လ္ဂုၚ်၊ ဂျူလာၚ် (၂၉)
အလုံမွဲကၟိန်ဍုၚ်ဂှ် ပပ္တံနူဂိတုဖေဖဝ်ဝါရဳ (၁) ဒပ်ပၞာန်သီအဝဵုတေံ စဵုကဵု ဂိတုဂျူလာၚ် (၁၈) သၞာံဏံဂှ် ထောံလသာသ္ၚိဌာန်တုဲ ညးဒးဂြိပ်ဒဴပါဲဒလေတ်ဒၟံၚ် ပဵုတိုန်ကၠုၚ် စဵုကဵု ဒ္စါံကိုဋ်ဘာ်ပြၚ်ရဂှ် ရုၚ်ပ္ညဳပ္ညပ်ပံၚ်ကောံ စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်လဝ် ပ္ဍဲဂိတုဂျူလာၚ် (၂၇) ဂှ်ရ။
အတိုၚ်ဂလာန် UNOCHA ဂှ်မ္ဂး ဗွဲကြဴဒပ်ပၞာန်သီအဝဵုတုဲ ဟိုတ်နူပဋိပက္ခ မက္တဵုဒှ်လဝ်တံကဵု ဘဝဟွံဂီုကၠီုတံတုဲ ညးဒးထောံလသာဌာန်ဒၟံၚ် မၞုံကၠုၚ် စဵုကဵု (၈၅၇၉၀၀) တၠတုဲ ယဝ်ရပံၚ်တောဲ ကဵုလၟိဟ်ညးဒးထောံလသာဌာန်ဒၟံၚ် ကၠာဂွိုအ်သီအဝဵုတံဂှ်မ္ဂး ညးဒးဂြိပ်ဒဴ ထောံလသာဌာန်ဒၟံၚ်တံ မၞုံကၠုၚ် စဵုကဵု (၁ ဒဿမ ၂) ပြကောဋိကိုဋ်ရဂှ် သ္ဂးလဝ်ရ။
အတိုၚ်တၚ်လလောၚ်တြး UNOCHA ဂှ်မ္ဂး ဗွဲကြဴဒပ်ပၞာန်သီအဝဵုတုဲ ညးဒးဂြိပ်ဒဴပါဲဒလေတ်ဒၟံၚ်တံဝွံ စဵုကဵုဂိတုမေ တုဲကၠုၚ်တေံဂှ် ဗ္ဒါဲ (၆) ကိုဋ်ဟေၚ် မၞုံတုဲ မၞိဟ်ဒးဂြိပ်ဒဴထောံလသာဌာန်ဒၟံၚ် အပ္ဍဲဂိတုဂျောန်ကဵု ဂိတုဂျူလာၚ် ပွိုၚ် (၂) ဂိတုဂှ် ဂလိုၚ်တိုန်ကၠုၚ် စဵုကဵု (၂) ကိုဋ်ဘာ်ပြၚ်ရ။
အပ္ဍဲသတ္တာဟတုဲကၠုၚ်တေံ ပ္ဍဲကဵုရးဒေသ ကေုာံ တွဵုရးဗွဲမဂၠိုၚ်ဂှ် အကြာဒပ်ပၞာန်သီအဝဵု ကဵု ဂကောံရပ်လွဟ်ကောန်ဍုၚ်အရၚ်တံဂှ် ပေါဲဗ္တိုက်တံ ဆက်က္တဵုဒှ်ဒၟံၚ်ဂှ်ရ အကာဲအရာ ပရေၚ်ဂီုကၠီု ကြံၚ်မ္ၚိုဟ်ဒၟံၚ်တုဲ တၚ်နွံပၟိက် ပရေၚ်ဗ္စာရဏာမၞိဟ်တံ ဆက်သၠုၚ်တိုန်ဒၟံၚ်ရဂှ် သ္ဂးရ။
ပ္ဍဲပွိုၚ်ဍုၚ် ဖာကာတ်၊ တွဵုရးကချေၚ် မစုက်ဒၟံၚ်ကဵု ရးဒေသဇၞော်သက်ကိုၚ်ဂှ် အကြာဒပ်ပၞာန်ဗၟာကဵု ဒပ်ပၞာန်ဗၠးၜးကချေၚ်တံဂှ် ပေါဲဗ္တိုက်ရပ်လွဟ်တံ သာတုဲသ္ကာတ်မြဟ်ကၠုၚ်ဂှ်ရ ပွမထောံလသာသ္ၚိဌာန် ဆုဲပြံၚ် ဖျေံသ္ဇိုၚ်တံ ထပ်က္တဵုဒှ်ကၠုၚ်လဝ်ရ။
သ္အာၚ်နူဂှ်ပၠန် ပ္ဍဲပွိုၚ်ဍုၚ် မံၚ်တဝ် သၟဝ်ကျာတွဵုရးရခေၚ်ဂှ် အကြာဒပ်ပၞာန်ဗၟာကဵု ဒပ်ပၞာန်ရခေၚ်တံ ပေါဲဗ္တိုက်က္တဵုဒှ် ပ္ဍဲဂိတုဂျူလာၚ် (၁၈) တုဲကၠုၚ်တေံတုဲဂှ် အကာဲအရာပရေၚ်ဂီုကၠီု ကဵု ဟွံညိၚ်ဝတ်တံ က္တဵုဒှ်ကၠုၚ်ရဂှ် UNOCHA လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)