ပဠဝ်၊ ဖေဖဝ်ဝါရဳ(၁၉)
ရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ကြဴနူဒပ်ကံၚ်ဇြဳပၞာန် ထ္ပက်လုပ်ကရောၚ်ပၞာန် ပ္ဍဲကွာန်ကဒေဝ်တုဲ စံၚ်ပလီုဏာလဝ် သ္ၚိဒၟံၚ်ညးဍုၚ်ကွာန်တအ် ဟွံအောန်နူ (၅၀)မရဂှ် ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ်(၁) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၆)ဂှ် ကရောၚ်ပၞာန်ကံၚ်ဇြဳ ဇြဟတ်ဒပ်ပါလုပ် (၂၀၀)ပြၚ် ထ္ပက်လုပ်ကၠုၚ်ပၞာန် ပ္ဍဲကွာန်ကဒေဝ် ဖျေံသ္ဇိုၚ်ပ္ဍဲကွာန်တုဲ စံၚ်ပလီုလဝ် သ္ၚိဌာန်ညးဍုၚ်ကွာန်တအ်ရ။
ကြဴနူစံၚ်ပလီုလဝ်သ္ၚိဌာန်ကွာန်ကဒေဝ် လၟိဟ်သ္ၚိ မၞုံ (၄၀၀)မတုဲဂှ် ဂိတုဖေဖဝ်ဝါရဳ စၟတ်တ္ၚဲ (၁၇) အခိၚ်ဇိုၚ်သဝ်တ္ၚဲဂှ် ကရောၚ်ပၞာန်ကံၚ်ဇြဳ ကလေၚ်တိတ်အာ နူကဵုကွာန်ကီု ပ္ဍဲသ္ၚိဒၟံၚ်ညးဍုၚ်ကွာန်တအ်လေဝ် လုပ်ဂၠာဲဂၟာဲတုဲ ကေတ်ဏာလဝ် သီုကပေါတ် မၞုံကဵုၚုဟ်မးတအ်ရဂှ် ဂွံတီကေတ်ရ။
ကရောပ်ပၞာန်ကံၚ်ဇြဳ ကလေၚ်တိတ်အာ နူကွာန်ကဒေဝ်ဂှ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၁၈) အခိၚ်နူဂယး တ္ၚဲဏံ ဟိုတ်နူပလေဝ်ပလေဝ်ဒၟံၚ် သွက်ဂွံထ္ပက်ကရောၚ်ပၞာန် ပ္ဍဲဒၞာဲဌာန် ဗ္ဒပ်PDF တအ် နွံဒၟံၚ်ဂှ်ရ ပေါဲဗတိုက် သာတုဲ သ္ကာတ်မြဟ်ကၠုၚ်မာန်ဏောၚ်ဂှ် ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ် (၁) ဟီုသ္ဂးလဝ်ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ကဒေဝ်ဂှ် ပ္ဍဲဂိတုဖေဖဝ်ဝါရဳ တုဲကၠုၚ် စၟတ်တ္ၚဲ (၁၆)တေံလေဝ် ထ္ပက်လဝ်ပၞာန် ပ္ဍဲဗ္ဒပ်မုက်ပၞာန် PDF မွဲဗ္ဒပ်မာန်ကၠုၚ်လဝ်ကီု၊ သီကေတ်ဏာလဝ် လွဟ်လက်နက်လ္ၚဵု၊ ကွဳစက်၊ ယူနဳဖောၚ် ကေုာံ ကပေါတ်ဆက်တအ်ဂှ်ရ။
ပ္ဍဲပေါဲဗတိုက်ကွာန်ကဒေဝ်ဂှ် ကလေၚ်ရီုဂွံလဝ် မၞိဟ် ၁၃ တၠ ပါလုပ်သီုသ္ဇိုၚ်ဝန် PDF တအ် ထိၚ်ဒဝ်လဝ် မာန်ကၠုၚ်ရဂှ် ၜိုန်ရဟီုဂးလဝ် ပ္ဍဲတေဝ်လဳဂရာမ် တြးဝါဒကံၚ်ဇြဳပၞာန်ကီုလေဝ် PDF တအ်ဂှ် မၞိဟ်ညးတအ်ထိၚ်ဒဝ်လဝ် ပ္ဍဲကွာန်ကဒေဝ် ဟၟဲရောၚ်ဂှ် ဟီုသ္ဂးလဝ်ရ။
ပ္ဍဲပွိုၚ်ဍုၚ်ပဠဝ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် စတမ်နူ ဂိတုဖေဖဝ်ဝါရဳ ဒုတိယသတ္တာတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်စဵုဒၞာညးဍုၚ်ကွာန်တအ် ပေါဲဗတိုက် သာသ္ကာတ်မြဟ်ကၠုၚ်ဒၟံၚ်ကီု ပရေၚ်ဇီုကပိုက်ချိုတ်ဂျိုၚ်ၜါလ္ပာ်လေဝ် နွံကၠုၚ်ဒၟံၚ်ရ။
ပရိုၚ်-သြၚ်လောန်တိုၚ်(မ်)