ရေဝ်၊ ဂျူလာၚ် (၂၉)
ဗ္ဒိုပ်ဗၠာဲသၟိၚ် ၝောံဍုၚ်ရေဝ်၊ မၞုံဍုၚ်ရေဝ်၊ တွဵုရးဍုၚ်မန်ဂှ်ဝွံ ဂိတုဂျူလာၚ် (၂၈) ဇိုၚ်သဝ်တ္ၚဲ ၜိုတ် (၃) နာဍဳဂှ် ဒးဒုၚ်ပန်ဗ္တိုက်လဝ်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဗၠာဲသၟိၚ်ၝောံဍုၚ်ရေဝ်ဂှ် အကြာဂကောံဒပ် သၟဝ်တဲကံၚ်ဇြဳပၞာန်တံ မဗတေၚ်ဓရတ်လဝ် ပရေၚ်ဂီုကၠီုတံဂှ် ဂကောံလကိုဟ်ဍုၚ်ရေဝ်(ရေးဘီးလူအဖွဲ့ ) ဂှ် လုပ်စိုပ်ပန်ဗ္တိုက်လဝ်ရ။
ဟိုတ်နူဗ္ဒိုပ်ဗၠာဲသၟိၚ်ၝောံဍုၚ် ဒးဒုၚ်ဗ္တိုက်ဂှ်တုဲ ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန် (၃) တၠ ချိုတ်အာလဝ်ရောၚ်ဂှ် ညးဒုၚ်တာလျိုၚ် ဂကောံလကိုဟ်ဍုၚ်ရေဝ်တံ ဟီုရ။
သ္အာၚ်နူဂှ်ပၠန် ပရေၚ်ပြုပြေၚ်ပၞာန်တံဂှ်လေဝ် ထပ်သၠုၚ်ပ္တိုန်အာရောၚ်တုဲ နကဵုညးဍုၚ်ကွာန်တံ စွံသတိအာကၠုၚ်အိုတ်ဂှ် ဂကောံဒပ်စဵုဒၞါညးဍုၚ်ကွာန်တံ ဖ္တိုက်ဖ္အောဝ်လဝ်ရ။
ညးဒေသမွဲတၠဂှ် ဗွဲကြဴဗ္ဒိုပ်ဗၠာဲသၟိၚ်ၝောံဍုၚ်ရေဝ် ဒးဒုၚ်ပန်ဗ္တိုက်တုဲဂှ် ဂကောံဒပ်ကံၚ်ဇြဳပၞာန်တံ ပန်ပှော်လဝ်ဆဆဵုတုဲ ပွမကၟာတ်ဆိုအ်ဗဂၠိုက်ဂၠါဲစၟဳစၟတ်တံလေဝ် ကၠောန်ၜိုတ်ဒၟံၚ်ရဂှ် သ္ဂးရ။
တုဲကၠုၚ် ဂိတုဂျူလာၚ် (၂၇) ဂှ်လေဝ် ဂကောံပၠန်ဂတးတွဵုရးဍုၚ်မန်တံ အာစိုပ်ပန်ဗ္တိုက်လဝ် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံပ္ဍဲက္ဍိုပ်ဒဒန်ဇၞော် ပွိုၚ်ဍုၚ်ရေဝ်ဂှ်ရ။
အပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန်မွဲတၠ ချိုတ်အာလဝ်ရောၚ်ဂှ် ဂကောံပၠန်ဂတးတွဵုရးဍုၚ်မန်(MSRO) တံ လလောၚ်ပ္တိတ်ကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)