ရေဝ်၊ ဖေဖဝ်ဝါရဳ(၁၉)
ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ်ဂှ် နူဂိတုဂျာန္နဝါရဳ စၟတ်တ္ၚဲ (၂၈) တုဲကၠုၚ်တေံ စဵုကဵုဂိတုဖေဖဝ်ဝါရဳ စၟတ်တ္ၚဲ (၁၈)ဏံ ပွိုၚ်(၃)သတ္တာဟဂှ် မၞိဟ်လိုန်ဒးမာၚ်တိုပ်တိ နွံကၠုၚ် စဵုကဵု (၄)တၠရဂှ် ညးဒေသတအ်ကီု သီုကဵုဂကောံရီုဗၚ်ပရေၚ်မၞိဟ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးဒေသ လိုန်ဒးမာၚ်တိုပ်တိတအ်ဂှ် ဃောတတ်အာကၠုၚ် ဗ္ဒာဲဗ္ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲဗ္ဒာဲကြုၚ်ဒဒန်ဇုက် ကွာန်ဗေကလောဲ ဍုၚ်လမိုၚ် ပွိုၚ်ဍုၚ်ရေဝ်ဂှ် လိုန်ဒးမာၚ်တိုပ်တိတုဲ ဂွံကၠုၚ်ဒၟံၚ် ဘဲဝပ်သ္ကာတ်မြဟ်ရ။
ပ္ဍဲကဵုညးလိုန်ဒးမာၚ်တိုပ်တိတအ်ဂှ် ဥူညောအ်ဝေ အာယုက်(၅၉) သၞာံ ဒၟံၚ်ဍုၚ်လၟိုၚ် ကေုာံနာဲကိုဝ်မာၚ် အာယုက် (၇၀)သၞာံတအ်ဂှ် ဂွံလဝ်ဘဲဝပ် ကအ်ဇိုၚ်ပါဲ ပိုတ်တိတ်အာတုဲ သှ်ေ(၂)တၠဂှ် ၜိုန်ရဇိုၚ်ဟွံပိုတ်တိတ်ကီုလေဝ် ဂွံလဝ်ဘဲဝပ်ဇီုကပိုက်ဒးလဝ်ကဝေက်မာၚ်ရ။
ဟိုတ်နူဒပ်စဵုဒၞာညးဍုၚ်ကွာန်တအ် ကၠုၚ်ဗတိုက်ဒၟံၚ် ဗ္ဒပ်ကံၚ်ဇြဳပၞာန် မွဲခဏမွဲခဏတုဲ ဍေံတအ်ပါံစွံလဝ်မာၚ် မွဲဗွိုၚ်ဗ္ဒပ်ဂှ်ကီု ကၠာနူဟွံဂွံလလောၚ်တြး အမိၚ်အသံတိတ်ဗ္တံဟွံဂွံဏီဂှ်လေဝ် ပန်ပှော်လဝ် မၞိဟ်အာကၠအ်တအ်ရဂှ်လေဝ် ညးဒေသမွဲတၠ ဟီုသ္ဂးလဝ်ရ။
ပ္ဍဲကဵုဗ္ဒပ်ကံၚ်ဇြဳပၞာန် ကေုာံကၠအ်ဥဒျာန်တအ်ဂှ် ဟိုတ်နူမိုၚ်တိုပ်တိ ခတိုဟ်ဒၟံၚ် မွဲခဏမွဲခဏတုဲ ကောန်ဒေသဗွဲမဂၠိုၚ်တအ် ဟွံဂံၚ်အာကၠအ်သွဝ်ဇကုကီု မၞိဟ်ဒးကၠောန်ဒၟံၚ်ကမၠောန် သွက်ဂယိုၚ်ဗုၚ်ဂၞဴ ဒေါံဟွံဂွံတအ်ဟေၚ် အကြာဒးဒှ်ဒၟံၚ်ဓဝိၚ်ကဵု အန္တရာယ်မာၚ်တိုပ်တိ တိတ်ကၠုၚ်ကၠောန်ကမၠောန်ဂှ် လိုန်ဒးဒၟံၚ်မာၚ်တိုပ်တိရ။
အတိုၚ်တၚ်ဂၞၚ် ဌာန်ပရိုၚ်သြၚ်လောန်တိုၚ်(မ်) ပကောံပကေဝ်ဂွံလဝ်မ္ဂး အခိၚ်ပၞာန်သီအဝဵု ပ္ဍဲတွဵုရးဍုၚ်မန်တုဲဂှ် ပွိုၚ်ဍုၚ်ကျာ်ထဝ်၊ ၜဳကလေၚ်၊ ရေဝ် ဟိုတ်နူမာၚ်တိုပ်တိတုဲ ကောန်အရာပ် ညးဒေသ ဟွံအောန်နူ (၁၀)တၠ ဂွံလဝ်ဘဲဝပ် နွံကၠုၚ်ဒၟံၚ်ရ။
အလုံမွဲကၟိန်ဍုၚ် စတမ်နူ သၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီကေတ်အဝဵုတုဲ ဟိုတ်နူမာၚ်တိုပ်တိ ကေုာံ ကပေါတ်လွဟ်လက်နက်ပၞာန် ဟွံဂွံပါ်ခတိုဟ်ဏီတုဲ ကောန်ၚာ် ဟွံအောန်နူ (၅၀)တၠ ဒးချိုတ် ဇီုကပိုက်ဂွံလဝ်ဘဲဝပ်ရဂှ် ဂကောံသြန်ဗွဝ်ကောန်ၚာ်သၟတ် ဆေၚ်ရာကဵုကၟိန်ဍုၚ်နာနာ ကုလသမဂ္ဂ (UNICEF)လလောၚ်တြးလဝ် ပ္ဍဲဂိတုဂျောန် သၞာံတုဲကၠုၚ်တေံရ။
ပရိုၚ်-သြၚ်လောန်တိုၚ်(မ်)