တၞၚ်သဳ၊ ဖေဖဝ်ဝါရဳ(၁၉)
ပွိုၚ်ဍုၚ်ပဠဝ် ကေုာံပွိုၚ်ဍုၚ်တၞၚ်သဳ မၞုံပ္ဍဲရးဒေသဇၞော်တၞၚ်သဳတအ်ဂှ် ကြဴနူကံၚ်ဇြဳပၞာန် လလောၚ်တြးကၠုၚ်ပရေၚ်အုပ်ဓုပ်ပၞာန်တုဲဂှ် ဟိုတ်နူဍိုက်ထ္ပက်ဖျေံကရောၚ်ပၞာန်တုဲ ပေါဲဗတိုက်တအ် သာသ္ကာတ်မြဟ်တိုန်ကၠုၚ်ဒၟံၚ်ရဂှ် ဒပ်စဵုဒၞာဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၂)တေံဂှ် ကံၚ်ဇြဳပၞာန် လလောၚ်တြးကၠုၚ် ပွိုၚ်ဍုၚ်ပဠဝ် ကေုာံပွိုၚ်ဍုၚ်တၞၚ်သဳ ပရေၚ်အုပ်ဓုပ်ပၞာန်တုဲ ထ္ပက်လုပ်ကၠုၚ်ပၞာန် နကဵုကရောၚ်ပၞာန် ဇြဟတ်ပါလုပ် (၂၀၀)ပြၚ်မွဲကရောၚ်ပၞာန်၊ ဇြဟတ်ပါလုပ် (၁၀၀)တၠပြၚ် မွဲကရောၚ်ပၞာန်ရ။
ဒၟာနူဒပ်ကံၚ်ဇြဳ ထ္ပက်ဖျေံနၚ်ကရောၚ်ပၞာန်တုဲ ပ္ဍဲဂိတုဖေဖဝ်ဝါရဳ ဒုတိယသတ္တာဟ တုဲကၠုၚ်တေံ စဵုအခိၚ်တ္ၚဲဏံ ပ္ဍဲပွိုၚ်ဍုၚ်ပဠဝ် ပေါဲဗတိုက်က္တဵုဒှ်လဝ် (၁၀) ဝါ၊ ပ္ဍဲပွိုၚ်ဍုၚ်တၞၚ်သဳ ပေါဲဗတိုက်ဟွံအောန်နူ (၅) ဝါ က္တဵုဒှ်ကၠုၚ်လဝ်ရ။
ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ် (၁)ဂှ်မ္ဂး ဒၟာနူလ္ပာ်ဒပ်ကံၚ်ဇြဳပၞာန် ထ္ပက်ကရောၚ်ပၞာန်တုဲ ပေါဲဗတိုက်က္တဵုဒှ်ဒၟံၚ် အရိုဟ်ဒဒှ်တ္ၚဲကီု ပေါဲဗတိုက်ၜါလ္ပာ်လေဝ် သာသ္ကာတ်မြဟ်ကၠုၚ်မာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ (၁၅) တုဲကၠုၚ်တေံ ပ္ဍဲပေါဲဗတိုက်က္တဵုဒှ်လဝ် ပ္ဍဲကွာန်ကဒေဝ် ပွိုၚ်ဍုၚ်ပဠဝ် ဟိုတ်နူလ္ပာ်ကံၚ်ဇြဳပၞာန် ထ္ပက်ကၠုၚ်ပၞာန် သ္ကာတ်မြဟ်တုဲ ဒးဗလးထောံလဝ်တဲ ဗ္ဒပ်မုက်ပၞာန် ဒပ်စဵုဒၞာညးဍုၚ်ကွာန်မွဲဗ္ဒပ်ရ။
အခိၚ်လၟုဟ်ဏံမ္ဂး ပ္ဍဲကဵုပွိုၚ်ဍုၚ်ပုဠဝ် ကေုာံပွိုၚ်ဍုၚ်တၞၚ်သဳဂှ် ဟိုတ်နူပေါဲဗတိုက်တုဲ ညးဒေသ (၅၀၀၀)တၠပြၚ် ဒးထပ်ဂြိပ်ဒဴဒၟံၚ်ကီု ဟိုတ်နူပရေၚ်ဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ပရေၚ်ဇီုကပိုက်ချိုတ်ဂျိုၚ် နွံကၠုၚ်ဒၟံၚ်ရ။
လလောၚ်တြးပရေၚ်အုပ်ဓုပ်ပၞာန်တုဲဗက် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ (၃) တၠ ဒးချိုတ်အာတုဲ ဂွံလဝ်ဘဲဝပ် (၃)တၠကီု ပ္ဍဲကဵုပေါဲဗတိုက်ဂှ် ဟိုတ်နူဒပ်ကံၚ်ဇြဳပၞာန် စံၚ်ပလီုလဝ်တုဲ သ္ၚိဒၟံၚ်ဟွံအောန်နူ (၂၀)မ ဒးတူလေၚ်အာလဝ်နွံရ။
မွဲကရောံကဵုပေါဲဗတိုက်က္တဵုဒှ်သ္ကာတ်မြဟ်ကၠုၚ် ပ္ဍဲပွိုၚ်ဍုၚ်ပဠဝ် ကေုာံပွိုၚ်ဍုၚ်တၞၚ်သဳ ပ္ဍဲရးဒေသဇၞော်တၞၚ်သဳဂှ်တုဲ ပ္ဍဲပွိုၚ်ဍုၚ်ထဝါဲ၊ ဍာ်ဗု၊ လံၚ်လုၚ် ကေုာံဗိက် ပွိုၚ်ဍုၚ်သှ်ေဒၟံၚ်တအ်ဂှ်လေဝ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက် ဆက်က္တဵုဒှ် သ္ကာတ်မြဟ်ကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)