞာန်တံဂှ်လေဝ် ဒှ်ကၠုၚ်အခိၚ်ပၟိက်ဇၞော်ကွေံကွေံယျဂှ် ဟီုရ။
“လ္ပာ်ပိုယ်တံဂှ်လေဝ် သွက်ဂွံဂွံ အရီုဗၚ်ကာတၟေၚ်တံ ဂၠိုၚ်နူဏံမာန်ဂှ် ဒှ်ကၠုၚ်ဒၟံၚ်အခိၚ်အခါ ပၟိက်ဇၞော်ကွေံကွေံယျ။ ပရူပရာမဒှ်ဒၟံၚ်ဂှ်တှ်ေ ပ္ဍဲတိဍာ်ပိုယ်တံမွဲဓဝ် ဟွံသေၚ်ပုဟ်။ က္တဵုဒှ်ဒၟံၚ် အလုံဍုၚ်မွဲဂှ်တှ်ေ ဟွံအောန်နူကဵုၜါပြကောဋိကိုဋ်ရပုဟ်ဂှ် အဲဂံၚ်ဟီု ချိုတ်တ်ပၠိုတ်တ်ရ။ ဟိုတ်ဂှ်ရ ဒဒှ်မရီုဗၚ် ပရေၚ်နွံပၟိက် သွက်ညးပါဲဒဴဘဲပၞာန်တံဂှ်ဝွံ ဒှ်ကၠုၚ်ပၟိက်ဇၞော်ကွေံကွေံယျဟီုဂှ် မိက်ဂွံဟီုရ” သာ်ဝွံ သ္ဂးရ။
အတိုၚ်တၚ်လလောၚ်တြး KNU တံဂှ်မ္ဂး အပ္ဍဲဂိတုဂျာန္နဝါရဳ သၞာံ ၂၀၂၃ ပွိုၚ်မွဲဂိတုဓဝ်ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ကီု၊ ပရေၚ်ဗ္တိုက်တရဴကျာကီု ကေုာံ ဟိုတ်နူပွမဝးပ္ကဝ်အခေါၚ်အရာမၞိဟ်တံဂှ်ရ ညးဍုၚ်ကွာန်ကောန်အရာပ် ဗၞတ် (၁၇) တၠ ချိုတ်အာလဝ်တုဲ ဗ္ဒါဲ (၅၀) တၠ ဇီုကပိုက်ကလိဂွံလဝ်ဝပ် နွံဂှ်ရ အကာဲအရာ ကောန်အရာပ်ဇီုကပိုက် ချိုတ်ဂျိုၚ်တံဝွံ ဂၠိုၚ်ကၠုၚ်နူ လ္တူနူဂိတုတုဲတုဲကၠုၚ်တေံရ။
အခိၚ်လၟုဟ်ဂှ် ပ္ဍဲတိဍာ်အုပ်ဓုပ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ ပၠန်ဂတးမဟာမိတ်တံဂှ် ပရေၚ်ပၞာန် သာကြံၚ်မ္ၚိုဟ်ကၠုၚ်တုဲ ဒပ်ကံၚ်ဇြဳပၞာန်ဂှ် ကၠောန်သ္ပကၠုၚ် ပရေၚ်ဗ္တိုက်တရဴကျာတံရ။
ပရိုၚ်−သြၚ်လောန်တိုၚ်(မ်)